ធ្លាក់យន្តហោះនៅ San Diego រដ្ឋកាលីហ្វ័រញ៉ា សម្លាប់មនុស្ស៦នាក់រួម​ទាំងតន្ត្រីករល្បី​

ហេតុការណ៍ធ្លាក់យន្តហោះ​ខ្នាតតូច​និង​ប្រកបដោយ​ការ​បំផ្លិច​បំផ្លាញ​កាលពីព្រឹកថ្ងៃព្រហស្បតិ៍នៅក្នុងទីក្រុង San Diego រដ្ឋកាលីហ្វ័រញ៉ា សហរដ្ឋអាមេរិក បានឆក់យកជីវិតមនុស្ស៦នាក់ រួមទាំងភ្នាក់ងារតន្ត្រីដ៏លេចធ្លោ លោក Dave Shapiro ដែលជាសហស្ថាបនិកនៃ​ក្រុម​ Sound Talent Group ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី២៣ខែឧសភានេះ។

ភ្នាក់ងារតន្ត្រីដ៏ល្បីល្បាញ លោក Dave Shapiro ស្ថិតក្នុងចំណោមអ្នកស្លាប់ បន្ទាប់ពីយន្តហោះតូចមួយបានធ្លាក់ចូលទៅក្នុងផ្លូវក្នុងតំបន់លំនៅឋានក្នុងទីក្រុង San Diego។ នេះបើយោងតាមក្រុមហ៊ុនរបស់គាត់ Sound Talent Group (STG) ដែលជាភ្នាក់ងារតន្ត្រីឯករាជ្យលំដាប់ថ្នាក់កំពូលមួយ។

ឧបទ្ទវហេតុនេះបានកើតឡើងនៅម៉ោងប្រហែល៤ទៀបភ្លឺនៅតំបន់ Murphy Canyon ដែលជាតំបន់លំនៅឋាន​ដែល បណ្តាល​ឱ្យមានការបំផ្លិចបំផ្លាញយ៉ាងធ្ងន់ធ្ងរទៅលើផ្ទះមួយខ្នង និងខូចខាតរថយន្តជាច្រើនគ្រឿង។

យន្តហោះនេះបានចាកចេញពីទីក្រុង Teterboro រដ្ឋ New Jersey បានឈប់នៅ Wichita រដ្ឋ Kansas បន្ទាប់មកបានធ្វើដំណើរទៅកាន់អាកាសយានដ្ឋានប្រតិបត្តិ Montgomery-Gibbs ក្នុងទីក្រុង San Diego បន្តនិងបានធ្លាក់មុនពេលទៅដល់។

ទោះបីជាមានការបំផ្លិចបំផ្លាញក៏ដោយ ក៏មិនមានអ្នកស្លាប់នៅក្នុងសង្កាត់នោះទេ។ អ្នកស្រុកជាង ១០០ នាក់ត្រូវបានជម្លៀសចេញ ហើយប្រតិបត្តិការសង្គ្រោះនៅតែបន្ត ខណៈដែលអ្នកស៊ើបអង្កេតមកពីក្រុមប្រឹក្សាសុវត្ថិភាពដឹកជញ្ជូនជាតិ (NTSB) កំពុងប្រមូលភស្តុតាង។

សោកនាដកម្ម​រលឹកទៅដល់​​គ្រោះថ្នាក់​អាកាសចរណ៍កាលពីមុន​នៅ​ទីក្រុង San Diego ដោយ​ធ្វើ​ឱ្យ​មាន​ការ​ព្រួយ​បារម្ភ​ជា​ថ្មី​អំពី​សុវត្ថិភាព​ហោះហើរ​ក្នុង​តំបន់​ដែល​មាន​អ័ព្ទច្រើន៕

អត្ថបទ៖ ប៊ុន សុភាព