នាយករដ្ឋមន្ត្រីកាណាដាថ្មី បង្ហាញជំហរមុតមាំប្រឆាំងលោក Trump

លោក Mark Carney ត្រូវបានជ្រើសតាំងជាប្រមុខគណបក្សសេរីនិយមហើយនឹងស្បថចូលកាន់តំណែងជំនួសលោក Justin Trudeau ក្នុងនាមជានាយករដ្ឋមន្ត្រីប្រទេសកាណាដា នារយៈពេលប៉ុន្មានថ្ងៃខាងមុខ ខណៈលោក Carney បានបង្ហាញជំហរយ៉ាងមុតមាំប្រឆាំងនិងមិនចុះញ៉មនឹងប្រធានាធិបតីអាមេរិក Donald Trump ដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាក្រោយការតែងតាំង អតីត​ប្រធាន​ធនាគារ​កណ្តាល​របស់​ចក្រភព​អង់គ្លេស និង​កាណាដារូបនេះ​និយាយ​ថា ប្រជាជាតិ​របស់​លោក កំពុង​ប្រឈម​មុខ​នឹងថ្ងៃ​ដ៏​ខ្មៅ​ងងឹត ដែល​នាំ​មក​ដោយ​ប្រទេស​មួយ​ដែល​គ្រប់គ្នា​មិន​អាច​ទុក​ចិត្ត​ទៀតបាន។

ទន្ទឹមនោះ នៅក្នុងសារផ្ញើទៅកាន់លោក Trump, លោក Carney បានប្តេជ្ញាថា នឹងសងសឹកវិញ តាមរយៈការយកពន្ធលើទំនិញរបស់សហរដ្ឋអាមេរិករហូតដល់ ទីក្រុងវ៉ាស៊ីនតោន បង្ហាញការគោរពដល់កាណាដា។

តើលោក Mark Carney ជានរណា?

លោក Mark Carney កើតនៅថ្ងៃទី១៦ខែមីនាឆ្នាំ១៩៦៥ ក្នុងទីក្រុង Fort Smith នៃតំបន់ Northwest Territories នៃប្រទេសកាណាដា។

ដ្បិតថាបុរសវ័យ៥៩ឆ្នាំរូបនេះ ខ្វះបទពិសោធន៍ផ្នែកនយោបាយក៏ដោយ ប៉ុន្តែលោកបានចាប់ផ្តើមកាន់តំណែងជាទេសាភិបាលនៃធនាគារកាណាដា ចំពេលមានវិបត្តិហិរញ្ញវត្ថុសកលលោកឆ្នាំ២០០៨ ហើយគេសរសើរគាត់មិនដាច់ពីមាត់ ចំពោះការចាត់វិធានការរហ័សនិងសម្រេចចិត្តទាន់ពេលត្រឹមត្រូវ ជួយស្រោចស្រង់ប្រទេសកាណាដាពីការធ្លាក់ចូលវិបត្តិសេដ្ឋកិច្ចដ៏ធ្ងន់ធ្ងរ។

ក្នុងឆ្នាំ២០១៣ លោកបានចាកចេញទៅកាន់មុខតំណែងនៅធនាគារអង់គ្លេសវិញ ដោយធ្វើការរហូតដល់ឆ្នាំ២០២០ ដែលជាឆ្នាំចក្រភពអង់គ្លេសចាកចេញពីសហភាពអឺរ៉ុបជាផ្លូវការ។

នៅទីនោះផងដែរ គេសរសើរគាត់ថាបានជួយកាត់បន្ថយផលប៉ះពាល់នៃ Brexit ទោះការវាយតម្លៃរបស់គាត់ដែលថា ការបែកចេញពី EU នឹងបង្កហានិភ័យដល់សេដ្ឋកិច្ចអង់គ្លេស បានបង្កការខឹងសម្បាពីសំណាក់អ្នកអភិរក្សនិយមក៏ដោយ។

កាលពីថ្ងៃអាទិត្យទី៩ខែមីនាឆ្នាំ២០២៥ លោក Carney បានឈ្នះការបោះឆ្នោតក្នុងគណបក្សសេរីនិយម ដោយសំឡេងលើសលប់ ៨៥.៩% ផ្តួលបេក្ខជន៣នាក់ទៀតដូចជា Chrystia Freeland, Karina Gould និង Frank Baylis។

ដូច្នេះ លោក Carney នឹងត្រូវចូលជំនួសតំណែងលោក Trudeau ដែលបានប្រកាសលាលែងកាលពីខែមករា ក្រោយកាន់តំណែងបាន៩ឆ្នាំ៕

អត្ថបទ៖ សុខ សុវណ្ណ

ចុចអាន៖ ត្រាំ៖ ប្រជាជនកាណាដា នៅតែអាចច្រៀងចម្រៀងជាតិបានដដែល ពេលចូលរួមជាមួយអាមេរិក