​អាមេរិកឆេះព្រៃទៀតហើយ! ភ្លើងឆេះព្រៃបំផ្លាញផ្ទៃដីរាប់ពាន់ហិកតាក្នុងរដ្ឋ New Jersey

ភ្លើងឆេះព្រៃយ៉ាងសន្ធោសន្ធៅកំពុងឆាបឆេះមួយផ្នែកនៃតំបន់ព្រៃស្រល់ Pine Barrens រដ្ឋ New Jersey ហើយអាចបន្តឆេះជាច្រើនថ្ងៃ​តទៅមុខ​​ទៀត។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី២៤ខែមេសានេះ។

ភ្លើងឆេះព្រៃនេះកំពុងឆេះយ៉ាងលឿននៅ Pine Barrens​ ក្នុងរដ្ឋ New Jersey បណ្ដាលឲ្យផ្ទះជាង ១៣០០ខ្នងរងការ​គំរាម​កំហែង ហើយអ្នកស្រុកប្រហែល៥០០០នាក់ ស្ថិតនៅក្រោមការបញ្ជាជម្លៀសដោយស្ម័គ្រចិត្ត ឬជាចាំបាច់ ប៉ុន្តែបទបញ្ជា​ជម្លៀស​ទាំងអស់​ត្រូវ​បាន​ដក​ចេញ​គិត​ត្រឹម​ព្រឹក​ថ្ងៃ​ពុធ។

ភ្លើងនេះត្រូវបានភ្នាក់ងារពន្លត់អគ្គិភ័យហៅថា Jones Road Wildfire បានលេបត្របាក់ផ្ទៃដីប្រហែល៥៤៦៣ ហិកតា។ ទោះយ៉ាងណា ភ្លើងឆេះព្រៃនេះ មិនបង្កឲ្យមានអ្នករងរបួសឬស្លាប់នោះទេ ហើយគិតត្រឹមសៀលថ្ងៃពុធនេះ ភ្លើងប្រហែល ៥០% ត្រូវបានពន្លត់។

លោក Shawn LaTourette ប្រធាននាយកដ្ឋានការពារបរិស្ថានរដ្ឋ New Jersey ដែលគ្រប់គ្រងភ្នាក់ងារគ្រប់គ្រង់ភ្លើងឆេះព្រៃរបស់រដ្ឋបាននិយាយនៅក្នុងសន្និសីទសារព័ត៌មានថា ការខូចខាតត្រូវបានគេរំពឹងថានឹងកើនឡើង ប៉ុន្តែនៅក្នុងតំបន់ព្រៃឈើដែលគ្មានមនុស្សរស់នៅ។ ភ្លើងនេះទំនងក្លាយជាភ្លើងឆេះដ៏ធំបំផុតរបស់រដ្ឋ New Jersey ក្នុងរយៈពេល២០ឆ្នាំមិនធ្លាប់មាន។

គួរបញ្ជាក់ថាចាប់តាំងពីខែតុលាឆ្នាំមុន រដូវកាលនេះគឺសកម្មសម្រាប់ភ្លើងឆេះព្រៃ។ កាលពីឆ្នាំមុន មានភ្លើងឆេះព្រៃចំនួន ៣១០ បានដុតបំផ្លាញផ្ទៃដី១២៧ ហិកតា នៅទូទាំងរដ្ឋ New Jersey។ ចំណែកនៅឆ្នាំនេះរហូតមកដល់ពេលនេះ ភ្លើងឆេះព្រៃចំនួន ៦៦២ បានដុតបំផ្លាញផ្ទៃដី ៦៧០៦ ហិកតា នៅទូទាំងរដ្ឋ៕

អត្ថបទ៖ ប៊ុន សុភាព