ព័ត៌មានអន្ដរជាតិ

លោក Macron៖ បារាំងត្រៀមខ្លួនពង្រីកការរារាំងនុយក្លេអ៊ែររបស់ខ្លួនដល់ដៃគូអឺរ៉ុប

បានផុស

១ year មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

Chheang

លោក Emmanuel Macron បាននិយាយកាលពីថ្ងៃទី៥ខែមីនាថា ប្រទេសបារាំងត្រៀមខ្លួនជាស្រេចដើម្បីពង្រីកការរារាំងនុយក្លេអ៊ែររបស់ខ្លួនដល់ដៃគូសហភាពអឺរ៉ុប ដោយហេតុថា «យុគសម័យថ្មី» របស់អឺរ៉ុបកំពុងប្រឈមមុខនឹងការគំរាមកំហែងផ្នែកយោធាពីរុស្ស៊ី។

លោក Macron បានសង្កត់ធ្ងន់ថា សមត្ថភាពនុយក្លេអែររបស់បារាំងអាចធ្វើជាឆ័ត្រការពារសម្រាប់ប្រជាជាតិសហភាពអឺរ៉ុប ដោយផ្តល់ឲ្យពួកគេនូវឥរិយាបថការពារដ៏រឹងមាំប្រឆាំងនឹងការឈ្លានពានដ៏មានសក្តានុពលរបស់រុស្ស៊ី។ លោកក៏បានបញ្ជាក់ផងដែរថា ការសម្រេចចិត្តដាក់ពង្រាយអាវុធទាំងនេះនឹងនៅតែស្ថិតក្រោមការគ្រប់គ្រងរបស់បារាំងយ៉ាងរឹងមាំ ដោយធានានូវស្វ័យភាពនៅក្នុងយុទ្ធសាស្ត្រការពាររបស់អឺរ៉ុប។

លោក Macron បានបន្តទៀតថា រុស្ស៊ីមានផែនការបន្តបង្កើនកម្លាំងយោធារបស់ខ្លួនរហូតដល់យ៉ាងហោចណាស់ឆ្នាំ២០៣០ខាងមុខ ខណៈប្រជាជាតិមួយនេះកំពុងមានបំណងបំផ្លាញស្ថាបត្យកម្មសន្តិសុខអឺរ៉ុប។ លោកបានបន្ថែមថា មហិច្ឆិតារបស់រុស្ស៊ីអាចពង្រីកហួសពីការឈ្លានពានអ៊ុយក្រែន ដែលអាចគំរាមកំហែងដល់ប្រទេសអឺរ៉ុបខាងកើតផ្សេងទៀត រួមទាំងប្រទេសម៉ុលដាវី និងរូម៉ានី។ អាស្រ័យហេតុនេះហើយទើបលោក Macron កំពុងអំពាវនាវឲ្យមានសាមគ្គីភាពកាន់តែច្រើននៅក្នុងទ្វីបអឺរ៉ុប ដើម្បីដោះស្រាយបញ្ហាប្រឈមទាំងនេះ។

ទន្ទឹមនោះដែរ មេដឹកនាំបារាំងក៏បានប្រកាសពីផែនការរៀបចំកិច្ចប្រជុំនៃមេបញ្ជាការយោធាកំពូលមកពីបណ្តាប្រទេសអឺរ៉ុប ដើម្បីផ្តល់ការធានាសន្តិសុខដ៏ជាក់ស្តែងមួយសម្រាប់អ៊ុយក្រែន។ លោក Macron បានរំលឹកឡើងវិញថា ការដាក់ពង្រាយកងទ័ពអន្តរជាតិដ៏មានសក្ដានុពល នឹងធ្វើឡើងបន្ទាប់ពីបទឈប់បាញ់ដំបូង ដែលឈរជើងយ៉ាងជ្រៅនៅពីក្រោយជួរមុខអ៊ុយក្រែន៕

ដោយ៖ ឈាង