ព័ត៌មានអន្ដរជាតិ

រដ្ឋបាល ត្រាំ ប្រកាសឲ្យលុយ ១ ០០០ដុល្លារដល់ជនអន្តោប្រវេសន៍ខុសច្បាប់សម្រាប់ការនិរទេសដោយខ្លួនឯង

បានផុស

១ year មុន

នៅ

ថ្ងៃអង្គារ ៦ ឧសភា ២០២៥

ដោយ

Chheang

រដ្ឋបាលលោក ដូណាល់ ត្រាំ បានណែនាំកម្មវិធីថ្មីដែលផ្តល់ប្រាក់ចំនួន ១ ០០០ដុល្លារដល់ជនអន្តោប្រវេសន៍ដែលគ្មានឯកសារត្រឹមត្រូវ សម្រាប់ការស្ម័គ្រចិត្តចាកចេញពីទឹកដីសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្ម័គ្រចិត្តនិរទេសដោយខ្លួនឯងនេះ នឹងត្រូវធ្វើឡើងតាមរយៈកម្មវិធីទូរសព្ទមួយហៅថា CBP Home របស់ក្រសួងសន្តិសុខមាតុភូមិ ដែលដាក់ឲ្យប្រើប្រាស់កាលពីថ្ងៃទី៥ខែឧសភាឆ្នាំ២០២៥។

ដើមឡើយ កម្មវិធីនេះបានបើកដំណើរការជា CBP One ក្នុងអំឡុងពេលរដ្ឋបាលរបស់អតីតប្រធានាធិបតីអាមេរិកលោក ចូ បៃដិន ដើម្បីគ្រប់គ្រង និងតាមដានសិទ្ធិជ្រកកោនជនអន្តោប្រវេសន៍។ យ៉ាងណា កម្មវិធីនេះត្រូវបានប្តូរឈ្មោះ និងរចនាឡើងវិញក្រោមរដ្ឋបាលលោក ត្រាំ សម្រាប់ឲ្យជនអន្តោប្រវេសន៍ខុសច្បាប់ធ្វើការនិរទេសខ្លួនដោយស្ម័គ្រចិត្ត។ តាមរយៈកម្មវិធី CBP Home ជនអន្តោប្រវេសន៍អាចដាក់ពាក្យដើម្បីចាកចេញ រៀបចំការធ្វើដំណើរ និងទទួលបានជំនួយហិរញ្ញវត្ថុនៅពេលត្រឡប់ទៅកាន់ប្រទេសកំណើតរបស់ពួកគេវិញ។ ក្រសួងសន្តិសុខមាតុភូមិ នឹងរ៉ាប់រងថ្លៃធ្វើដំណើរ ហើយអ្នកដែលដាក់ពាក្យរួចនឹងមិនត្រូវបានអាជ្ញាធរចាប់ខ្លួនឡើយ ខណៈពេលកំពុងរៀបចំការចាកចេញរបស់ពួកគេ។

រដ្ឋមន្ត្រីសន្តិសុខមាតុភូមិ លោកស្រី Kristi Noem បានសង្កត់ធ្ងន់លើប្រសិទ្ធភាពនៃការចំណាយរបស់កម្មវិធីនេះ ដោយកត់សម្គាល់ថា ដំណើរការនិរទេសពីមុនមានតម្លៃជាមធ្យម ១៧ ១២១ដុល្លារក្នុងការចាប់ខ្លួន និងបញ្ជូនជនអន្តោប្រវេសន៍ខុសច្បាប់ម្នាក់ទៅប្រទេសកំណើតវិញ។ លោកស្រី Noem បាននិយាយថា៖ «ការនិរទេសខ្លួនឯងគឺជាជម្រើសដ៏ល្អបំផុត សុវត្ថិភាពបំផុត និងមានប្រសិទ្ធភាពបំផុត»។ រដ្ឋមន្ត្រីសន្តិសុខមាតុភូមិ បានប៉ាន់ប្រមាណថា កម្មវិធីនេះអាចកាត់បន្ថយចំណាយលើការនិរទេសបានប្រមាណ ៧០%។

ប្រធានាធិបតី ត្រាំ បានផ្សព្វផ្សាយគំនិតផ្តួចផ្តើមនេះជាផ្នែកមួយនៃយុទ្ធនាការទូលំទូលាយ ដើម្បីអនុវត្តច្បាប់អន្តោប្រវេសន៍កាន់តែតឹងរ៉ឹង។ នៅក្នុងសារវីដេអូថ្មីៗនេះ លោក ត្រាំ បានជំរុញឲ្យជនអន្តោប្រវេសន៍ដែលគ្មានឯកសារប្រើប្រាស់កម្មវិធី CBP Home ដោយព្រមានថា ការបរាជ័យក្នុងការធ្វើដូច្នេះនឹងបណ្តាលឲ្យមានការចាប់ខ្លួននិរទេស និងត្រូវហាមឃាត់មិនឲ្យចូលទឹកដីអាមេរិកជាអចិន្ត្រៃយ៍៕