អង់គ្លេស ជំរុញអាមេរិក ត្រូវធានាសន្តិសុខដល់អ៊ុយក្រែន ដើម្បីកំញើញរុស្ស៊ី កុំឲ្យលុកលុយម្តងទៀត

ថ្លែងក្នុងយន្តហោះអំឡុងដំណើរទៅកាន់ទីក្រុងវ៉ាស៊ីនតោនដើម្បីបំពេញទស្សនកិច្ចនៅថ្ងៃព្រហស្បតិ៍ទី២៧ខែកុម្ភៈឆ្នាំ២០២៥ នាយករដ្ឋមន្ត្រីអង់គ្លេសលោក Keir Starmer បានជំរុញឲ្យសហរដ្ឋអាមេរិកផ្តល់ការធានាសន្តិសុខដល់ទីក្រុងកៀវ ដើម្បីកំញើញកុំឲ្យប្រធានាធិបតីរុស្ស៊ី បើកការវាយលុកអ៊ុយក្រែន ម្តងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា «ត្រូវតែមានការធានាសន្តិសុខឲ្យបានគ្រប់គ្រាន់ ដើម្បីរារាំងលោក Putin មិនឲ្យវិលមកសាជាថ្មី ព្រោះខ្ញុំបារម្ភថា ប្រសិនបើមានបទឈប់បាញ់ដោយគ្មានការធានាសន្តិសុខទេនោះ វានឹងផ្តល់ឱកាសឲ្យលោក Putin វិលមកម្តងទៀត ពីព្រោះអ្នកទាំងអស់គ្នាដឹងហើយ អំពីមហិច្ឆតារបស់គាត់លើប្រទេសអ៊ុយក្រែន»។

យ៉ាងណាក្តី ជុំវិញបញ្ហានេះ ប្រមុខសេតវិមាន Donald Trump បានបញ្ជាក់រួចហើយក្នុងកិច្ចប្រជុំគណៈរដ្ឋមន្ត្រីលើកដំបូងក្នុងអាណត្តិទី២នេះថា លោកនឹងមិនធានាសន្តិសុខដល់អ៊ុយក្រែនឡើយ ដ្បិតលោកនិង Volodymyr Zelenskyy ត្រៀមចុះកិច្ចព្រមព្រៀងធនធានរ៉ែជាមួយគ្នាក៏ដោយ។

មិនត្រឹមប៉ុណ្ណឹង អ្វីដែលគេភ្ញាក់ផ្អើលនោះគឺថា លោក Trump ប្រកាស ទុកឲ្យអឺរ៉ុបជាអ្នកធានាសន្តិសុខរបស់អ៊ុយក្រែនវិញ។

សូមជម្រាបថា ដំណើរទស្សនកិច្ចរបស់លោក Starmer នៅវ៉ាស៊ីនតោន មានគោលបំណងពង្រឹងទំនា​ក់ទំនង អង់គ្លេស-អាមេរិក និងដោះស្រាយបញ្ហាអន្តរជាតិសំខាន់ៗ ប៉ុន្តែរឿងសំខាន់បំផុតគឺត្រូវធ្វើយ៉ាងណា បញ្ចុះបញ្ចូលអាមេរិកឲ្យបន្តធានាសន្តិសុខជូនអ៊ុយក្រែនឲ្យបាន ចំពេលមានជម្លោះជាមួយរុស្ស៊ី។

លោក Starmer ក៏នឹងលើកយកប្រធានបទទាក់ទងការបញ្ជូនកងរក្សាសន្តិភាពអឺរ៉ុបប្រមាណ ៣០ ០០០នាក់ទៅអ៊ុយក្រែនផងដែរ ហើយចង់បានការគាំទ្រពីសំណាក់លោក Trump។

ដំណើរទស្សនកិច្ចនេះទៀតសោត គឺជាផ្នែកមួយនៃយុទ្ធនាការរបស់អឺរ៉ុប ដើម្បីជំរុញឲ្យមានវត្តមានរបស់អ៊ុយក្រែន នៅក្នុងកិច្ចចរចាលើកក្រោយៗ ហើយចង់បានការធានារបស់អាមេរិកថា ខ្លួននឹងនៅតែឈរពីក្រោយអឺរ៉ុប ដើម្បីទប់ទល់នឹងសកម្មភាពដ៏គឃ្លើនរបស់រុស្ស៊ី៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា អឺរ៉ុប កំពុងចាក់សាំងលើភ្លើងសង្គ្រាមនៅអ៊ុយក្រែន