ព័ត៌មានអន្ដរជាតិ

អ៊ីរ៉ង់ព្រមានចាត់«វិធានការពិសេស» បើអ៊ីស្រាអែល និងអាមេរិកហ៊ានវាយទីតាំងនុយក្លេអ៊ែររបស់ខ្លួន

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

Chheang

អ៊ីរ៉ង់ បានចេញការព្រមានយ៉ាងម៉ឺងម៉ាត់ចំពោះអ៊ីស្រាអែល និងសហរដ្ឋអាមេរិក ដោយអះអាងថា ទីក្រុងតេហេរ៉ង់នឹងចាត់«វិធានការពិសេស» បើមានការវាយប្រហារយោធាណាមួយលើទីតាំងនុយក្លេអ៊ែររបស់ខ្លួន ហើយការឆ្លើយតបនោះនឹងអាចបង្កជាសង្គ្រាមដ៏ធំនៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេស លោក Abbas Araghchi កាលពីថ្ងៃទី២២ខែឧសភាបានសង្កត់ធ្ងន់ថា ការវាយប្រហារលើទីតាំងនុយក្លេអ៊ែររបស់អ៊ីរ៉ង់ នឹងក្លាយជា«កំហុសប្រវត្តិសាស្ត្រដ៏ធំបំផុតមួយ ដែលសហរដ្ឋអាមេរិកបង្កឡើង» ហើយអ៊ីរ៉ង់នឹងឆ្លើយតប«ភ្លាមៗ និងយ៉ាងម៉ឺងម៉ាត់»។

លោក Araghchi បានលើកឡើងថា «ខ្ញុំបានអំពាវនាវឲ្យសហគមន៍អន្តរជាតិចាត់វិធានការទប់ស្កាត់ប្រកបដោយប្រសិទ្ធភាព ប្រឆាំងនឹងការបន្តការគំរាមកំហែងរបស់អ៊ីស្រាអែល ដែលប្រសិនបើមិនមានការត្រួតពិនិត្យ នោះនឹងបង្ខំឲ្យអ៊ីរ៉ង់ចាត់វិធានការពិសេស ក្នុងការការពារគ្រឿងបរិក្ខារ និងសម្ភារៈនុយក្លេអ៊ែររបស់យើង»។

ការព្រមាននេះ កើតឡើងចំពេលដែលមានភាពតានតឹងកាន់តែខ្លាំងឡើង និងមុនការចរចានុយក្លេអ៊ែរជុំទីប្រាំរវាងអ៊ីរ៉ង់ និងអាមេរិក ដែលគ្រោងនឹងធ្វើឡើងនៅទីក្រុងរ៉ូមនាថ្ងៃសុក្រសប្ដាហ៍នេះ។ អ៊ីរ៉ង់បានសម្តែងការខកចិត្តចំពោះអ្វីដែលខ្លួនយល់ថាជាការទាមទារហួសហេតុពីអាមេរិក ជាពិសេសទាក់ទងនឹងការបញ្ឈប់សកម្មភាពចម្រាញ់សារធាតុអ៊ុយរ៉ាញ៉ូមទាំងស្រុងរបស់ទីក្រុងតេហេរ៉ង់។ បច្ចុប្បន្ននេះ អ៊ីរ៉ង់កំពុងបង្កើនសារធាតុអ៊ុយរ៉ាញ៉ូមដល់ទៅកម្រិតភាពសុទ្ធ ៦០% ខិតជិតដល់កម្រិត ៩០% ដែលអាចផលិតអាវុធប្រល័យលោកបាន។ ទោះជាបែបនេះក្ដី អ៊ីរ៉ង់នៅតែអះអាងដដែលៗថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងស៊ីវិលប៉ុណ្ណោះ។

កាលពីពេលថ្មីៗនេះ អត្ថបទព័ត៌មានមួយរបស់ CNN បានចេញផ្សាយថា របាយការណ៍ស៊ើបការណ៍សម្ងាត់អាមេរិក បានបង្ហាញថា អ៊ីស្រាអែលកំពុងរៀបចំយ៉ាងសកម្មសម្រាប់ការវាយប្រហារយោធាដ៏ធំប្រឆាំងនឹងរោងចក្រនុយក្លេអ៊ែររបស់អ៊ីរ៉ង់ បើទោះជាទីក្រុងតេហេរ៉ង់កំពុងបន្តកិច្ចចរចាការទូតជាមួយក្រុងវ៉ាស៊ីនតោនក៏ដោយ។ របាយការណ៍ដដែល បានបន្តទៀតថា អ៊ីស្រាអែលកំពុងវាយតម្លៃជម្រើសយោធាផ្សេងៗ រួមទាំងការវាយប្រហារតាមអាកាស និងប្រតិបត្តិការកងកុម្ម៉ង់ដូ សំដៅរារាំងសមត្ថភាពរបស់អ៊ីរ៉ង់ក្នុងការអភិវឌ្ឍអាវុធនុយក្លេអ៊ែរ។ គោលដៅដែលគ្រោងទុក រូមមានទីតាំងនុយក្លេអ៊ែរសំខាន់ៗដូចជា រោងចក្រ Fordow និង Natanz។

ប្រភពដែលដកស្រង់ដោយ CNN បាននិយាយថា៖ «ឱកាសនៃការវាយប្រហាររបស់អ៊ីស្រាអែលលើរោងចក្រនុយក្លេអ៊ែរអ៊ីរ៉ង់ បានកើនឡើងយ៉ាងខ្លាំង» ជាពិសេសបើកិច្ចព្រមព្រៀងរបស់ទីក្រុងវ៉ាស៊ីនតោនបរាជ័យក្នុងការទប់ស្កាត់ការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ឲ្យបានពេញលេញ៕

ដោយ៖ ឈាង

ចុចអាន៖ ចារកម្មអាមេរិក បង្ហាញថា អ៊ីស្រាអែលត្រៀមវាយប្រហារលើទីតាំងនុយក្លេអ៊ែរអ៊ីរ៉ង់