ឥណ្ឌា៖ «បើចង់ដឹងថា សង្គ្រាមនុយក្លេអ៊ែរផ្ទុះឬអត់ ទៅសួរប៉ាគីស្ថានទៅ»

ឆ្លើយសំណួរអ្នកសារព័ត៌មានថាតើ មានលទ្ធភាពដែលឬទេថា ជម្លោះរវាងទីក្រុងញូវដែលីនិងអ៊ីស្លាម៉ាបាដ អាចឈានដល់ការផ្ទុះសង្គ្រាមនុយក្លេអ៊ែរនោះ? ឯកអគ្គរដ្ឋទូតឥណ្ឌាប្រចាំសហរដ្ឋអាមេរិកលោក Vinay Kwatra ឆ្លើយថា៖ «បើចង់ដឹង អ្នកគួរតែទៅសួរខាងប៉ាគីស្ថានវិញទៅ»។ 

លោកឆ្លើយបែបនេះក្នុងបទសម្ភាសជាមួយ CNN នៅថ្ងៃសុក្រទី៩ខែឧសភាឆ្នាំ២០២៥ ប៉ុន្តែអះអាងថាសកម្មភាពរបស់ខ្លួនលើប៉ាគីស្ថាន គឺគ្រាន់តែជា «សង្គ្រាមប្រឆាំងក្រុមភេរវកម្ម» ប៉ុណ្ណោះ។

តាមការលើកឡើងរបស់លោក Kwatra, ប្រទេសទាំងពីរគឺសុទ្ធតែមានអាវុធនុយក្លេអ៊ែររៀងៗខ្លួន ប៉ុន្តែបើចង់ដឹងថាតើជម្លោះនេះអាចឈានដល់កម្រិតកើតសង្គ្រាមនុយក្លេអ៊ែរដែរឬអត់នោះ សូមសួរទៅខាងប៉ាគីស្ថានទៅ។ 

លោកសង្កត់ធ្ងន់ថា​ ប៉ាគីស្ថានទេដែលជាអ្នកផ្តើមឲ្យមានការប្រឈមមុខដាក់គ្នាខ្លាំងបែបនេះ ហើយឥណ្ឌា គ្រាន់តែឆ្លើយតបទៅនឹងសកម្មភាពរបស់ទីក្រុងអ៊ីស្លាម៉ាបាដប៉ុណ្ណោះ។

សម្តីរបស់លោក Kwatra កើតឡើងបន្ទាប់ពី ទីក្រុងអ៊ីស្លាម៉ាបាដ ព្រមានថា សង្គ្រាមនុយក្លេអ៊ែរ អាចកើតឡើងគ្រប់ពេលវេលា។

រដ្ឋមន្ត្រីការពារជាតិប៉ាគីស្ថាន Khawaja Asif បានប្រាប់ទៅទូរទស្សន៍ Geo News កាលពីរាត្រីថ្ងៃពុធទី៧ខែឧសភាថា «បើឥណ្ឌា បង្កាត់ភ្លើងសង្រ្គាមធំក្នុងតំបន់នេះមែន ហើយបង្កជាគ្រោះថ្នាក់នោះ សង្រ្គាមនុយក្លេអ៊ែរអាចផ្ទុះឡើងគ្រប់ពេល។ បើឥណ្ឌាបង្ករឿងកាន់តែធំ ឈានដល់ការបង្ខំឲ្យភាគីទាំងសងខាងនឹកដល់ការប្រើអាវុធនុយក្លេអ៊ែរនោះ ឥណ្ឌានឹងជាអ្នកទទួលខុសត្រូវចំពោះរឿងនេះ»។

សូមជម្រាបជាថ្មី ឥណ្ឌាបានបើកប្រតិបត្តិការ «Sindoor» នៅថ្ងៃទី៧ខែឧសភាឆ្នាំ២០២៥ ដោយកំណត់គោលដៅលើជំរំភេរវករនៅទីតាំងចំនួន៩កន្លែង ប៉ុន្តែជាបែរជាសម្លាប់ជនស៊ីវិល៣១នាក់ទៅវិញ នៅក្នុងទឹកដីកាស្មៀរខាងប៉ាគីស្ថាន ហើយក្នុងនោះក៏រួមមានទាំងកុមារផងដែរ។ 

ក្រោយមក ភាពតានតឹងរវាងអ្នកជិតខាងអាស៊ីខាងត្បូងទាំងពីរនេះ បានឡើងកម្តៅក្តៅបំផុត ប្រៀបបាននឹងគ្រាប់បែកដែលហៀបនឹងផ្ទុះ៕

អត្ថបទ៖ សុខ សុវណ្ណ

ចុចអាន៖ មានការវាយប្រហារលើមូលដ្ឋានទ័ពឥណ្ឌា ៣កន្លែង តែប៉ាគីស្ថាន បដិសេធថា ខ្លួនមិនដឹងអីទេ