ព័ត៌មានអន្ដរជាតិ

កាន់តែមិនស្រួលខ្លាំង! ប៉ាគីស្ថាន កោះហៅមន្ត្រីនុយក្លេអ៊ែរ មកប្រជុំគ្នា ក្រោយបាញ់មីស៊ីលសងសឹកឥណ្ឌា

បានផុស

១ year មុន

នៅ

ថ្ងៃសៅរ៍ ១០ ឧសភា ២០២៥

ដោយ

ស្ថានការណ៍រវាងទីក្រុងញូវដែលីនិងអ៊ីស្លាម៉ាបាដ បានឡើងកម្តៅថែមមួយកម្រិតទៀត បន្ទាប់ពីប៉ាគីស្ថាន បាញ់មីស៊ីលសងសឹកទៅឥណ្ឌាវិញ ហើយនៅថ្ងៃសៅរ៍ទី១០ខែឧសភា នាយករដ្ឋមន្ត្រីប៉ាគីស្ថាន Shehbaz Sharif បានកោះប្រជុំមន្ត្រីផ្នែកនុយក្លេអ៊ែរ ដើម្បីពិភាក្សាអំពីបញ្ហាសន្តិសុខជាតិ។

នាយករដ្ឋមន្ត្រីប៉ាគីស្ថាន Shehbaz Sharif (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, លោក Sharif បានកោះប្រជុំអាជ្ញាធរបញ្ជាការជាតិ ស្របពេលយោធារបស់ខ្លួនបើកប្រតិបត្តិការ «Bunyanun Marsoos» សងសឹកទៅឥណ្ឌាវិញ ដែលកាលពីថ្ងៃពុធបានវាយប្រហារតំបន់កាស្មៀរ សម្លាប់ជនស៊ីវិល ៣១នាក់ក្នុងប្រតិបត្តិការ «Sindoor» ដ្បិតអះអាងថា នោះគឺកំណត់គោលដៅលើជំរំក្រុមភេរវករក៏ដោយ។

អាជ្ញាធរបញ្ជាការជាតិនេះ គឺមានតួនាទីទទួលខុសត្រូវលើកម្លាំងក៏ដូចជាអាវុធនុយក្លេអ៊ែររបស់ប៉ាគីស្ថាន ប៉ុន្តែមិនមានការចែលរំលែកព័ត៌មានឡើយថាតើ កិច្ចប្រជុំនោះមានពិភាក្សាលើបញ្ហាអ្វីខ្លះ?

អាវុធនុយក្លេអ៊ែររបស់ប៉ាគីស្ថាន (រូបថត៖ AP)

ទន្ទឹមនឹងជំនួបនោះ យោធាប៉ាគីស្ថានអះអាងថា ខ្លួនបានបាញ់មីស៊ីលកំណត់គោលដៅលើមូលដ្ឋានទ័ពអាកាសឥណ្ឌាទាំងអស់ ដែលសុទ្ធសឹងជាកន្លែងទីក្រុងញូវដែលីប្រើដើម្បីបាញ់មីស៊ីលដាក់ខ្លួនថ្ងៃមុន។

សូមជម្រាបជា កាលពីថ្ងៃទី៧ខែឧសភា ឥណ្ឌាបានបើកប្រតិបត្តិការ «Sindoor» ដោយផ្តោតលើអ្វីដែលខ្លួនបានពិពណ៌នាថាជាហេដ្ឋារចនាសម្ព័ន្ធភេរវករនៅក្នុងប្រទេសប៉ាគីស្ថាន បន្ទាប់ពីភាពតានតឹងត្រូវបានបង្កឡើងដោយការវាយប្រហារភេរវកម្មនៅតំបន់កាស្មៀរគ្រប់គ្រងដោយឥណ្ឌាកាលពីថ្ងៃទី២២ខែមេសា ដែលសម្លាប់មនុស្ស ២៦នាក់។

ឥណ្ឌាអះអាងថា ការវាយប្រហារនោះបានសម្លាប់ពួកសកម្មប្រយុទ្ធយ៉ាងតិច១០០នាក់ ខណៈប៉ាគីស្ថានបានបញ្ជាក់តែពីរបាយការណ៍ស្លាប់របស់ជនស៊ីវិលប៉ុណ្ណោះ និងបានប្រកាសសងសឹកវិញ៕

អត្ថបទ៖ សុខ សុវណ្ណ

ចុចអាន៖ ក្រុមប្រទេស G7 ជំរុញឲ្យឥណ្ឌា-ប៉ាគីស្ថានចូលរួមក្នុងកិច្ចសន្ទនាដោយផ្ទាល់