មានការវាយប្រហារលើមូលដ្ឋានទ័ពឥណ្ឌា ៣កន្លែង តែប៉ាគីស្ថាន បដិសេធថា ខ្លួនមិនដឹងអីទេ

ប្រទេសឥណ្ឌា បញ្ជាក់ថា មូលដ្ឋានទ័ពរបស់ខ្លួន៣កន្លែង ត្រូវរងការវាយប្រហារដោយមីស៊ីលនិងដ្រូន កាលពីថ្ងៃព្រហស្បតិ៍ទី៨ខែឧសភាឆ្នាំ២០២៥ ខណៈទីក្រុងញូវដែលី ចោទថា វាជាស្នាដៃរបស់ទីក្រុងអ៊ីស្លាម៉ាបាដ ដ្បិតប៉ាគីស្ថាន ចេញមុខបដិសេធហើយថា ខ្លួនមិនដឹងរឿងអ្វីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ការវាយប្រហារនោះគឺកំណត់គោលដៅលើមូលដ្ឋានចំនួន២ក្នុងតំបន់ Jammu និង Udhampur ដែលស្ថិតនៅតំបន់កាស្មៀរ និងមូលដ្ឋានមួយកន្លែងទៀតនៅតំបន់ Pathankot ក្នុងរដ្ឋ Punjab។

ទោះបីជាយ៉ាងណាក៏ដោយ រដ្ឋមន្ត្រីការពារជាតិប៉ាគីស្ថាន Khawaja Asif ច្រានចោលការចោទប្រកាន់របស់ឥណ្ឌានិងបដិសេធថា ខ្លួនមិនមែនជាអ្នកវាយប្រហារទេ។

ស្ថានការណ៍ចុងក្រោយនេះ កើតឡើងចំពេលភាពតានតឹងរវាងប្រទេសជិតខាងប្រដាប់ដោយអាវុធនុយក្លេអ៊ែរទាំងពីរ បានឡើងដល់កម្រិតខ្ពស់បំផុត ក្រោយពេលឥណ្ឌា ចាប់ផ្តើមប្រតិបត្តិការ Sindoor វាយប្រហារប៉ាគីស្ថាន ឆ្លើយតបទៅអំពើភេរវកម្មនៅតំបន់កាស្មៀរ ដែលផ្តាច់ជីវិតទេសចរ២៦នាក់។

ឥណ្ឌាអះអាងថា ប្រតិបត្តិការនេះកំណត់គោលដៅលើជំរំភេរវករ៩កន្លែង ដោយត្រឹមមួយថ្ងៃពុធបានបណ្តាលឲ្យជនស៊ីវិល៣១នាក់ស្លាប់ នៅក្នុងទឹកដីកាស្មៀរខាងប៉ាគីស្ថាន ហើយក្នុងនោះក៏រួមមានទាំងកុមារផងដែរ។ ក្រោយមក ប៉ាគីស្ថាន ក៏គំរាមសងសឹកវិញ ដោយថានឹងវាយប្រហារទីតាំងឬពេលណាក៏បាន ស្រេចតែខ្លួនចង់។

ចាប់តាំងពីពេលនោះមក ភាពតានតឹងរវាងប្រទេសអាស៊ីខាងត្បូងទាំងពីរ ចេះតែឡើងកម្តៅក្តៅទៅៗ ដោយមានការគំរាមបាញ់សងសឹកគ្នាទៅវិញទៅមក ឈានដល់ការព្រមានផ្ទុះសង្គ្រាមនុយក្លេអ៊ែរទៀតផង។

ទោះបីជាយ៉ាងណាក៏ដោយ បណ្តាមេដឹកនាំនៅលើពិភពលោក បានចេញការអំពាវនាវព្រោងព្រាតឲ្យប្រជាជាតិទាំងពីររក្សាភាពអត់ធ្មត់ខ្លាំងបំផុតនិងធ្វើការដើម្បីបន្ថយភាពតានតឹង ខណៈភ័យថា សង្គ្រាមអាចរីកធំបើភាគីណាមួយ សាងកំហុសតែបន្តិច៕

អត្ថបទ៖ សុខ សុវណ្ណ

ចុចអាន៖ ឥណ្ឌា អះអាង​ថា ខ្លួន​សម្លាប់​ភេរវករ​ហោចណាស់​ ១០០​នាក់ ក្នុង​ប្រតិបត្តិការ Sindoor