ប៉ាគីស្ថាន បាញ់ផ្លោងសម្លាប់មន្ត្រីជាន់ខ្ពស់ឥណ្ឌានៅ តំបន់កាស្មៀរ

ប្រទេសឥណ្ឌា បានបញ្ជាក់ពីការស្លាប់មន្ត្រីជាន់ខ្ពស់មួយរូបនៅតំបន់កាស្មៀរដោយសារតែការបាញ់ផ្លោងរបស់ប៉ាគីស្ថាន កាលពីថ្ងៃសុក្រទី៩ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មាននេះត្រូវបានបញ្ជាក់ដោយអភិបាលតំបន់ចាមមូកាស្មៀរលោក Omar Abdullah ដែលបង្ហោះលើបណ្តាញសង្គម X ថា ស្នងការរងក្រុង Rajouri លោក Raj Kumar Thapa បានបាត់បង់ជីវិតព្រោះតែការបាញ់ផ្លោងពីសំណាក់ប៉ាគីស្ថាន។ លំនៅដ្ឋានរបស់មន្ត្រី ត្រូវប៉ាគីស្ថានបាញ់ផ្លោងមកចំ ខ្ញុំពិតជាតក់ស្លុតនិងសោកសៅយ៉ាងពន់ពេក ចំពោះការបាត់បង់ជីវិតមនុស្សដ៏គួរឲ្យភ័យខ្លាចបែបនេះ»។

ការអះអាងរបស់លោក Abdullah កើតឡើងចំពេល ប៉ាគីស្ថានបើកប្រតិបត្តិការ «Bunyanun Marsoos» សងសឹកទៅឥណ្ឌាវិញ បន្ទាប់ពីទីក្រុងញូវដែលី វាយប្រហារតំបន់កាស្មៀរ សម្លាប់ជនស៊ីវិល ៣១នាក់ក្នុងប្រតិបត្តិការ «Sindoor»។

នៅថ្ងៃសៅរ៍ ប៉ាគីស្ថានបានចោទប្រកាន់ឥណ្ឌាថា បើកការវាយប្រហារដោយមីស៊ីលទៅលើមូលដ្ឋានទ័ពអាកាសចំនួនបីរបស់ខ្លួន​ ដែលនេះគឺជាការប្រឈមមុខដាក់គ្នាយ៉ាងធ្ងន់ធ្ងរបំផុតមួយរវាងប្រទេសជិតខាងប្រដាប់អាវុធនុយក្លេអ៊ែរទាំងពីរក្នុងរយៈពេលជាច្រើនទសវត្សរ៍មកនេះ។

យោងតាមយោធាប៉ាគីស្ថាន មូលដ្ឋានទ័ពអាកាសដែលជាគោលដៅ​របស់​ឥណ្ឌា មាន​មូលដ្ឋានអាកាស Nur Khan នៅជិតទីក្រុងអ៊ីស្លាម៉ាបាដ, មូលដ្ឋានអាកាស Murid នៅ​ទីក្រុង Chakwal និងមូលដ្ឋានអាកាស Rafiqui នៅស្រុក Jhang នៃខេត្ត Punjab ភាគខាងកើត។

យោធា​ប៉ាគីស្ថាន​និយាយថា មីស៊ីល​ភាគច្រើនត្រូវបានស្ទាក់ចាប់ដោយប្រព័ន្ធការពារដែនអាកាស ប៉ុន្តែខ្លះបានបង្កការខូចខាត ដែលនាំឲ្យមានភាពតានតឹងកាន់តែខ្លាំងនៅក្នុងតំបន់។

ជាការឆ្លើយតបទៅនឹងការវាយប្រហារដោយមីស៊ីល​នេះ ប៉ាគីស្ថានបានបើក​ការ​វាយ​ប្រតិបត្តិការ​សងសឹក​វិញភ្លាមៗ​នៅ​ទីតាំង​ជា​ច្រើន​កន្លែង​របស់​ឥណ្ឌា រួមទាំងអាកាសយានដ្ឋាន Pathankot ស្ថានីយ៍ទ័ពអាកាស Udhampur និងទីតាំងមីស៊ីល BrahMos ផងដែរ៕

អត្ថបទ៖ សុខ សុវណ្ណ

ចុចអាន៖ កាន់តែមិនស្រួលខ្លាំង! ប៉ាគីស្ថាន កោះហៅមន្ត្រីនុយក្លេអ៊ែរ មកប្រជុំគ្នា ក្រោយបាញ់មីស៊ីលសងសឹកឥណ្ឌា