ត្រាំ៖ ប្រជាជនកាណាដា នៅតែអាចច្រៀងចម្រៀងជាតិបានដដែល ពេលចូលរួមជាមួយអាមេរិក 

និយាយបែបលេងសើច ប្រធានាធិបតីអាមេរិក ដូណាល់ ត្រាំ ថ្លែងថា ប្រជាជនកាណាដា នៅតែអាចច្រៀងចម្រៀងជាតិរបស់ពួកគេបានដដែល នៅពេលប្រទេសកាណាដា មកចូលរួមជាមួយអាមេរិក។ នេះបើតាមការចុះផ្សាយរបស់ RT នៅថ្ងៃអាទិត្យទី២៣ខែកុម្ភៈឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាំងពីចូលកាន់តំណែងជាប្រធានាធិបតីអាមេរិកទី៤៧មក លោក ត្រាំ តែងបង្ហាញគំនិតចង់ដាក់បញ្ចូលប្រទេសកាណាដា ជារដ្ឋទី៥១របស់អាមេរិក ដោយប្រើការបង្ខិត​បង្ខំ​ផ្នែក​សេដ្ឋកិច្ច​ ដើម្បីសម្រេចបំណងនេះ។ 

នេះក៏ដោយសារលោកត្អូញត្អែរជាយូរមកហើយ អំពីអតិរេកពាណិជ្ជកម្មរបស់កាណាដាជាមួយសហរដ្ឋអាមេរិក ហើយ​បានប្រាប់អ្នកកាសែត​ថា ព្រំដែនគ្រាន់​តែ​ជា «បន្ទាត់ដែលគូរដោយសិប្បនិម្មិត» ប៉ុណ្ណោះ។

ដោយឡែក ក្នុងជំនួបសមាគមអភិបាលគណបក្សសាធារណរដ្ឋ នៅទីក្រុងវ៉ាស៊ីនតោនឌីស៊ី កាលពីថ្ងៃសុក្រទី២១ខែកុម្ភៈឆ្នាំ២០២៥ ប្រមុខសេតវិមានលើកឡើងថា «យើង​នឹង​ត្រូវ​ដោះស្រាយ​កិច្ច​ព្រម​ព្រៀង​មួយ​ចំនួន ព្រោះ​ខ្ញុំ​ចូល​ចិត្តបទ O Canada។ វាជារឿងដ៏ស្រស់ស្អាតដូច្នេះខ្ញុំ​គិត​ថា យើង​នឹង​ត្រូវ​រក្សា​ទុកវា​សម្រាប់​រដ្ឋ​ទី៥១»។

យ៉ាងណាក្តី ពាក់ព័ន្ធជម្លោះរវាងកាដាណា-អាមេរិកនេះ កន្លងមក​ មាន​សេចក្ដីរាយការណ៍ថា ប្រជាជនកាណាដាបានលុបចោលការធ្វើដំណើរកំសាន្តទៅសហរដ្ឋអាមេរិក​ ​ធ្វើពហិការចំពោះគ្រឿងស្រវឹង និងផលិតផលផ្សេងៗរបស់​អាមេរិក ហើយថែមទាំងបានស្រែកហ៊ោចំអកក្នុងព្រឹត្តិការណ៍កីឡាជាច្រើន​ ​បន្ទាប់​ពី​លោក​ ត្រាំ បាន​ប្រកាស​ពន្ធ ២៥ ភាគរយ លើគ្រប់មុន​ទំនិញ​ និង ១០ ភាគរយ លើ​ប្រេង​កាត របស់​កាណាដា។

ក្រៅពីនេះ ក៏​មាន​សេចក្ដីរាយការណ៍ផងដែរថា ​លោក​នាយករដ្ឋមន្ត្រីកាណាដា ចាស្ទីន ទ្រូដូ បាន​ប្រាប់មេដឹកនាំអាជីវកម្មក្នុងស្រុក ថា​លោក​ ត្រាំ «ពិតជានិយាយមែន» ជុំវិញ​ការចង់ឱ្យ​កាណាដាក្លាយជារដ្ឋទី ៥១ របស់​សហរដ្ឋអាមេរិក ដោយ​សារតែកាណាដាមាន​ធនធានធម្មជាតិដ៏សម្បូរបែប​៕

អត្ថបទ៖ សុខ សុវណ្ណ

ចុចអាន៖ ​នាយករដ្ឋមន្ត្រី​កាណា​​ដា​ចាប់ដៃ​ជាមួយអឺរ៉ុប​​​បន្តគាំទ្រ​អ៊ុយក្រែន ក្រោយ​ ​ត្រាំ​ វាយប្រហារ​ហ្សេលេនស្គី​​