ឥណ្ឌូនេស៊ី ដាក់ឲ្យប្រើប្រាស់ឧបករណ៍ធ្វើតេស្តរកកូវីដតាមទឹកមាត់

ក្រុមហ៊ុនឱសថធំបំផុតរបស់ឥណ្ឌូនេស៊ី Kalbe Farma កាលពីថ្ងៃព្រហស្បតិ៍បានប្រកាសដាក់ឲ្យប្រើប្រាស់នូវឧបករណ៍ធ្វើតេស្តរកជំងឺកូវីដ ១៩ តាមទឹកមាត់ ។

លោកស្រី Irawati Setiady ប្រធានក្រុមហ៊ុនបាននិយាយថា ឧបករណ៍តេស្តនេះត្រូវបានបង្កើតឡើងកាលពីឆ្នាំមុន និងត្រូវបានយល់ព្រមដោយក្រសួងសុខាភិបាលក្នុងខែនេះ ។

លោកស្រីបានអះអាងថា វាមានភាពត្រឹមត្រូវជាងការធ្វើតេស្តអង់ទីហ្សែនដែលធ្វើឡើងដោយមន្ទីរពិសោធន៍ ពីព្រោះវាប្រើផលិតផលជីវសាស្ត្រ RT-LAMP គឺជាផលិតផលបច្ចេកទេសអាស៊ីតនុយក្លេអ៊ិចដែលមានជំនាញក្នុងការរកឃើញ RNA របស់វីរុស SARS-CoV-2 ។

លោកស្រី Setiady បាននិយាយនៅក្នុងសន្និសីទសារព័ត៌មានតាមអ៊ីនធឺណិតកាលពីថ្ងៃព្រហស្បតិ៍ថា “លទ្ធផលនៃការសាកល្បងព្យាបាលបានបង្ហាញថា ឧបករណ៍នេះមានសមត្ថភាពរកឃើញវីរុស ៩៤ ភាគរយ និងមានលក្ខណៈជាក់លាក់ ៩៨ ភាគរយ” ។

លោកស្រីបាននិយាយថា ការធ្វើតេស្តនេះមានផាសុកភាព និងការអនុវត្តជាក់ស្តែងជាងឧបករណ៍ដទៃទៀតនៅលើទីផ្សារ ហើយមិនត្រូវការឧបករណ៍ពិសេសណាមួយនោះទេ ។

យោងតាមមន្ត្រីផ្លូវការបានឲ្យដឹងថា វានឹងត្រូវដាក់លក់ក្រោមឈ្មោះ InnoLAMP និងមានតម្លៃ ៤៨៨,០០០ រូពីឥណ្ឌូនេស៊ី (៣៤ ដុល្លារ) ។

ទោះយ៉ាងណាលោក Akterono Dwi Budiyati អ្នកស្រាវជ្រាវដែលបានធ្វើការលើគម្រោងនេះបានព្រមានថា វាក៏អាចទទួលបានលទ្ធផលវិជ្ជមានមិនពិត ឬអវិជ្ជមានផងដែរ ពីព្រោះការធ្វើតេស្តនេះពឹងផ្អែកលើ pH នៅក្នុងទឹកមាត់ ។

ចំណែកលោក Bambang Brodjonegoro រដ្ឋមន្រ្តីស្រាវជ្រាវ និងបច្ចេកវិទ្យាឥណ្ឌូណេស៊ីបាននិយាយថា ការធ្វើតេស្តនេះអាចជួយពន្លឿនការធ្វើតេស្ត និងការតាមដានទំនាក់ទំនងនៅក្នុងតំបន់ដែលគ្មានហេដ្ឋារចនាសម្ព័ន្ធគ្រប់គ្រាន់សម្រាប់ការធ្វើតេស្តតាមវិធីសាស្ត្រ RT-PCR ។

លោកបាននិយាយថា ការធ្វើតេស្តតាមទឹកមាត់ត្រូវបានប្រើនៅក្នុងប្រទេសដទៃទៀត ហើយឧបករណ៍នេះអាចជួយជំរុញដល់ការប្រយុទ្ធប្រឆាំងនឹងជំងឺកូវីដ ១៩ នៅប្រទេសឥណ្ឌូនេស៊ី ខណៈដែលនៅពេលនេះមានករណីឆ្លងសរុបចំនួនជាង ១.៤៨ លាននាក់ក្នុងនោះមានមនុស្សស្លាប់ប្រមាណ ៤០,០០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ឥណ្ឌូនេស៊ី ដាក់ពិន័យធ្ងន់ធ្ងរចំពោះអ្នកមិនព្រមចាក់វ៉ាក់សាំងកូវីដ

ចុចអាន ៖ កូវីដ ១៩ សម្លាប់បុគ្គលិកសុខាភិបាលឥណ្ឌូនេស៊ី ៦៤៧ នាក់