ភ្លើងឆេះព្រៃបានជំរុញឱ្យមានការជម្លៀសចេញនៅរដ្ឋ Carolina សហរដ្ឋអាមេរិក

ភ្លើងឆេះព្រៃជាច្រើន​កន្លែង​បានបង្ខំជម្លៀស​ប្រជាជន​​ចេញនៅក្នុងតំបន់​រង​​​ផល​ប៉ះពាល់​ជាច្រើនក្នុងរដ្ឋ Carolina សហរដ្ឋអាមេរិក ខណៈរដ្ឋនេះទើបតែងើបឡើងវិញពីខ្យល់ព្យុះ Helene ដ៏បំផ្លិចបំផ្លាញ។ នេះបើយោងតាមការចេញផ្សាយ​របស់ទីភ្នាក់ងារព័ត៌មាន AP នៅថ្ងៃទី២៤ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅភាគខាងលិចរដ្ឋ Carolina មានភ្លើងឆេះយ៉ាងសកម្មចំនួនបីនៅក្នុងតំបន់ Polk ដោយមួយបានលាតសន្ធឹងលើផ្ទៃដី៥គីឡូម៉ែត្រការ៉េ និងមួយទៀតបានរាលដាលលើផ្ទៃដី ៧.៣គីឡូម៉ែត្រការ៉េ។ ភ្លើងទីបីបានឆេះផ្ទៃដីប្រហែល ៨១ ហិកតា និងបានបំផ្លាញផ្ទះចំនួន៣ នៅតំបន់ Burke County និងនៅ Stokes ជាប់ព្រំដែនភាគខាងជើងជាមួយរដ្ឋ Virginia។

អាជ្ញាធរ បានប្រកាសពីការជម្លៀសចេញ​​ជា​ដាច់​ខាត​​ដែលចាប់ផ្តើមនៅម៉ោង៨:២០កាលពីយប់ថ្ងៃសៅរ៍សម្រាប់ផ្នែកខ្លះនៃតំបន់ Polk ខណៈភាពមើលឃើញនៅក្នុងតំបន់នឹងត្រូវបាថយចុះដោយសារផ្សែងភ្លើង។ ទីជំរកមួយក៏ត្រូវបានបង្កើតឡើងនៅទីក្រុង Columbus សម្រាប់ឲ្យអ្នកជម្លៀសចេញជ្រកកោនបណ្ដោះអាសន្នផងដែរ។

ចំណែកនៅភាគខាងត្បូងរដ្ឋ Carolina អាជ្ញាធរបានប្រកាសដាក់រដ្ឋក្នុងភាពអាសន្នកាលពីថ្ងៃសៅរ៍ ដោយសារមានភ្លើង​ឆេះនៅតំបន់ Pickens នៅលើភ្នំ Blue Ridge ឆេះផ្ទៃដីប្រមាណ១២១ហិកតា និង​ក៏បានបញ្ជាឲ្យមានការជម្លៀស​ប្រជាជនរស់នៅជិតភ្នំនេះដោយស្ម័គ្រចិត្តផងដែរ។

គួរបញ្ជាក់ថា រដ្ឋ Carolina ទើតែងើបឡើងពីការងការវាយប្រហារយ៉ាងខ្លាំងដោយព្យុះ Helene កាលពីខែកញ្ញា។ ខ្យល់​ព្យុះ​នេះបានបំផ្លាញ ឬប៉ះពាល់ដល់ផ្លូវថ្នល់ដែលគ្រប់គ្រងដោយរដ្ឋចម្ងាយ៨០៤៦គីឡូម៉ែត្រ និងខូចខាតផ្លូវឯកជន ស្ពាន និងផ្លូវថ្នល់ចំនួន ៧០០៕

អត្ថបទ៖ ប៊ុន សុភាព