ព័ត៌មានអន្ដរជាតិ

រឿង៣សំខាន់ៗក្នុងដំណើរទស្សនកិច្ចរបស់លោក ត្រាំ នៅមជ្ឈិមបូព៌ា

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

Chheang

នៅថ្ងៃអង្គារទី១៣ខែឧសភាឆ្នាំ២០២៥នេះ លោកប្រធានាធិបតីអាមេរិក ដូណាល់ ត្រាំ បានចាប់ផ្ដើមដំណើរទស្សនកិច្ចរយៈពេលបួនថ្ងៃនៅតំបន់មជ្ឈិមបូព៌ា ដោយផ្តោតលើការធានាកិច្ចព្រមព្រៀងសេដ្ឋកិច្ចសំខាន់ៗ និងការពង្រឹងសម្ព័ន្ធភាពនយោបាយ។ ក្នុងដំណើរទស្សនកិច្ចនេះ មេដឹកនាំអាមេរិកនឹងទៅកាន់ប្រទេសអារ៉ាប៊ីសាអូឌីត កាតា និងអារ៉ាប់រួម (UAE) ដោយមានគោលបំណងសំខាន់ៗចំនួន៣ធំៗ ដូចខាងក្រោម៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

💰កិច្ចព្រមព្រៀងសេដ្ឋកិច្ចសំខាន់ៗ

អារ៉ាប៊ីសាអូឌីត៖ លោក ត្រាំ មានគោលបំណងបង្កើនការវិនិយោគរបស់អារ៉ាប៊ីសាអូឌីតនៅសហរដ្ឋអាមេរិកដល់ទៅ ១ទ្រីលានដុល្លារ ដោយផ្អែកលើការកិច្ចព្រមព្រៀងដែលមានស្រាប់ចំនួន ៦០០ពាន់លានដុល្លារ។ ការពិភាក្សាក៏កំពុងដំណើរការសម្រាប់កញ្ចប់សព្វាវុធដ៏សំខាន់ដែលមានតម្លៃលើសពី ១០០ពាន់លានដុល្លារ រួមទាំងកិច្ចព្រមព្រៀងមីស៊ីលចំនួន ៣,៥ពាន់លានដុល្លារផងដែរ។
អេមីរ៉ាតអារ៉ាប់រួម៖ អេមីរ៉ាតអារ៉ាប់រួមបានប្តេជ្ញាចិត្តវិនិយោគចំនួន ១,៤ទ្រីលានដុល្លារក្នុងរយៈពេលមួយទសវត្សរ៍ខាងមុខ។
កាតា៖ កាតាត្រូវបានគេរំពឹងថានឹងប្រកាសកិច្ចព្រមព្រៀងដែលមានតម្លៃសរុបពី ២០០ ទៅ ៣០០ពាន់លានដុល្លារ ពាក់ព័ន្ធនឹងការទិញយន្តហោះពីក្រុមហ៊ុន Boeing និងការទិញយន្តហោះគ្មានមនុស្សបើក MQ-9 Reaper តម្លៃ ២ពាន់លានដុល្លារ។

កិច្ចព្រមព្រៀងទាំងនេះ បញ្ជាក់ពីការផ្លាស់ប្តូរយុទ្ធសាស្ត្រឆ្ពោះទៅរកវិស័យបច្ចេកវិទ្យាខ្ពស់ ដោយប្រទេសឈូងសមុទ្រទាំងនោះបង្ហាញពីចំណាប់អារម្មណ៍យ៉ាងខ្លាំងចំពោះបញ្ញាសិប្បនិម្មិត និងបច្ចេកវិទ្យាទំនើបរបស់អាមេរិកដើម្បីធ្វើពិពិធកម្មសេដ្ឋកិច្ចរបស់ពួកគេ។

🏛️ កិច្ចប្រជុំកំពូលរដ្ឋឈូងសមុទ្រ និងការចូលរួមការទូត

លោក ត្រាំ កំពុងចូលរួមក្នុងកិច្ចប្រជុំកំពូលក្រុមប្រឹក្សាសហប្រតិបត្តិការឈូងសមុទ្រក្នុងទីក្រុងរីយ៉ាដ ដោយមានការចូលរួមជាមួយមេដឹកនាំមកពីប្រទេសអារ៉ាប៊ីសាអូឌីត កាតា និងអារ៉ាប់រួម។ របៀបវារៈនៃកិច្ចប្រជុំកំពូលនេះ រួមមានការពិភាក្សាអំពីសន្តិសុខក្នុងតំបន់ កិច្ចសហប្រតិបត្តិការសេដ្ឋកិច្ច និងកិច្ចខិតខំប្រឹងប្រែងធ្វើឲ្យប្រសើរឡើងនូវទំនាក់ទំនងរវាងរដ្ឋអារ៉ាប់ និងអ៊ីស្រាអែល។

🌍 ការប្តូរឈ្មោះឈូងសមុទ្រពែក្ស

ស្របតាមការចង់បានរបស់រដ្ឋអារ៉ាប់ លោក ត្រាំ គ្រោងនឹងប្រកាសថា សហរដ្ឋអាមេរិកនឹងប្ដូរពីការហៅ «ឈូងសមុទ្រពែរ្ស» ទៅជា «ឈូងសមុទ្រអារ៉ាប់» វិញ។ ការសម្រេចចិត្តនេះ បានជំរុញឲ្យមានការជំទាស់យ៉ាងខ្លាំងពីប្រទេសអ៊ីរ៉ង់ ដែលចាត់ទុក «ឈូងសមុទ្រពែរ្ស» ជាឈ្មោះប្រពៃណីហើយជាផ្នែកមួយសម្រាប់បេតិកភណ្ឌជាតិរបស់ខ្លួន៕

ដោយ៖ ឈាង

ចុចអាន៖ អាមេរិកអនុម័តការលក់សព្វាវុធតម្លៃជាង ១ពាន់លានដុល្លារឲ្យអារ៉ាប់រួម មុនដំណើរទស្សនកិច្ចរបស់លោក ត្រាំ