វៀតណាម ចាប់ខ្លួនប្តីប្រពន្ធមួយគូ ដែលចែក​ចាយឱសថក្លែងក្លាយ រាប់តោនលើទីផ្សារ តាំងពីឆ្នាំ២០២០មក

កាលពីថ្ងៃអាទិត្យទី១៨ខែឧសភាឆ្នាំ២០២៥ ប៉ូលិសវៀតណាមបានបើកប្រតិបត្តិការបំបែកសម្បុកផលិតនិងចែកចាយឱសថក្លែងក្លាយមួយ ដោយរឹបអូសបានថ្នាំបំប៉នសុខភាពនិងឱសថក្លែងក្លាយជាង ១០០តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Vietnam Net ចុះផ្សាយថា ក្នុងប្រតិបត្តិការនោះ អាជ្ញាធរវៀតណាមបានចាប់ខ្លួនមេក្លោងឈ្មោះ Pham Ngoc Tien ដែលជាឱសថការីនិងភរិយាឈ្មោះ Doan Thi Nguyet រស់នៅទីក្រុងហាណូយ។ 

តាមការបញ្ជាក់ពីសមត្ថកិច្ច, ជនសង្ស័យបានបង្កើតក្រុមហ៊ុនចំនួន១៧ ក្នុងនោះមាន៦ក្រុមហ៊ុន ដែលមានអាជ្ញាប័ណ្ណនាំចូល និង១១ក្រុមហ៊ុនដែល ទទួលបន្ទុកចែកចាយក្នុងស្រុក។

ជនសង្ស័យបានសារភាពថា ពួកគេពិតជាផលិតនិងចែកចាយឱសថក្លែងក្លាយមែន ហើយចាប់ផ្តើមធ្វើរឿងនេះតាំងពីឆ្នាំ២០២០មកម្ល៉េះ ពោលគឺបានចែកចាយពាសពេញទីផ្សារ ឱសថស្ថាននិងមន្ទីរពេទ្យទូទាំងប្រទេសរួចទៅហើយ។

ពាក់ព័ន្ធបញ្ហានេះ ប៉ូលិសវៀតណាម កំពុងពិនិត្យមើលសិនថាតើឱសថទាំងនោះមានឈ្មោះនិងលេខកូដអ្វីខ្លះ សឹមនឹងប្រកាសប្រមូលផលិតផលក្លែងក្លាយទាំងនោះមកវិញ ហើយកំពុងចាត់វិធានការឲ្យជនសង្ស័យប្រឈមមុខចំពោះនីតិវិធីច្បាប់៕

អត្ថបទ៖ សុខ សុវណ្ណ

ចុចអាន៖ វៀតណាម រឹបអូសប្រេងឆាក្លែងក្លាយជាង ៧ម៉ឺនលីត្រ និងប៊ីចេង ៤០តោន ដែលប៉ះពាល់ខ្លាំងដល់សុខភាព