មេដឹកនាំអារ៉ាប់​ប្រជុំគ្នា​នៅទីក្រុងគែរ ដើម្បីបង្កើតជម្រើសជំនួសផែនការហ្គាហ្សារបស់អាមេរិក

រដ្ឋមន្ត្រីការបរទេសអារ៉ាប់ កំពុងជួបប្រជុំគ្នានៅទីក្រុងគែរ​នៃ​ប្រទេស​អេហ្ស៊ីប​នៅ​ថ្ងៃ​អង្គារ​ទី​៤​ខែ​មីនា​នេះ ដើម្បីបង្កើតការឆ្លើយតបរួមមួយចំពោះសំណើដ៏ចម្រូងចម្រាសរបស់ប្រធានាធិបតីអាមេរិក លោក ដូណាល់ ត្រាំ ទាក់ទងនឹងតំបន់ហ្គាហ្សាស្ទ្រីប។

ការប្រមូលផ្តុំនេះ មានគោលបំណងប្រឆាំងនឹងផែនការរបស់លោក ត្រាំ ដែលត្រូវបានថ្កោលទោសយ៉ាងខ្លាំង​ថាជាការរំលោភលើសិទ្ធិប៉ាឡេស្ទីន និង​ការ​ដក​ចេញ​នូវ​មុខតំណែងរបស់អារ៉ាប់ដែលមានជាយូរមកហើយលើអនាគតរបស់ហ្គាហ្សា។

គំនិតផ្តួចផ្តើមរបស់លោក ត្រាំ ស្នើឲ្យមានការផ្លាស់ទីលំនៅប្រជាជនប៉ាឡេស្ទីនចេញពីតំបន់​ហ្គាហ្សា និងការអភិវឌ្ឍឡើងវិញនូវតំបន់ដែលស្ថិតនៅក្រោមការគ្រប់គ្រងរបស់សហរដ្ឋអាមេរិក ជាគំនិតមួយដែលបានប្រឈមមុខនឹងការប្រឆាំងយ៉ាងខ្លាំងពីបណ្តាប្រទេសអារ៉ាប់។ មេដឹកនាំមកពីប្រទេសអេហ្ស៊ីប ហ្ស៊កដានី អារ៉ាប៊ីសាអូឌីត អេមីរ៉ាត់អារ៉ាប់រួម និងកាតា បានច្រានចោលសំណើនេះ ដោយចាត់ទុកវាជាការគំរាមកំហែងដល់ការសម្រេចចិត្តដោយខ្លួនឯងរបស់ប៉ាឡេស្ទីន និងស្ថិរភាពក្នុងតំបន់។

ជាការឆ្លើយតប អេហ្ស៊ីបបានដាក់ចេញនូវផែនការជំនួសមួយ ក្នុងគោលបំណងជំនួសអភិបាលកិច្ចរបស់ក្រុមហាម៉ាសនៅក្នុងតំបន់ហ្គាហ្សា ជាមួយនឹងស្ថាប័នបណ្តោះអាសន្នដែលគ្រប់គ្រងដោយប្រទេសអារ៉ាប់ មូស្លីម និងប្រទេសលោកខាងលិច។ សំណើនេះ ស្វែងរកការធានាឲ្យមានការចូលរួមជាអន្តរជាតិកាន់តែទូលំទូលាយនៅក្នុងការកសាងឡើងវិញ និងអភិបាលកិច្ចនៅតំបន់ហ្គាហ្សា។ ទោះជាយ៉ាងណាក៏ដោយ ព័ត៌មានលម្អិតទាក់ទងនឹងរចនាសម្ព័ន្ធអភិបាលកិច្ច ប្រភពមូលនិធិ និងការរំសាយអាវុធដ៏មានសក្ដានុពលរបស់ក្រុមហាម៉ាស នៅតែមិនទាន់​សម្រេច​នៅឡើយ ហើយផែនការនេះបានជួបប្រទះនឹងការប្រឆាំងពីក្រុមហាម៉ាស និងរដ្ឋអារ៉ាប់មួយចំនួន។

កន្លង​មក អង្គការ​សហ​ប្រជាជាតិ បាន​ប៉ាន់ស្មាន​ថា ការ​កសាង​ហ្គាហ្សា​ឡើង​វិញ អាច​ចំណាយ​ច្រើន​ជាង ៥៣​ពាន់​លាន​ដុល្លារ បន្ទាប់​ពី​សង្គ្រាម​​បាន​ផ្ទុះ​កាល​ពី​ថ្ងៃ​ទី​៧​ខែ​តុលា​ឆ្នាំ​២០២៣។

កិច្ចប្រជុំនៅទីក្រុងគែរ គឺជាជំហានដ៏សំខាន់មួយឆ្ពោះទៅរកការសម្រេចបាននូវការឯកភាពគ្នាក្នុងចំណោមប្រជាជាតិអារ៉ាប់ស្តីពីអនាគតរបស់ហ្គាហ្សា ដោយសង្កត់ធ្ងន់លើសារៈសំខាន់នៃសិទ្ធិប៉ាឡេស្ទីន និងការរួបរួម​ក្នុងតំបន់។ លទ្ធផលនៃកិច្ចពិភាក្សាទាំងនេះ នឹងជះឥទ្ធិពលយ៉ាងខ្លាំងដល់គន្លងនៃកិច្ចខិតខំប្រឹងប្រែងសន្តិភាព និងការកសាងឡើងវិញនៅហ្គាហ្សា៕

ដោយ៖ ឈាង