រដ្ឋមន្ត្រីកសិកម្មជប៉ុន លាលែងតំណែង គ្រាន់និយាយថា៖ លោកមិនដែលទិញអង្ករទេ គ្រាន់តែអ្នកគាំទ្រឲ្យ យកមកហូបមិនអស់ផង

រដ្ឋមន្ត្រីក្រសួងកសិកម្មជប៉ុន Taku Eto បានសម្រេចលាលែងតំណែង បន្ទាប់ពីបង្កឲ្យមានកំហឹងជាសាធារណៈ ដោយគ្រាន់តែនិយាយថា៖ លោកមិនដែលទិញអង្ករទេ គ្រាន់តែអង្ករដែលអ្នកគាំទ្ររបស់លោកឲ្យ យកមកហូបមិនអស់ផង ហើយថែមទាំងអាចយកលក់បានទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Eto ថ្លែងបែបនេះក្នុងសុន្ទរកថានៅទីក្រុង Saga កាលពីថ្ងៃអាទិត្យទី១៨ខែឧសភាឆ្នាំ២០២៥ ដែលបង្កឲ្យមានការរិះគន់ទាំងពីសំណាក់គណបក្សប្រឆាំងនិងគណបក្សកាន់អំណាច ក៏ដូចជាសាធារណៈជនផងដែរ ស្របពេលតម្លៃម្ហូបអាហារកំពុងកើនឡើងខ្ពស់។

ថ្លែងប្រាប់អ្នកសារព័ត៌មានក្រោយដាក់ពាក្យសុំលាលែង លោក Eto និយាយថា «ខ្ញុំបានសួរខ្លួនឯងថា តើសមទេដែលត្រូវបន្តកាន់តំណែងនៅក្រសួង ក្នុងពេលដែលតម្លៃអង្ករកំពុងថ្លៃបែបនេះ? ខ្ញុំក៏គិតឃើញថា មិនសមទេ!។ ជាថ្មីម្តងទៀត ខ្ញុំសូមអភ័យទោសដល់ប្រជាពលរដ្ឋ ដែលខ្ញុំនិយាយមិនសមរម្យក្នុងនាមជារដ្ឋមន្ត្រី ទាំងដែលពេលពួកគាត់ កំពុងជួបបញ្ហាតម្លៃអង្ករឡើងថ្លៃ»។

លោក Eto ក្លាយជារដ្ឋមន្ត្រីកសិកម្មកាលពីខែវិច្ឆិកាឆ្នាំមុន ប៉ុន្តែឥឡូវ បុរសអាយុ៦៤ឆ្នាំរូបនេះ ក្លាយជារដ្ឋមន្ត្រីទី១ក្នុងជួរគណៈរដ្ឋមន្ត្រីរបស់ Shigeru Ishiba ដែលបានលាលែងពីតំណែង ចាប់តាំងពីនាយករដ្ឋមន្ត្រីជប៉ុនឡើងកាន់អំណាចកាលពីខែតុលាឆ្នាំ២០២៤។ 

ក្រោយការលាលែងនេះ អតីតរដ្ឋមន្ត្រីបរិស្ថាន Shinjiro Koizumi នឹងត្រូវចូលកាន់តួនាទីរបស់លោក Eto ជាបណ្តោះអាសន្នសិន។

សូមជម្រាបថា សម្តីលោក Eto កើតឡើងភ្លាមៗបន្ទាប់ពីក្រសួងកសិកម្ម សម្រេចបញ្ចេញអង្ករបន្ថែមពីស្តុកគ្រាអាសន្នរហូតដល់ខែកក្កដា ដោយសង្ឃឹមថា ចំណាត់ការនេះនឹងធ្វើឲ្យតម្លៃអង្ករធ្លាក់ចុះ ក្រោយតម្លៃហក់ឡើងទ្វេគុណ បើធៀបនឹងឆ្នាំមុន។

ម្យ៉ាងរឿងនេះកើតឡើង មុនការបោះឆ្នោតសភាជាន់ខ្ពស់ដ៏សំខាន់ក្នុងខែកក្កដា ចំពេលអត្រាគាំទ្ររបស់គណបក្សប្រជាធិបតេយ្យសេរីដែលកំពុងកាន់អំណាច កំពុងធ្លាក់ចុះ៕

អត្ថបទ៖ សុខ សុវណ្ណ

ចុចអាន៖ អត្រាកំណើត​នៅ​ជប៉ុន​ធ្លាក់​ដល់​កម្រិត​ទាបំផុត​ជា​ប្រវត្តិសាស្ត្រ​