រដ្ឋបីនៅសហរដ្ឋអាមេរិក​ជួប​ព្យុះកំបុតត្បូងសម្លាប់មនុស្ស២៨នាក់ ប៉ះពាល់​ផ្ទះរាប់​ពាន់​ខ្នង​

ព្យុះកំបុតត្បូងបោកបក់កាត់ផ្នែកខ្លះនៃភាគខាងលិច និងភាគខាងត្បូងសហរដ្ឋអាមេរិក បណ្តាលឱ្យមានការបំផ្លិចបំផ្លាញយ៉ាងទូលំទូលាយ និងសម្លាប់មនុស្សយ៉ាងហោចណាស់ ២៨នាក់នៅរដ្ឋចំនួនបី។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៩ខែឧសភានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋដែលរងលផលប៉ះពាន់និងមានអ្នកស្លាប់ រួ​មមាន រដ្ឋKentucky រដ្ឋ Missouri និងរដ្ឋ Virginia ខណៈ​ដែល​រដ្ឋ Kentucky ប៉ះពាល់ខ្លាំងជាងគេ និងមានអ្នកស្លាប់រហូតដល់១៩នាក់។ តំបន់ដែលរងគ្រោះខ្លាំងបំផុតនៅក្នុងរដ្ឋនេះគឺតំបន់ Laurel County ​ដោយផ្ទះរាប់រយខ្នងត្រូវបានបំផ្លាញ ឬខូចខាតយ៉ាងធ្ងន់ធ្ងរ និងផ្លូវជាច្រើនត្រូវបានបិទ។

ចំណែកនៅក្នុងរដ្ឋ Missouri ឯណោះ​វិញ មានអ្នកស្លាប់៧នាក់ ក្នុងនោះនៅក្នុងទីក្រុង St. Louis មានអ្នកស្លាប់ ៥នាក់៣៨នាក់រងរបួស ហើយផ្ទះជាង៥,០០០ខ្នង រងផលប៉ះពាល់។ លើសពីនេះខ្យល់ព្យុះកំបុតត្បូងដាច់ដោយឡែកមួយនៅ Scott County ប្រហែល ២០៩ គីឡូម៉ែត្រភាគខាងត្បូងទីក្រុង St. Louis បានសម្លាប់មនុស្ស ២ នាក់ និងបំផ្លាញផ្ទះជាច្រើនខ្នងទៀត។ រីឯនៅរដ្ឋ Virginiaមានអ្នកស្លាប់ចំនួន ២ នាក់នៅភាគខាងជើងនៃរដ្ឋនេះ។

សូមបញ្ជាក់ថាខ្យល់ព្យុះកំបុតត្បូងចំនួន ១,២០០ បានបោកបក់លើសហរដ្ឋអាមេរិកជារៀងរាល់ឆ្នាំ ប៉ុន្តែអ្នកស្រាវជ្រាវកត់សម្គាល់ថា ខ្យល់ព្យុះកំបុតត្បូងនៅពេលថ្មីៗនេះបានផ្លាស់ប្ដូរទំនោរបក់ទៅកាន់តំបន់ភាគខាងត្បូងដែលមានប្រជាជនច្រើន និងបង្កើនហានិភ័យដល់ប្រជាជននៅតំបន់នោះ។

គួរបញ្ជាក់ថាព្យុះជាពេលថ្មីៗនេះបានកើតឡើង ចំពេលមានការខ្វះខាតបុគ្គលិកនៅភ្នាក់ងារអាកាសធាតុជាតិ (NWS) ដោយសារតែការកាត់បន្ថយបុគ្គលិករបស់រដ្ឋបាលលោក ដូណាល់​ ត្រាំ។ អ្នកជំនាញព្រមានថាការខ្វះខាតទាំងនេះអាចរារាំងសមត្ថភាពរបស់ NWS ក្នុងការចេញការព្រមានទាន់ពេលវេលាក្នុងស្ថានភាពអាកាសធាតុធ្ងន់ធ្ងរ។

ជុំវិញបញ្ហាអាកាសធាតុនេះក្រុមអ្នកឧតុនិយមបានព្រមានពីព្យុះដែលអាចកើតឡើងជាច្រើនថ្ងៃទៀត ដោយរដ្ឋ Missouri និង Kansas ប្រឈមនឹងហានិភ័យព្យុះ ផ្គររន្ទះ ព្រិលធ្លាក់ខ្លាំងទំហំប៉ុនបាល់វាយកូនហ្គោល និងខ្យល់បក់រហូតដល់ ៩៦ គីឡូម៉ែត្រក្នុងមួយម៉ោង។ រដ្ឋ Kentucky ក៏ស្ថិតនៅក្រោមការគំរាមកំហែងផងដែរ ដោយមានព្យុះជាច្រើនទៀតទំនងជាកើតឡើងរហូតដល់ថ្ងៃអង្គារ៕

អត្ថបទ៖ ប៊ុន សុភាព