ព័ត៌មានអន្ដរជាតិ

ចិន ថ្កោលទោសការល្បាតនាវាអាមេរិកនៅច្រកសមុទ្រតៃវ៉ាន់ជាលើកដំបូង តាំងពី ត្រាំ កាន់តំណែង

បានផុស

១ year មុន

នៅ

ថ្ងៃពុធ ១២ កុម្ភៈ ២០២៥

ដោយ

Chheang

បន្ទាប់ពីនាវាកងទ័ពជើងទឹកអាមេរិកពីរគ្រឿងបានឆ្លងកាត់ច្រកសមុទ្រតៃវ៉ាន់ យោធាចិនបានចោទប្រកាន់ថា អាមេរិកបានបង្កអាកប្បកិរិយាហានិភ័យនៅក្នុងផ្លូវទឹកអន្តរជាតិមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាការភាគខាងកើតនៃកងទ័ពរំដោះប្រជាជនចិន បានប្រកាសក្នុងសេចក្តីថ្លែងការណ៍មួយនៅថ្ងៃពុធទី១២កុម្ភៈនេះថា៖ «សកម្មភាពរបស់សហរដ្ឋអាមេរិកបានបញ្ជូនសញ្ញាខុស និងបង្កើនហានិភ័យសន្តិសុខ»។

យោងតាមសារព័ត៌មាន Al Jazeera កងទ័ពរំដោះប្រជាជនចិន បានឲ្យដឹងថា ខ្លួនបានតាមដានសកម្មភាពធ្វើដំណើររបស់នាវា USS Ralph Johnson ដែលជានាវាពិឃាតកងទ័ពជើងទឹក និង USNS Bowditch ដែលជានាវាអង្កេតការណ៍ ខណៈដែលពួកវាបានធ្វើដំណើរឆ្លងកាត់ផ្លូវទឹកនៅចន្លោះពីថ្ងៃចន្ទ និងថ្ងៃពុធសប្ដាហ៍នេះ។

លោក Li Xi អ្នកនាំពាក្យតំបន់ភាគខាងកើតនៃកងទ័ពរំដោះប្រជាជនចិន បាននិយាយថា៖ «កងទ័ពនៅក្នុងតំបន់មានការប្រុងប្រយ័ត្នខ្ពស់គ្រប់ពេលវេលា និងមានការតាំងចិត្តក្នុងការការពារអធិបតេយ្យភាព និងសន្តិសុខជាតិ ក៏ដូចជាសន្តិភាព និងស្ថិរភាពក្នុងតំបន់»។

ពាក់ព័ន្ធនឹងបញ្ហានេះ កងទ័ពជើងទឹកអាមេរិក បានចេញមកបញ្ជាក់ថា សកម្មភាពរបស់នាវាទាំងពីរគ្រឿងឆ្លងកាត់ច្រកសមុទ្រគឺជាសមយុទ្ធដែលធ្វើឡើងជាប្រចាំតែប៉ុណ្ណោះ។

មេបញ្ជាការកងទ័ពជើងទឹកអាមេរិក លោក Matthew Comer បានប្រាប់ថា៖ «ការឆ្លងកាត់នេះបានកើតឡើងតាមរយៈច្រករបៀងមួយនៅក្នុងច្រកសមុទ្រតៃវ៉ាន់ ដែលហួសពីសមុទ្រដែនដីនៃឆ្នេរសមុទ្ររបស់ប្រទេសណាមួយ»។

លោក Comer បានបន្ថែមថា៖ «នៅក្នុងច្រករបៀងនេះ ប្រជាជាតិទាំងអស់រីករាយនឹងសេរីភាពនាវាចរណ៍ ជើងហោះហើរលើសមុទ្រ និងការប្រើប្រាស់សមុទ្រស្របច្បាប់អន្តរជាតិផ្សេងទៀត ដែលទាក់ទងនឹងសេរីភាពទាំងអស់នេះ»។

ក្រសួងការពារជាតិតៃវ៉ាន់ ក៏បានអះអាងផងដែរថា ពួកគេបានត្រួតពិនិត្យការល្បាតនេះ ប៉ុន្តែមើលឃើញថា វាគ្រាន់ជាដំណើរការធម្មតានោះទេ។

នាវាកងទ័ពជើងទឹកអាមេរិក តែងតែធ្វើសមយុទ្ធសេរីភាពនាវាចរណ៍ឆ្លងកាត់ច្រកសមុទ្រតៃវ៉ាន់ ដែលមានប្រវែង ១៨០គីឡូម៉ែត្រ ទោះបីជាការល្បាតរបស់កងទ័ពជើងទឹកក្នុងសប្តាហ៍នេះ គឺជាលើកដំបូងចាប់តាំងពីប្រធានាធិបតីអាមេរិក លោក ដូណាល់ ត្រាំ ទើបចូលកាន់តំណែងក្នុងខែមករាក៏ដោយ។

សូមបញ្ជាក់ថា ប្រទេសចិនបានទាមទារច្រកសមុទ្រតៃវ៉ាន់ថាជាទឹកដីរបស់ខ្លួន ត្បិតច្បាប់សមុទ្ររបស់អង្គការសហប្រជាជាតិ បានកំណត់ដែនទឹកនៅត្រឹមចម្ងាយ ២២គីឡូម៉ែត្រប៉ុណ្ណោះពីឆ្នេរសមុទ្រ៕

ដោយ៖ ឈាង