ព័ត៌មានអន្ដរជាតិ

មនុស្សជិត១០០នាក់ត្រូវបានសាកសួរជុំវិញការដួលរលំអគារនៅបាងកក

បានផុស

១ year មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

មន្ត្រីប៉ូលិសជាន់ខ្ពស់ថៃ បានឲ្យដឹងថា ប៉ូលិសបានសាកសួរមនុស្សជិត ១០០នាក់ជាផ្នែកនៃការស៊ើបអង្កេតលើហេតុការណ៍ដួលរលំអគារការិយាល័យសវនកម្មរដ្ឋ (SAO) ក្នុងទីក្រុងបាងកក។ នេះបើយោងតាមការចេញផ្សាយរបស់ The Nation នៅថ្ងៃទី១០ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយឧត្តមសេនីយ៍ Noppasil Poonsawat ស្នងការរងនគរបាលក្រុងបាងកក បាននិយាយថា ប៉ូលិសកំពុងបន្តប្រមូលភស្តុតាង ដើម្បីស៊ើបអង្កេតឧក្រិដ្ឋកម្មនេះ។ នេះរួមបញ្ចូលទាំងចម្លើយរបស់សាក្សី ការពិនិត្យកោសល្យវិច្ច័យ និងការវាយតម្លៃអ្នកជំនាញ។

រហូតមកដល់ពេលនេះ មនុស្សសរុប៩៨នាក់ត្រូវបានសាកសួរ ក្នុងនោះមានបុគ្គលិកចំនួន១៣នាក់មកពីក្រុមហ៊ុនដែលចូលរួមក្នុងគម្រោងនេះ សាច់ញាតិរបស់អ្នកស្លាប់ចំនួន១៥នាក់ សាក្សី និងសមាជិកគ្រួសារជនរងគ្រោះចំនួន៦៤នាក់ និងកម្មករដែលរងរបួសចំនួន៦នាក់។

លោក បានបន្តថា ខណៈដែលក្រុមស៊ើបអង្កេតកំពុងបង្កើនល្បឿនក្នុងការស៊ើបអង្កេតនោះ វាលឿនពេកក្នុងការបញ្ជាក់ថាតើនរណានឹងត្រូវប្រឈមនឹងការចោទប្រកាន់ជុំវិញរឿងសោកនាដកម្មនេះ។

ទន្ទឹមនឹងនេះ គណៈកម្មាធិការពាណិជ្ជកម្ម និងឧស្សាហកម្មព្រឹទ្ធសភាកំពុងពន្លឿនការស៊ើបអង្កេតរបស់ខ្លួនលើការចោទលើក្រុមហ៊ុន China Railway No. 10 (Thailand) Co ដែលជាក្រុមហ៊ុនពាក់ព័ន្ធនឹងការសាងសង់អគារនេះ។

ព្រឹទ្ធសមាជិក លោក Ekachai Ruangrat បានឲ្យដឹងថា អនុគណៈកម្មាធិការមួយត្រូវបានបង្កើតឡើង ដើម្បីពិនិត្យមើលការរំលោភដែលអាចកើតមានលើច្បាប់ពាណិជ្ជកម្មបរទេស ខណៈការរកឃើញដំបូងបង្ហាញថា ក្រុមហ៊ុន China Railway No.10 ប្រហែលជាបានប្រើប្រាស់ជនជាតិថៃ៣នាក់ជាអ្នកតំណាងដើម្បីកាន់កាប់ភាគហ៊ុន ៥១% នៅក្នុងក្រុមហ៊ុនក្នុងការប៉ុនប៉ងដើម្បីគេចចេញពីការរឹតបន្តឹងកម្មសិទ្ធិបរទេស។

លោក បានបន្ថែមថា បុគ្គលទាំងបីនេះត្រូវបានគេរាយការណ៍ថាមានទំនាក់ទំនងជាមួយក្រុមហ៊ុនយ៉ាងតិច១១ ផ្សេងទៀត ហើយត្រូវបានគេសង្ស័យថាបានធ្វើសកម្មភាពដើម្បីផលប្រយោជន៍បរទេស។ ជនជាតិថៃទាំង៣នាក់នោះមិនទាន់ត្រូវបានគេស្គាល់អត្តសញ្ញាណឬក៏នៅឡើយទេ។ ពួកគេអាចត្រូវបានចាប់ខ្លួននៅពេលដែលការស៊ើបអង្កេតបានបញ្ចប់។

លោក Ekachai បានបន្ថែមថា ការរកឃើញរហូតមកដល់ពេលនេះ គឺផ្អែកលើការពិនិត្យឯកសារផ្លូវការ។ គណៈកម្មាធិការក៏កំពុងស៊ើបអង្កេត ថាតើសម្ភារៈសំណង់ដែលមិនមានស្តង់ដារត្រូវបានប្រើប្រាស់នៅក្នុងគម្រោងសាងសង់ដែរឬទេ។

សូមបញ្ជាក់ថា អគារការិយាល័យសវនកម្មរដ្ឋ (SAO) ក្នុងទីក្រុងបាងកកបានដួលរលំដោយសារតែការទទួលរងឥទ្ធិពលនៃការរញ្ជួយដីកម្រិត ៧.៧រ៉ិចទ័រ កាលពីថ្ងៃទី២៨ខែមីនា សង្កត់កម្មករជាច្រើននាក់ គិតត្រឹមថ្ងៃពុធ មនុស្ស២២នាក់ត្រូវបានគេបញ្ជាក់ថា បានស្លាប់ ហើយ៧២នាក់នៅបាត់ខ្លួន ខណៈដែលប្រតិបត្តិការស្វែងរកកំពុងបន្តនៅឡើយ ដែលរំពឹងថានឹងបញ្ចប់នៅចុងខែមេសានេះ៕