យន្តហោះផ្ទុកមនុស្ស៨០នាក់ ធ្លាក់ក្រឡាប់ផ្ងារជើង ឆេះនៅអាកាសយានដ្ឋាន Toronto

យន្តហោះមួយគ្រឿងរបស់ក្រុមហ៊ុន Delta Air Lines បានធ្លាក់អំឡុងពេលចុះចត រួចក៏ក្រឡាប់ឆេះតែម្តងនៅឯអាកាសយានដ្ឋាន Toronto Pearson នៃប្រទេសកាណាដា កាលពីរសៀលថ្ងៃចន្ទទី១៧ខែកុម្ភៈឆ្នាំ២០២៥ (ត្រូវនឹងថ្ងៃអង្គារនៅកម្ពុជា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរដ្ឋបាលអាកាសចរណ៍អាមេរិក (FAA), យន្តហោះនេះជាប្រភេទ CRJ900 ម៉ាស៊ីនមួយ របស់ក្រុមហ៊ុន Bombardier នៃប្រទេសកាណាដា។ វាមានផ្ទុកមនុស្ស៨០នាក់ (អ្នកដំណើរ៧៦នាក់និងអាកាសយានិក៤នាក់) ក្នុងដំណើរចេញពីទីក្រុង Minneapolis នៃរដ្ឋ Minnesota សហរដ្ឋអាមេរិក។

ដ្បិតភ្លាមៗក្រុមមន្ត្រីមិនបញ្ជាក់ច្បាស់អំពីមូលហេតុបណ្តាលឲ្យយន្តហោះនេះធ្លាក់និងក្រឡាប់ក៏ដោយ ប៉ុន្តែគេចង្អុលចំៗទៅកត្តាអាកាសធាតុ ព្រោះពេលកើតហេតុ ទីនោះមានខ្យល់ខ្លាំងណាស់បន្ទាប់ពីតំបន់ត្រូវវាយប្រហារដោយព្យុះព្រឹល។

យ៉ាងណា ជាសំណាងល្អដែរ ដែលគ្មាននរណាម្នាក់បាត់បង់ជីវិត ប៉ុន្តែមនុស្សចំនួន១៨នាក់ត្រូវរបួស ខណៈក្នុងនោះមាន៣នាក់ ត្រូវរបួសធ្ងន់ រួមទាំងកុមារម្នាក់ផងដែរ។

ភ្លាមៗក្រោយកើតហេតុ អាកាសយានដ្ឋាន Toronto ត្រូវបិទអស់រយៈពេលជាងពីរម៉ោង ដែលបង្ខំឲ្យព្រមានយន្តហោះផ្សេងៗ ត្រូវបង្ខំចិត្តពន្យារពេលហោះហើរ។

នេះជាឧបទ្ទវហេតុចុងក្រោយបំផុត ដែលញាំញីវិស័យអាកាសចរណ៍នៅទ្វីបអាមេរិកខាងជើង បន្ទាប់ពីឧទ្ធម្ភាគចក្រយោធាមួយគ្រឿងបានបើកទៅបុកជាមួយយន្តហោះដឹកអ្នកដំណើរនៅទីក្រុង Washington សម្លាប់មនុស្សចំនួន៦៧នាក់ ខណៈមនុស្ស៧នាក់បានស្លាប់នៅពេលយន្តហោះពេទ្យមួយគ្រឿង ធ្លាក់នៅទីក្រុង Philadelphia រីឯមនុស្ស១០នាក់ទៀតបាត់បង់ជីវិត ក្នុងហេតុការណ៍ធ្លាក់យន្តហោះដឹកអ្នកដំណើរនៅ Alaska៕

អត្ថបទ៖ សុខ សុវណ្ណ

ចុចអាន៖ ធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់