ព័ត៌មានអន្ដរជាតិ

សាលក្រម លោក Yoon រំពឹងនៅខែមេសា គឺមុនថ្ងៃចៅក្រម២រូបផុតអាណត្តិ

បានផុស

១ year មុន

នៅ

ថ្ងៃពុធ ២៦ មីនា ២០២៥

ដោយ

មានសេចក្តីរាយការណ៍ថា សាលក្រមរបស់តុលាការធម្មនុញ្ញកូរ៉េខាងត្បូងលើបណ្តឹងបណ្តេញប្រធានាធិបតី Yoon Suk Yeol ចេញពីអំណាច នឹងត្រូវប្រកាសនៅក្នុងខែមេសាខាងមុខនេះ ខណៈតុលាការនេះកំពុងមមាញឹកដោះស្រាយបណ្តឹងតូចៗជាច្រើនទៀត។

ចៅក្រមតុលាការធម្មនុញ្ញកូរ៉េខាងត្បូងក្នុងអំឡុងពេលបើកសវនាការសំណុំរឿងលោក Yoon Suk Yeol។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានកូរ៉េខាងត្បូង Korea Herald ដែលយោងតាមសេចក្តីរាយការណ៍ជាភាសាកូរ៉េផ្សាយក្នុងគេហទំព័រ News1 នៅថ្ងៃទី២៦ខែមីនា បានឲ្យដឹងថា តុលាការធម្មនុញ្ញកូរ៉េដែលបានធ្វើការលើសំណុំរឿងរបស់ ប្រធានាធិបតី Yoon Suk Yeol ដែលបានព្យួរអំណាច អស់រយៈពេលជាងមួយខែ បន្ទាប់ពីបញ្ចប់សវនាការនៅថ្ងៃទី២៥ខែកុម្ភៈ អាចជំរុញការប្រកាសសាលក្រមរបស់ខ្លួនរហូតដល់ខែមេសា។

ចៅក្រមទាំងប្រាំបីរូប បាននឹងកំពុងបើកកិច្ចប្រជុំពិភាក្សាស្ទើរតែរាល់ថ្ងៃ ប៉ុន្តែបានព្យាយាមអូសបណ្តាលការប្រកាសសាលក្រមដែលមិនធ្លាប់មានពីមុនមក។

ក្នុងចំណោមចៅក្រម៦រូបដែលមានឈ្មោះក្នុងតុលាការចាប់តាំងពីសំណុំរឿងចោទប្រកាន់របស់លោក Yoon ក៏ត្រូវបានបញ្ជូនទៅកាន់តុលាការកាលពីថ្ងៃទី១៤ខែធ្នូឆ្នាំ២០២៤ ចៅក្រុម៤រូបបានបោះឆ្នោតសម្រេចចិត្តជាឯកច្ឆ័ន្ទប្រឆាំងការចោទប្រកាន់ទម្លាក់ប្រធានាធិបតីស្តីទី Han Duck-soo កាលថ្ងៃទី២៤ខែមីនា។

នៅក្នុងសាលក្រមចោទប្រកាន់របស់តុលាការលើនាយករដ្ឋមន្ត្រី និងជាប្រធានាធិបតីស្តីទី Han Duck-soo កាលពីថ្ងៃទី២៤ខែមីនា ចៅក្រមចំនួន ៥នាក់បានបោះឆ្នោតទម្លាក់សំណើរបស់សភាដើម្បីចោទប្រកាន់លោក Han ខណៈដែលចៅក្រមម្នាក់ បានបោះឆ្នោតគាំទ្រសំណើនោះ ហើយចៅក្រមពីររូបទៀតបានបោះឆ្នោតអនុប្បវាទ។ វាជាការសម្រេចលើកដំបូងលើករណីចោទប្រកាន់ទាក់ទងផ្ទាល់នឹងការប្រកាសច្បាប់អាជ្ញាសឹកថ្ងៃទី៣ខែធ្នូរបស់លោក Yoon។

គិតមកដល់ម៉ោង៣រសៀលថ្ងៃទី២៦ខែមីនា តុលាការធម្មនុញ្ញមិនទាន់ផ្តល់សញ្ញាណាមួយថានៅពេលណាដែលខ្លួននឹងប្រកាសសាលក្រមរបស់ខ្លួនថាតើលោក Yoon នឹងត្រូវដកចេញឬអត់នោះទេ។ កន្លងមក តុលាការបានប្រកាសជូនដំណឹងមុនជាធម្មតាអំពីកាលបរិច្ឆេទដែលខ្លួននឹងចេញសាលដីកាពីរទៅបីថ្ងៃមុន សម្រាប់ហេតុផលសន្តិសុខ និងការរៀបចំ។

សម្រាប់សប្តាហ៍ទីបួនជាប់គ្នា ថ្ងៃទី២៨ខែមីនា ត្រូវបានគេមើលឃើញថាជាកាលបរិច្ឆេទដែលទំនងបំផុត ប្រសិនបើតុលាការធម្មនុញ្ញត្រូវបន្តទៅមុខជាមួយនឹងការប្រកាសសាលក្រមក្នុងសប្តាហ៍នេះ។ តុលាការនេះ នៅពេលបើកដំណើរការទទួលរឿងក្តីនេះដំបូងកាលថ្ងៃទី២៦ខែធ្នូ២០២៤ បានចាត់ទុកសំណុំរឿងចោទប្រកាន់លោក Yoon ថាជាកិច្ចការអាទិភាពបំផុត។

តាមសេចកី្តរាយការណ៍ របស់ Korea Herald ទោះជាយ៉ាងណាក៏ដោយ ឥឡូវនេះបណ្តឹងរដ្ឋធម្មនុញ្ញចំនួន៤០ផ្សេងទៀតត្រូវបានកំណត់ពេលសម្រាប់សេចក្តីសម្រេចនៅថ្ងៃទី ២៧ខែមីនា ដូច្នេះទំនងណាស់ដែលថា តុលាការនឹងមិនអាចដោះស្រាយសំណុំរឿងដ៏សំខាន់បំផុតរបស់ខ្លួននៅថ្ងៃទី២៨ខែមីនានោះទេ។

មានការរំពឹងទុកថា សេចក្តីសម្រេចមួយអាចកើតឡើងបន្ទាប់ពីការបោះឆ្នោតនៅថ្ងៃទី២ខែមេសា នៅតាមតំបន់មួយចំនួន ប្រហែលជានៅថ្ងៃទី៣ ឬ៤ខែមេសា ដោយពិចារណាថា ពេលវេលាកំណត់គឺតឹងតែងបំផុតសម្រាប់ចៅក្រម២រូបនៅក្នុងតំណែងសមាជិកចៅក្រមទាំង៩រូប ដែលនឹងផុតអាណត្តិនៅក្នុងខែមេសានោះដែរ។

ប្រធានចៅក្រមស្តីទី Moon Hyung-bae និងចៅក្រម Lee Mi-son បញ្ចប់អាណត្តិនៅថ្ងៃទី១៨ខែមេសា។ ក្នុងឆ្នាំ ២០១៧ សេចក្តីសម្រេចចោទប្រកាន់លើអតីតប្រធានាធិបតី Park Geun-hye បានកើតឡើងតែបីថ្ងៃមុនពេលប្រធានស្តីទីចៅក្រមតុលាការធម្មនុញ្ញចូលនិវត្តន៍៕