​​អ្នក​រងគ្រោះ​​នៅ​អគារ​រលំ​នៅ​បាងកក​កើន​៦​នាក់ទៀត ដល់​១០៩​នាក់​

ចំនួនអ្នករងគ្រោះដោយសារការរញ្ជួយដីដួលរលំអគារការិយាល័យ​សវនកម្មរដ្ឋនៅខណ្ឌ Chatuchak ទីក្រុងបាងកកកាលពីថ្ងៃទី២៨ ខែមីនា ឆ្នាំ២០២៥ ​​បាន​កើន​ចំនួន៦​នាក់​ទៀត បន្ថែម​ពី​លើ​ចំនួន​​ដែលធ្លាប់​ប្រកាស​​កាល​ពី​មុន​​​ត្រឹម​១០៣​នាក់ បន្ទាប់​ពី​មាន​​​សាច់ញាតិ​របស់​ជន​រងគ្រោះ​បាន​​មក​ដាក់​ពាក្យ​បណ្តឹង​រាយការណ៍​។

​តាមសេចក្តី​រាយការណ៍​របស់​សារ​ព័ត៌មាន​ថៃ naewna ​ជនរងគ្រោះ​សរុបទាំងអស់​អាជ្ញាធរ​បាន​ទទួល​​ការដាក់​ពាក្យ​ប្តឹង​មាន​ចំនួន១០៩នាក់ ក្នុងនោះសាកសពដែលនៅបាត់ខ្លួនចំនួន​១៤​នាក់​ទៀត ដែល​ក្រុមការងារជួយសង្គ្រោះបាននិងកំពុងបន្តស្វែងរកឱ្យបានឆាប់ជាបន្ទាន់។

នៅថ្ងៃទី៤ ខែឧសភា ឆ្នាំ២០២៥ លោកសាស្ត្រាចារ្យបណ្ឌិត Thawida Kamolwet អភិបាលរងក្រុងបាងកក រួមជាមួយលោក Suriyachai Rawiwan ប្រធានការិយាល័យបង្ការនិងកាត់បន្ថយគ្រោះមហន្តរាយទីក្រុងបាងកក និងលោកវរសេនីយ៍ឯក Wanphen Duangpan នាយការិយាល័យកោសល្យវិច្ច័យនៃស្នងការដ្ឋានក្រុងបាងកកបានរួមគ្នាធ្វើសន្និសីទសារព័ត៌មានដើម្បីកែតម្រូវចំនួនអ្នករងគ្រោះដោយសារការរញ្ជួយដីដួលរលំអគារការិយាល័យ​សវនកម្មរដ្ឋនៅខណ្ឌ Chatuchak ទីក្រុងបាងកកកាលពីថ្ងៃទី២៨ ខែមីនា។

អភិបាលរងក្រុងបាងកក លោកសាស្ត្រាចារ្យបណ្ឌិត Thawida Kamolwet បាននិយាយថា ខណៈដែលសាច់ញាតិអ្នករងគ្រោះបានមករាយការណ៍អំពីអ្នកបាត់ខ្លួននៅប៉ុស្តិ៍នគរបាលបាងសឺ (Bang Sue) ខណ្ឌ Chatuchak ទីក្រុងបាងកក ដែលពីមុនមានតួលេខអ្នករងគ្រោះសរុបចំនួន១០៣នាក់ ប៉ុន្តែថ្មីៗ​នេះ​មាន​សាច់​ញាតិអ្នក​បាត់​ខ្លួនបានមករាយការណ៍​ចំនួន៦នាក់បន្ថែម​ទៀត ដែលធ្វើឱ្យចំនួនអ្នករងគ្រោះនិងចំនួនអ្នកបាត់ខ្លួនបានកើនឡើងរហូតដល់១០៩នាក់។

សារព័ត៌មានថៃ naewna បានរាយការណ៍ដោយដកស្រង់ការប្រកាសរបស់មជ្ឈមណ្ឌល​បញ្ជា​ការ​គ្រប់គ្រងការជួយសង្គ្រោះដែលបានស្នើសុំធ្វើការកែតម្រូវចំនួនតួលេខអ្នករងគ្រោះគិតត្រឹមម៉ោង១២ថ្ងៃត្រង់ ថ្ងៃទី៤ ខែឧសភា ឆ្នាំ២០២៥ថា ចំនួនជនរងគ្រោះបានកើនឡើងដល់១០៩នាក់ ពីចំនួនដើម១០៣នាក់ ដោយក្នុងនោះមានអ្នកស្លាប់ចំនួន៨៦នាក់ អ្នករងរបួសចំនួន៩នាក់ និងបាត់ខ្លួនចំនួន១៤នាក់ពីចំនួនដើម៨នាក់ក្រុមការងារជួយសង្គ្រោះបាននិងកំពុងបន្តស្វែងរកឱ្យបានឆាប់ជាបន្ទាន់។ ចំណែកការកំណត់អត្តសញ្ញាណសាកសពតាមរយៈការពិនិត្យ DNA ត្រូវបានប្រមូលភស្តុតាងពីសាច់ញាតិអ្នករងគ្រោះផ្ទាល់ចំនួន១០០នាក់ហើយ ដើម្បីផ្ទៀតផ្ទាត់ជាមួយសាកសព៕

ដោយ ភ្នាក់ងារ​

ចំនួន​ជនរងគ្រោះ​ក្នុងអគារ​រលំបាក់​នៅ​បាងកក​។