ព័ត៌មានអន្ដរជាតិ

ប្រតិកម្មអន្តរជាតិ ក្រោយអាមេរិកផ្អាកជំនួយដល់អ៊ុយក្រែន

បានផុស

១ year មុន

នៅ

ថ្ងៃអង្គារ ៤ មីនា ២០២៥

ដោយ

Chheang

ប្រធានាធិបតីអាមេរិកលោក ដូណាល់ ត្រាំ បានផ្អាកការផ្តល់ជំនួយយោធាដល់ក្រុងកៀវ បន្ទាប់ពីការប៉ះទង្គិចគ្នាជាមួយប្រធានាធិបតីអ៊ុយក្រែនលោក វ៉ុលឡូឌីមៀរ ហ្សេលេនស្គី នៅឯសេតវិមានកាលពីថ្ងៃសុក្រសប្តាហ៍មុន។

លោក ហ្សេលេនស្គី និងលោក ត្រាំ (រូបថត៖ EPA)

យោងតាមការចុះផ្សាយរបស់ទីភ្នាក់ងារព័ត៌មានរ៉យទ័រនៅថ្ងៃទី៤ខែមីនាឆ្នាំ២០២៥ ការសម្រេចចិត្តនេះ បានទាក់ទាញប្រតិកម្មជាច្រើនពីមេដឹកនាំ និងមន្ត្រីពិភពលោក ដោយឆ្លុះបញ្ចាំងពីភាពស្មុគស្មាញនៃភូមិសាស្ត្រនយោបាយជុំវិញសង្គ្រាមដែលកំពុងបន្តរវាងរុស្ស៊ី និងអ៊ុយក្រែន។

សមាជិកព្រឹទ្ធសភាអាមេរិកដែលមកពីគណបក្សប្រជាធិបតេយ្យ លោកស្រី Jeanne Shaheen ទទួលបន្ទុកផ្នែកគណៈកម្មាធិការទំនាក់ទំនងការបរទេសនៃព្រឹទ្ធសភា៖

«តាមរយៈការបង្កកជំនួយយោធាដល់អ៊ុយក្រែន លោកប្រធានាធិបតី ត្រាំ បានបើកទ្វារបើកចំហសម្រាប់លោក ពូទីន ដើម្បីបង្កើនការឈ្លានពានដ៏ឃោរឃៅរបស់គាត់ប្រឆាំងនឹងប្រជាជនអ៊ុយក្រែនស្លូតត្រង់។ ផលប៉ះពាល់នឹងច្បាស់ជាបំផ្លិចបំផ្លាញ»។

អ្នកនាំពាក្យរដ្ឋាភិបាលអង់គ្លេស៖

«យើងនៅតែប្តេជ្ញាចិត្តយ៉ាងមុតមាំ ក្នុងការធានាសន្តិភាពយូរអង្វែងនៅអ៊ុយក្រែន ហើយកំពុងចូលរួមជាមួយសម្ព័ន្ធមិត្តសំខាន់ៗក្នុងការគាំទ្រកិច្ចខិតខំប្រឹងប្រែងនេះ។ វាគឺជារឿងត្រឹមត្រូវដែលត្រូវធ្វើ និងជាផលប្រយោជន៍របស់យើងក្នុងការធ្វើដូច្នេះ»។

លោក Benjamin HaDDAD រដ្ឋមន្ត្រីក្រសួងការបរទេសបារាំងប្រចាំអឺរ៉ុប៖

លោក Haddad បានប្រាប់ទូរទស្សន៍ France 2 ថា៖ «ជាបឋម បើអ្នកចង់បានសន្តិភាព តើការសម្រេចចិត្តផ្អាកអាវុធទៅអ៊ុយក្រែនពង្រឹងសន្តិភាព ឬធ្វើវាឲ្យកាន់តែវែងឆ្ងាយ? វានាំរឿងឲ្យកាន់តែវែងឆ្ងាយថែមទៀត ព្រោះវាត្រឹមតែពង្រឹងសមត្ថភាពអ្នកឈ្លានពានប៉ុណ្ណោះ ដែលជារុស្ស៊ី»។

ប្រធានគណៈកម្មាធិការកិច្ចការបរទេសរបស់សភាអ៊ុយក្រែន លោក OLEKSANDR MEREZHKO៖

«នេះមើលទៅវាពិតជាអាក្រក់ណាស់។ វាហាក់ដូចជាគាត់កំពុងជំរុញយើងឲ្យឆ្ពោះទៅរកការចុះចាញ់សត្រូវ ដែលមានន័យថាទទួលយកការទាមទាររបស់រុស្ស៊ី។ ការបញ្ឈប់ជំនួយឥឡូវនេះមានន័យថាជួយ ពូទីន»។

អនុរដ្ឋមន្ត្រីការពារជាតិប៉ូឡូញ លោក CEZARY TOMCZYK៖

លោក Tomczyk បានប្រាប់វិទ្យុ Zet ថា ការផ្អាកជំនួយយោធាសម្រាប់អ៊ុយក្រែន គឺជា «ព័ត៌មានអាក្រក់»។

អ្នកនាំពាក្យរដ្ឋាភិបាលហុងគ្រី៖

«ប្រធានាធិបតីសហរដ្ឋអាមេរិក និងរដ្ឋាភិបាលហុងគ្រីមានជំហរដូចគ្នា៖ ជំនួសឲ្យការបន្តការនាំចេញអាវុធ និងសង្រ្គាម បទឈប់បាញ់ និងការចរចាសន្តិភាពគឺចាំបាច់យ៉ាងឆាប់រហ័សតាមដែលអាចធ្វើទៅបាន»។

សូមបញ្ជាក់ថា រុស្ស៊ីមិនទាន់ចេញសេចក្ដីថ្លែងការណ៍ជាផ្លូវការអ្វីឡើយពាក់ព័ន្ធនឹងរឿងផ្អាកជំនួយអាមេរិកចំពោះអ៊ុយក្រែន។ យ៉ាងណា នាពេលកន្លងមក រុស្ស៊ីតែងតែច្រានចោលនូវការអំពាវនាវរបស់មេដឹកនាំអឺរ៉ុបអំពីជំនួយយោធាទៅឲ្យអ៊ុយក្រែន ដោយអះអាងថា ការគាំទ្របែបនេះមានតែពន្យារពេលឲ្យសង្គ្រាមកាន់តែអូសបន្លាយថែមទៀត។ អ្នកនាំពាក្យវិមានក្រឹមឡាំង លោក Dmitry Peskov ធ្លាប់បានសង្កត់ធ្ងន់ថា សន្តិភាពពិតប្រាកដ គឺទាមទារឲ្យមានការគាបសង្កត់ប្រធានាធិបតី ហ្សេលេនស្គី ឲ្យផ្លាស់ប្តូរគោលជំហររបស់គាត់៕

ដោយ៖ ឈាង

ចុចអាន៖ Trump ផ្អាកជំនួយទាំងអស់ទៅអ៊ុយក្រែន ក្រោយទាស់គ្នាបែកផ្សែងជាមួយ Zelensky