ត្រាំ៖ កិច្ច​ព្រមព្រៀងរ៉ែ​​​អាមេរិក-អ៊ុយក្រែន អាច​ចុះ​ហត្ថលេខានៅ​​សប្ដាហ៍​ក្រោយ

លោក ដូណាល់ ត្រាំ បានប្រកាស​កាល​ពី​ថ្ងៃ​ទី​១៧​ខែ​មេសា​​ថា សហរដ្ឋអាមេរិកកំពុង​រៀបចំ​ដើម្បីចុះហត្ថលេខាលើកិច្ចព្រមព្រៀងរ៉ែ​កម្រ​ជាមួយអ៊ុយក្រែននៅ​ថ្ងៃព្រហស្បតិ៍សប្តាហ៍ក្រោយ។

ប្រធានាធិបតី​​អាមេរិក បាន​និយាយ​ថា៖ «យើងមានកិច្ចព្រមព្រៀងរ៉ែដែលខ្ញុំគិតថានឹងត្រូវបានចុះហត្ថលេខានៅថ្ងៃទី២៤​ខែមេសា។ ហើយខ្ញុំសន្មត់ថាពួកគេនឹងសម្រេច​បាន​នូវ​កិច្ចព្រមព្រៀង​នេះ»។

កិច្ចព្រមព្រៀងដែលមាន​៨០​ទំព័រ​ ត្រូវបានរៀបចំឡើងដើម្បីផ្តល់​ឲ្យ​សហរដ្ឋអាមេរិកនូវសិទ្ធិចូលប្រើប្រាស់​នូវ​​ធនធាន​រ៉ែ​កម្រ និងសារធាតុ​សំខាន់ៗ​របស់​អ៊ុយក្រែន ដែលជា​វត្ថុធាតុ​ដើម​ដ៏​ចាំបាច់​បំផុត​សម្រាប់បច្ចេកវិទ្យាទំនើប និងប្រព័ន្ធយោធា។

នៅក្នុងសុន្ទរកថាទៅកាន់សារព័ត៌មាន លោក ត្រាំ បាន​លើក​ឡើង​ថា កិច្ចព្រមព្រៀងនេះនឹងអនុញ្ញាត​ឲ្យ​ក្រុមហ៊ុនអាមេរិកវិនិយោគ និងទាញយកទ្រព្យសម្បត្តិរ៉ែពីអ៊ុយក្រែន ដោយជួយធានាខ្សែសង្វាក់ផ្គត់ផ្គង់របស់អាមេរិកសម្រាប់សមាសធាតុសំខាន់ៗដូចជា លីចូម cobalt និងធាតុកម្រ​មួយ​ចំនួន​ទៀត។ លោក​បាន​មាន​ប្រសាសន៍​ថា៖ «វា​ជា​ការ​ឈ្នះ​សម្រាប់​ប្រទេស​ទាំង​ពីរ។ អ៊ុយក្រែនទទួលបានការគាំទ្រសម្រាប់សេដ្ឋកិច្ច និងហេដ្ឋារចនាសម្ព័ន្ធរបស់ខ្លួន ហើយយើងទទួលបានធនធានដែលយើងត្រូវការដើម្បីការពារផលប្រយោជន៍ជាតិរបស់យើង និងកាត់បន្ថយការពឹងផ្អែកលើប្រទេសជាសត្រូវ»។

យោងតាមរបាយការណ៍ កិច្ចព្រមព្រៀងនេះគឺជាផ្នែកមួយនៃយុទ្ធសាស្ត្រទូលំទូលាយរបស់សហរដ្ឋអាមេរិក ដើម្បីធ្វើពិពិធកម្មប្រភពនៃវត្ថុធាតុដើមឧស្សាហកម្មសំខាន់ៗ និងកាត់បន្ថយការពឹងផ្អែកជាយុទ្ធសាស្ត្រលើប្រទេសចិន និងរុស្ស៊ី។ អ៊ុយក្រែនដែលមានទុនបំរុងដ៏ធំនៃសារធាតុរ៉ែទាំងនេះ បានក្លាយជាចំណុចសំខាន់នៃការប្រកួតប្រជែងអន្តរជាតិសម្រាប់ការទទួលបានវត្ថុធាតុដើមសំខាន់ៗ។ ប្រទេសនេះត្រូវបានគេជឿថាមាន​ជាង ៥០០​ទីតាំង​នៃសារធាតុរ៉ែដ៏មានតម្លៃ ដូចជា ទីតានីញ៉ូម ម៉ង់ហ្គាណែស និងក្រាហ្វីត ជា​​ដើម៕

ដោយ៖ ឈាង