ព័ត៌មានអន្ដរជាតិ

ជឿទេថា! គូស្នេហ៍តា-យាយនៅចិន អាយុជិត៧០ទៅហើយ អាចផ្តល់កំណើតកូនស្រីម្នាក់ដ៏គួរឲ្យស្រលាញ់

បានផុស

១ year មុន

នៅ

ថ្ងៃចន្ទ ២៨ មេសា ២០២៥

ដោយ

លោកតា Huang Weiping អាយុ៧៤ឆ្នាំរស់នៅក្នុងខេត្ត Shandong ភាគខាងកើតប្រទេសចិន ជាមួយយាយជាប្រពន្ធអាយុ៧២ឆ្នាំ ឈ្មោះថា Tian Xinju។ វាហាក់ដូចអព្ភូតហេតុនៅលើលោកនេះ ដែលពួកគេអាចមានកូនខ្ចីកាលពីនៅអាយុជិត៧០ឆ្នាំ។

លោកតាបានរៀបរាប់ថា នៅអាយុ៦៦ឆ្នាំ ភរិយារបស់គាត់បានទទួលរងនូវជំងឺដាច់សរសៃឈាមខួរក្បាល ហើយបានចាប់ផ្តើមប្រើថ្នាំរយៈពេលវែង ដើម្បីធ្វើឲ្យចរន្តឈាមប្រសើរឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមរបាយការណ៍ពីប្រព័ន្ធផ្សព្វផ្សាយចិនដីគោក បានចុះផ្សាយថា ក្នុងអំឡុងពេលនៃការព្យាបាល វដ្តរដូវរបស់ភរិយាបានដំណើរការឡើងវិញដោយមិនបានរំពឹងទុក ហើយមួយឆ្នាំក្រោយមក លោកយាយបានរកឃើញថា ខ្លួនស្រាប់តែមានផ្ទៃពោះដោយចៃដន្យ។

ប្ដីប្រពន្ធមួយគូនេះ បានសម្រេចចិត្តបន្តការសម្រាលកូនតាមធម្មជាតិ បន្ទាប់ពីទទួលបានការពិនិត្យសុខភាពយ៉ាងទៀងទាត់។ យ៉ាងណាមិញ នៅពេលនោះ កូនស្រីច្បងរបស់ពួកគេបានសម្ដែងការព្រួយបារម្ភអំពីសុខភាពរបស់ឪពុកម្ដាយ និងជំទាស់យ៉ាងដាច់អហង្ការ ចំពោះការសម្រេចចិត្តនេះ ហើយបានផ្តាច់ទំនាក់ទំនងជាមួយអ្នកមានគុណភ្លាមៗ។

ថ្វីដ្បិតតែប្រឈមការនិន្ទាជុំទិសពីអ្នកជិតខាងជាពិសេសសាច់ញាតិ ភរិយាលោកតាបានសម្រាលកូនស្រីដ៏គួរឲ្យស្រលាញ់ម្នាក់ និងបានដាក់ឈ្មោះទារកថា «Tianci» ដែលមានន័យថា «អំណោយពីព្រះ»។ នាពេលនោះ លោកតាពណ៌នាអំពីខ្លួនគាត់ថា ជាឪពុកដែលប្រកួតប្រជែងនឹងពេលវេលា ដោយប្តេជ្ញាផ្តល់ក្តីស្រឡាញ់ដល់កូនស្រីឲ្យបានច្រើនតាមដែលអាចធ្វើបាននៅឆ្នាំខាងមុខ។

គូស្នេហ៍វ័យចំណាស់នេះ បាននិយាយថា ពួកគេទទួលបានប្រាក់សោធននិវត្តន៍ជាង ១០,០០០ យន់ (១,៤០០ ដុល្លារ) ក្នុងមួយខែ ដែលវាគ្រប់គ្រាន់ដើម្បីផ្គត់ផ្គង់ដល់ការចិញ្ចឹមបីបាច់ Tianci។

ទន្ទឹមនោះដែរ លោកតាវ័យ៧៤ឆ្នាំបានប្រកាន់ខ្ជាប់នូវទម្លាប់ដែលមានសុខភាពល្អ ជាមួយនឹងការហាត់ប្រាណប្រចាំថ្ងៃ និងការចូលគេងឲ្យបានទៀងទាត់ ខណៈដែលប្រពន្ធរបស់គាត់អះអាងថា ការសម្រាលកូនបានធ្វើឲ្យគាត់មានអារម្មណ៍ក្មេងជាងវ័យទាំងរាងកាយ និងផ្លូវចិត្ត។

ឥឡូវនេះពួកគេបានកត់ត្រាដំណើរនៃការចិញ្ចឹមកូនរបស់ពួកគេតាមអ៊ីនធឺណិត ដោយទាក់ទាញអ្នកតាមដានចំនួន ១.២ លាននាក់ និងទទួលបានប្រាក់ចំណូលបន្ថែមតាមរយៈការផ្សាយបន្តផ្ទាល់។

កាលពីមួយឆ្នាំមុន លោកយាយបានធ្លាក់ពីលើគ្រែបណ្តាលឲ្យរងរបួសជើង ដោយទុកឲ្យលោកតាគ្រប់គ្រងអ្វីៗគ្រប់យ៉ាងនៅផ្ទះ រួមទាំងការចម្អិនអាហារ និងមើលថែទាំប្រពន្ធ និងកូនស្រីតូចរបស់គាត់។ ប៉ុន្តែ គាត់ពន្យល់ថា ស្នាមញញឹមរបស់កូនស្រី ផ្តល់ឲ្យគាត់នូវកម្លាំងដើម្បីតស៊ូ។ កូនស្រីបានរៀនធ្វើម្ហូប និងសម្អាតក្រោមការណែនាំរបស់ភរិយា។ គាត់ក៏បង្រៀននាងពីរបៀបរុករកជីវិត និងទំនាក់ទំនងផងដែរ។

យាងណាមិញ រឿងរាវរបស់គូស្នេហ៍វ័យចំណាស់ដែលបង្កើតកូនស្រីដ៏គួរឲ្យស្រលាញ់ បានជំរុញឲ្យមានការពិភាក្សាយ៉ាងទូលំទូលាយនៅលើបណ្តាញសង្គមនៅចិនដីគោក ឬហៅថា ចិនប៉េកាំង។ ក្រុមអ្នកលេងអ៊ីនធឺណិតជាច្រើនបញ្ចេញមតិថា ពួកគេរីករាយដែលឃើញ នាងតូច Tianci ធំឡើងនៅផ្ទះដ៏មានក្ដីស្រឡាញ់ ម្ដាយរបស់នាង ដ្បិតតែមានវ័យចាស់ស្មើលោកយាយ តែគាត់មានទំនួលខុសត្រូវជាងឪពុកម្ដាយវ័យក្មេងៗផ្សេងៗទៅទៀត៕