អ៊ុយក្រែន ធ្លាក់ F-16 មួយគ្រឿងទៀតហើយ!

ប្រទេសអ៊ុយក្រែន បានប្រកាសពីការធ្លាក់យន្តហោះចម្បាំង F-16 មួយគ្រឿងទៀតហើយ ដូច្នេះបើបូករួមទាំងមួយគ្រឿងនេះទៀត មានន័យថា F-16 នៅអ៊ុយក្រែន ធ្លាក់អស់៣គ្រឿងហើយ ចាប់តាំងពីម្ចាស់ជំនួយលោកខាងលិច ផ្តល់ឲ្យទីក្រុងកៀវ យកទៅប្រយុទ្ធជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសរបស់កងទ័ពអាកាសអ៊ុយក្រែននិងត្រូវយកមកចុះផ្សាយដោយសារព័ត៌មាន RT នៅថ្ងៃសុក្រទី១៦ខែឧសភាឆ្នាំ២០២៥, យន្តហោះចម្បាំងផលិតដោយអាមេរិកមួយគ្រឿងនេះ ធ្លាក់នៅម៉ោង៣:៣០នាទីព្រឹកថ្ងៃសុក្រអំឡុងពេលធ្វើប្រតិបត្តិការការពារ ប៉ុន្តែមិនបញ្ជាក់ទីតាំងធ្លាក់ឡើយ។

ទោះបីជាយ៉ាងណាក៏ដោយ កងទ័ពអាកាសអ៊ុយក្រែន អះអាងថា ពីឡុតត្រូវជួយសង្គ្រោះបាន ដោយមិនមានគ្រោះថ្នាក់ដល់អាយុជីវិតទេ ខណៈភាគីរុស្ស៊ី ក៏មិនទាន់និយាយអ្វីដែរ ជុំវិញហេតុការណ៍នេះ។

សូមជម្រាបថា នេះជាយន្តហោះចម្បាំង F-16 គ្រឿងទីបីហើយដែលធ្លាក់នៅអ៊ុយក្រែន ចាប់តាំងពីលោក ហ្សេលេនស្គី ទទួលបានជំនួយពីខ្នងបង្អែកបស្ចិមប្រទេសកាលពីខែសីហាឆ្នាំ២០២៤។

យន្តហោះគ្រឿងទីមួយ បានធ្លាក់ក្រោយចូលប្រយុទ្ធក្នុងប្រទេសអ៊ុយក្រែនមិនបានដល់មួយខែផង ចំណែកគ្រឿងទីពីរ ត្រូវរុស្ស៊ីបាញ់មីស៊ីលចំកាលពីថ្ងៃទី១២ខែមេសា ខណៈឧប្បត្តិហេតុទាំងពីរនេះ សុទ្ធតែផ្តាច់ជីវិតអាកាសយានិក៕

អត្ថបទ៖ សុខ សុវណ្ណ

ចុចអាន៖ F-16 ច្រើនគ្រឿងទៀត បានទៅដល់ដៃអ៊ុយក្រែន