ប៉ាគីស្ថាន ផ្តាំទៅឥណ្ឌា ឲ្យត្រៀមខ្លួនទទួលការសងសឹក ជាមួយកម្លាំងដ៏ខ្លាំងអស្ចារ្យ

ក្នុងសុន្ទរថាពេលរាត្រី នាយករដ្ឋមន្ត្រីប៉ាគីស្ថាន Shehbaz Sharif បានប្តេជ្ញាឆ្លើយតបនិងផ្តាំទៅឥណ្ឌា ឲ្យត្រៀមខ្លួនទទួលការសងសឹកជាមួយកម្លាំងដ៏ខ្លាំងអស្ចារ្យ ចំពោះការដែលទីក្រុងញូវដែលី វាយប្រហារឆ្លងដែន សម្លាប់ជនស៊ីវិល៣១នាក់នៅតំបន់កាស្មៀរ កាលពីថ្ងៃពុធទី៧ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបែបនេះ លោកមិនបញ្ជាក់ពីពេលវេលានិងទីតាំងនៃការសងសឹកនោះទេ ដោយនិយាយថា បើប៉ាគីស្ថានចង់បាញ់ទីណាឬពេលណា គឺស្រេចលើខ្លួន។

យ៉ាងណាក៏ដោយ បើយោងតាមរដ្ឋមន្ត្រីការពារជាតិប៉ាគីស្ថាន Khawaja Asif, ទីក្រុងអ៊ីស្លាម៉ាបាដ ទំនងជានឹងវាយប្រហារតែលើគោលដៅយោធាក្នុងប្រទេសឥណ្ឌាប៉ុណ្ណោះ មិនមែនគោលដៅស៊ីវិលទេ ព្រោះខ្លួនគោរពច្បាប់អន្តរជាតិ។

សុន្ទរកថារបស់លោក Sharif កើតឡើងប៉ុន្មានម៉ោង បន្ទាប់ពីនាយករដ្ឋមន្ត្រីរូបនេះបើកដៃឲ្យកងទ័ពប៉ាគីស្ថាន ចាត់វិធានការសងសឹកឥណ្ឌាវិញ ដោយការិយាល័យរបស់លោកបានចេញសេចក្តីថ្លែងការណ៍មួយថា «ស្របតាមមាត្រា៥១ នៃធម្មនុញ្ញអង្គការសហប្រជាជាតិ, ប៉ាគីស្ថានសូមរក្សាសិទ្ធិក្នុងការឆ្លើយតបដើម្បីការពារខ្លួនក្នុងពេល ទីកន្លែង និងរបៀបដែលខ្លួននឹងសម្រេចចិត្ត ដើម្បីសងសឹកចំពោះការបាត់បង់ជីវិតជនជាតិប៉ាគីស្ថានស្លូតត្រង់ និងការរំលោភលើអធិបតេយ្យភាពរបស់ខ្លួន។ កងកម្លាំងប្រដាប់អាវុធនៃប្រទេសប៉ាគីស្ថាន ត្រូវបានអនុញ្ញាតឲ្យធ្វើសកម្មភាពឆ្លើយតបទៅវិញហើយ»។

សូមជម្រាបជាថ្មី នៅថ្ងៃពុធទី៧ខែឧសភាឆ្នាំ២០២៥ ឥណ្ឌាបានបើកប្រតិបត្តិការយោធា «Sindoor» ដោយកំណត់គោលដៅលើជំរំភេរវករនៅក្នុងទឹកដីប៉ាគីស្ថាន ឆ្លើយតបទៅការបាញ់សម្លាប់អ្នកទេសចរហិណ្ឌូ២៦នាក់ នៅតំបន់កាស្មៀរ កាលពីថ្ងៃទី២២ខែមេសា។

ក្នុងការវាយប្រហារទាំងនោះ ឥណ្ឌាអះអាងថា​បានចាយពេលអស់២៥នាទី ហើយកម្ទេចគោលដៅបានយ៉ាងជោគជ័យ។

ទោះបីជាយ៉ាងណាក៏ដោយ ប៉ាគីស្ថាន ក៏បានបាញ់ទម្លាក់យន្តហោះចម្បាំងឥណ្ឌាចំនួន៥គ្រឿងនិងដ្រូនមួយគ្រឿងផងដែរ ដូចជាយន្តហោះ​ចម្បាំង Rafale ផលិត​ដោយ​បារាំង​ចំនួន៣គ្រឿង, យន្តហោះ​ចម្បាំង MiG-29 មួយ​គ្រឿងនិង​យន្តហោះ​ចម្បាំង SU-30 មួយ​គ្រឿង ចំណែកដ្រូននោះគឺជាប្រភេទ Heron ខណៈមកទល់ពេលនេះ ស្ថានការណ៍កាន់តែឡើងកម្តៅថែមទៀត ឈានដល់ក្តីបារម្ភផ្ទុះសង្គ្រាមធំ៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន បើកដៃឲ្យកងទ័ព សងសឹកទៅឥណ្ឌាវិញហើយ