ព័ត៌មានអន្ដរជាតិ
ចារកម្មអាមេរិក បង្ហាញថា អ៊ីស្រាអែលត្រៀមវាយប្រហារលើទីតាំងនុយក្លេអ៊ែរអ៊ីរ៉ង់
យោងតាមការចុះផ្សាយរបស់សារព័ត៌មាន CNN កាលពីថ្ងៃទី២០ខែឧសភាឆ្នាំ២០២៥ របាយការណ៍ស៊ើបការណ៍សម្ងាត់អាមេរិក បានបង្ហាញថា អ៊ីស្រាអែលកំពុងរៀបចំយ៉ាងសកម្មសម្រាប់ការវាយប្រហារយោធាដ៏ធំប្រឆាំងនឹងរោងចក្រនុយក្លេអ៊ែររបស់អ៊ីរ៉ង់ បើទោះជាទីក្រុងតេហេរ៉ង់កំពុងបន្តកិច្ចចរចាការទូតជាមួយក្រុងវ៉ាស៊ីនតោនក៏ដោយ។
បើតាមរបាយការណ៍ចារកម្មអាមេរិកនាពេលថ្មីៗ អ៊ីស្រាអែលកំពុងវាយតម្លៃជម្រើសយោធាផ្សេងៗ រួមទាំងការវាយប្រហារតាមអាកាស និងប្រតិបត្តិការកងកុម្ម៉ង់ដូ សំដៅរារាំងសមត្ថភាពរបស់អ៊ីរ៉ង់ក្នុងការអភិវឌ្ឍអាវុធនុយក្លេអ៊ែរ។ គោលដៅដែលគ្រោងទុក រូមមានទីតាំងនុយក្លេអ៊ែរសំខាន់ៗដូចជា រោងចក្រ Fordow និង Natanz។
ខណៈពេលដែលអ៊ីស្រាអែលហាក់មិនទាន់បានធ្វើការសម្រេចចិត្តចុងក្រោយ CNN ដោយដកស្រង់សម្តីមន្ត្រីដែលស្គាល់ពីព័ត៌មានសម្ងាត់ បានរាយការណ៍ថា លទ្ធភាពនៃការវាយប្រហារបានកើនឡើងយ៉ាងខ្លាំងនៅក្នុងប៉ុន្មានខែថ្មីៗនេះ។ ពួកគេបានកត់សម្គាល់ថា ចំណាត់ការរបស់អ៊ីស្រាអែល នឹងធ្វើឡើងឬអត់ គឺអាស្រ័យលើលទ្ធផលនៃការចរចារវាងអាមេរិក និងអ៊ីរ៉ង់ទាក់ទងនឹងមហិច្ឆតានុយក្លេអ៊ែររបស់ទីក្រុងតេហេរ៉ង់។
ប្រភពដែលដកស្រង់ដោយ CNN បាននិយាយថា៖ «ឱកាសនៃការវាយប្រហាររបស់អ៊ីស្រាអែលលើរោងចក្រនុយក្លេអ៊ែរអ៊ីរ៉ង់ បានកើនឡើងយ៉ាងខ្លាំង» ជាពិសេសបើកិច្ចព្រមព្រៀងរបស់ទីក្រុងវ៉ាស៊ីនតោនបរាជ័យក្នុងការទប់ស្កាត់ការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ឲ្យបានពេញលេញ។
សូមរឭកថា កាលពីថ្ងៃទី២០ខែឧសភា មេដឹកនាំកំពូលអ៊ីរ៉ង់ លោក Ayatollah Ali Khamenei បានសម្តែងការសង្ស័យទាក់ទងនឹងការចរចានុយក្លេអ៊ែរដែលកំពុងបន្តជាមួយអាមេរិក ដោយបង្ហាញពីភាពមិនច្បាស់លាស់លើការរំពឹងទុកនៃការឈានទៅដល់កិច្ចព្រមព្រៀងថ្មីមួយ។ លោក Khamenei បាននិយាយថា «ខ្ញុំគិតថា កិច្ចចរចានុយក្លេអ៊ែរជាមួយសហរដ្ឋអាមេរិកនឹងមិននាំមកនូវលទ្ធផលទេ»។
កន្លងមក អាមេរិកតែងទទូចឲ្យអ៊ីរ៉ង់បញ្ឈប់ការចម្រាញ់សារធាតុអ៊ុយរ៉ាញ៉ូមទាំងអស់ ដោយអនុញ្ញាតឲ្យមានតែការនាំចូលសារធាតុអ៊ុយរ៉ាញ៉ូមដែលបន្សុទ្ធរួចសម្រាប់គោលបំណងស៊ីវិលប៉ុណ្ណោះ។ រដ្ឋមន្ត្រីការបរទេសអាមេរិក លោក Marco Rubio បានគូសបញ្ជាក់ពីការព្រួយបារម្ភលើកម្រិតចម្រាញ់ភាពសុទ្ធនៃសារធាតុអ៊ុយរ៉ាញ៉ូមបច្ចុប្បន្នរបស់អ៊ីរ៉ង់ ខណៈទីភ្នាក់ងារថាមពលអាតូមិកអន្តរជាតិបានរាយការណ៍ថា អ៊ីរ៉ង់មានអ៊ុយរ៉ាញ៉ូមដែលបន្សុទ្ធរួចដល់ទៅកម្រិត ៦០% ជិតដល់កម្រិត ៩០% ដែលត្រូវការសម្រាប់ការផលិតសព្វាវុធប្រល័យលោក។
យ៉ាងណាមិញ អ៊ីរ៉ង់នៅតែនិយាយដដែលៗថា សកម្មភាពនុយក្លេអ៊ែររបស់ខ្លួនគឺសម្រាប់គោលបំណងសន្តិភាពតែមួយគត់ ហើយចាត់ទុកសិទ្ធិរបស់ខ្លួនក្នុងការចម្រាញ់សារធាតុអ៊ុយរ៉ាញ៉ូមថាជារឿងដែលមិនអាចចរចាបាន។
កាលពីខែមេសា ប្រធានាធិបតីអាមេរិក លោក ដូណាល់ ត្រាំ ធ្លាប់បានគំរាមថា អ៊ីស្រាអែលនឹងត្រូវដឹកនាំសកម្មភាពយោធាប្រឆាំងនឹងអ៊ីរ៉ង់ បើការចរចាបរាជ័យក្នុងការរុះរើកម្មវិធីអាវុធនុយក្លេអ៊ែររបស់ទីក្រុងតេហេរ៉ង់។ លោក ត្រាំ បានលើកឡើងថា «បើវាត្រូវការយោធា យើងនឹងមានយោធា។ អ៊ីស្រាអែលច្បាស់ជានឹងចូលរួមយ៉ាងច្រើនក្នុងរឿងនេះ។ ពួកគេនឹងក្លាយជាអ្នកដឹកនាំ(ការវាយប្រហារ)»។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានសម្តែងការយល់ស្របទៅនឹងជំហររបស់លោក ត្រាំ ដោយបានរំលឹកឡើងវិញនូវការប្រឆាំងដ៏យូរអង្វែងរបស់អ៊ីស្រាអែលចំពោះអ៊ីរ៉ង់ដែលមានអាវុធនុយក្លេអ៊ែរ៕
ដោយ៖ ឈាង
ចុចអាន៖ មេដឹកនាំកំពូលអ៊ីរ៉ង់៖ «ខ្ញុំគិតថា កិច្ចចរចានុយក្លេអ៊ែរជាមួយអាមេរិកបែបមិនជោគជ័យទេ»
អាជ្ញាធរសង្កាត់ចោមចៅទី៣ បន្តចុះបូមស្តារប្រព័ន្ធលូក្រោយមានភ្លៀងធ្លាក់ជាបន្តបន្ទាប់
ក្រសួងសង្គមកិច្ចត្រៀមអនុវត្តកម្មវិធីឧបត្ថម្ភសាច់ប្រាក់ជូនជនជាប់ឃុំជាស្ត្រីមានផ្ទៃពោះនៅឆ្នាំនេះ
ព្រះបរមរាជវាំងឱ្យសមត្ថកិច្ចប្រើវិធានការច្បាប់ចំពោះជនក្លែងព្រះនាមហ្លួងម៉ែ លើបណ្ដាញសង្គម
សម្ដេចប៉ាប Leo ប្រាប់ថាបើកទ្វារបុរីវ៉ាទីកង់ឲ្យរុស្ស៊ី-អ៊ុយក្រែនធ្វើជាកន្លែងចរចាសន្ដិភាព
ថៃ មានអ្នកស្លាប់ជាបន្ត ដោយសារកូវីដ ខណៈមនុស្សអាយុចន្លោះ ៣០-៣៩ឆ្នាំ ងាយឆ្លងវីរុសបំប្លែងថ្មីបំផុត
អតីតភិក្ខុសង្ឃល្បីឈ្មោះ៥រូប កំពុងកាន់តំណែងជាន់ខ្ពស់ក្នុងស្ថាប័នរដ្ឋ
Update៖ ក្មេងស្រីដែលប្រទះឃើញស្លាប់ក្នុងបន្ទប់ទឹកសាលារៀន មានស្រុកកំណើតនៅស្រុកពញាឮ ខេត្តកណ្តាល
ប៉ូលិសថៃ ចាប់ជនជាតិខ្មែរ ៣នាក់ ពេលកំពុង ត.យ៉ាក នៅខេត្ត ស្រះកែវ
ឆេះផ្ទះ៨ខ្នង និងតូបជួលផ្សារពាក់ស្បែក១៦តូប ខូចខាតអស់ទាំងស្រុង
បឋម៖ សង្ស័យករណីរំលោភសម្លាប់ ក្មេងស្រីវ័យ១៥ម្នាក់ត្រូវគេប្រទះឃើញស្លាប់ទាំងអាក្រាតកាយក្នុងបន្ទប់ទឹកសាលារៀន
-
ចរាចរណ៍៤ ថ្ងៃ agoស្នងការខេត្តប៉ៃលិន បំភ្លឺជុំវិញករណីគ្រោះថ្នាក់ចរាចណ៍បណ្តាលឱ្យស្លាប់ភាគីជិះម៉ូតូ
-
សន្តិសុខសង្គម២ ថ្ងៃ agoស្នងការរាជធានី ប្រកាសតែងតាំងលោកវរសេនីយ៍ទោ ប៉ាង សាវឿន ឲ្យគ្រប់គ្រងការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ
-
ចរាចរណ៍៦ ថ្ងៃ agoUpdate៖ អ្នកបង្កគ្រោះថ្នាក់បុករះនៅមុខក្រសួងមហាផ្ទៃ ជានាយការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ នៃស្នងការដ្ឋាននគរបាលរាជធានីភ្នំពេញ
-
ចរាចរណ៍៦ ថ្ងៃ agoUpdate៖ អ្នកបើករថយន្ដបុករះនៅមុខក្រសួងមហាផ្ទៃ ស្ថិតក្រោមជាតិអាល់កុល 0,35mg/L
-
សន្តិសុខសង្គម១ សប្តាហ៍ agoឃាត់ខ្លួនប្រធានផ្សារទួលពង្រ និងបក្ខពួក ពាក់ព័ន្ធករណីដើរយកភាស៊ីពីអាជីវករលក់ដូរតាមរ៉ឺម៉កម៉ូតូ
-
ព័ត៌មានជាតិ២៣ ម៉ោង agoអតីតភិក្ខុសង្ឃល្បីឈ្មោះ៥រូប កំពុងកាន់តំណែងជាន់ខ្ពស់ក្នុងស្ថាប័នរដ្ឋ
-
ព័ត៌មានជាតិ៣ ថ្ងៃ agoមន្ត្រីសុខាភិបាល អំពាវនាវឱ្យពលរដ្ឋចាក់វ៉ាក់សាំង Pfizer ដើម្បីការពារវីរុសបំប្លែងថ្មី JN.1
-
កីឡា៥ ថ្ងៃ agoលោក អេ ភូថង ប្រាប់ថា មិនដឹងរឿងផ្ទាល់ខ្លួនរបស់ ធឿន ធារ៉ា ខណៈបែកធ្លាយវីដេអូជក់បារីអេឡិចត្រូនិក