ព័ត៌មានអន្ដរជាតិ

ប្រជាជនថៃមកពី១៩ខេត្ត តវ៉ាដោយដឹកត្រីទីឡាព្យ៉ាថ្ពាល់ខ្មៅចាក់នៅមុខវិមានរដ្ឋាភិបាល

បានផុស

២ សប្តាហ៍ មុន

នៅ

ថ្ងៃពុធ ១៩ មីនា ២០២៥

ដោយ

ប្រជាអ្នកនេសាទនិងប្រជាកសិករថៃមកពីខេត្តចំនួន១៩ បានរួមគំនិតគ្នាតវ៉ាទាមទារឱ្យរដ្ឋាភិបាលចេញវិធានការកំចាត់ពូជត្រីទីឡាព្យ៉ាថ្ពាល់ខ្មៅ ដោយការដឹកត្រីប្រភេទនេះចំនួន៥តោនមកចាក់នៅមុខវិមានរដ្ឋាភិបាល ខណៈការតវ៉ាកន្លងមកមិនត្រូវបានអើពើនោះ។

ក្រុមអ្នកតវ៉ាបានអះអាងថា ប្រភេទត្រីទីឡាព្យ៉ាថ្ពាល់ខ្មៅនេះ ជាប្រភេទពូជនាំចូលពីក្រៅប្រទេស និងកំពុងបំផ្លាញប្រព័ន្ធអេកូឡូស៊ីនិងធនធានធម្មជាតិក្នុងស្រុក។

ត្រីទីឡាព្យ៉ាប្រមាណ៥តោនត្រូវបានដឹកមកចាក់នៅមុខវិមានរដ្ឋាភិបាល។ The Reporters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មានថៃ The Reporters តំណាងក្រុមអ្នកតវ៉ា បាននិយាយថា ដោយសារកន្លងមក ទាំងនាយករដ្ឋមន្ត្រី និងឧបនាយករដ្ឋមន្ត្រី មិនបានចេញមកទទួលញត្តិរបស់ពួកគេដោយផ្ទាល់និងមិនឃើញមានដំណោះស្រាយចំពោះការស្នើរបស់ពួកគេទេ ទើបពួកគេឯកភាពគ្នាដឹកត្រីទីឡាព្យ៉ាថ្ពាល់ខ្មៅចំនួន៥តោនមកចាក់នៅមុខវិមានរដ្ឋាភិបាលបែបនេះ។

លោក Somkid Chuekong អគ្គលេខាធិការរងនាយករដ្ឋមន្ត្រី និង លោក Bancha Sukkaew អគ្គនាយកនៃអគ្គនាយកដ្ឋានជលផល ដែលចេញមកទទួលញត្តិ បាននិយាយថា នាយកដ្ឋានជលផល រួមជាមួយក្រសួងកសិកម្មនិងរដ្ឋាភិបាលបាននិងកំពុងពន្លឿនការដោះស្រាយបញ្ហានេះជាបន្តបន្ទាប់និងកំចាត់ពូជត្រីនេះឱ្យអស់ពីប្រព័ន្ធអេកូឡូស៊ីឱ្យបានច្រើនបំផុត៕