យោធាថៃម្នាក់ស្លាប់ ក្នុងហេតុការណ៍ផ្ទុះគ្រាប់បែកនៅខេត្ត Pattani 

យោធាថៃម្នាក់ត្រូវបាត់បង់ជីវិត ក្នុងការវាយប្រហារបំផ្ទុះគ្រាប់បែកនៅខេត្ត Pattani ភាគខាងត្បូង នៅថ្ងៃចន្ទទី២ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod, យោធាម្នាក់នេះមានឈ្មោះ Apichart Phaphan។ រូបគេបានស្លាប់ដោយសារតែផ្ទុះគ្រាប់បែកដែលបង្កៃលើផ្លូវហាយវ៉េលេខ ៤១៥៧ ក្នុងស្រុក Panare ខណៈមានសេចក្តីរាយការណ៍ថា ហេតុការណ៍នេះកើតឡើង ពេលយោធាមួយក្រុម ធ្វើដំណើរមកពីកម្មវិធីមួយ ដែលរៀបចំដោយរដ្ឋបាលស្រុកនេះ។

ក្រៅពីអ្នកស្លាប់ហើយនោះ ក៏មានមន្ត្រីយោធា៤នាក់ផ្សេងទៀតត្រូវរបួសផងដែរ ក្នុងនោះមានម្នាក់របួសធ្ងន់ ហើយត្រូវបានបញ្ជូនទៅកាន់មន្ទីរពេទ្យស្រុក Panare ភ្លាមៗ។

សូមជម្រាបថា អំពើហិង្សានៅភាគខាងត្បូងប្រទេសថៃមិនថមថយឡើយ បើទោះជាមានកិច្ចប្រឹងប្រែងចរចាសន្តិភាពក៏ដោយ។

ការវាយប្រហារដោយហិង្សានៅតែកើតឡើងជាបន្តបន្ទាប់ ដ្បិតរដ្ឋមន្ត្រីក្រសួងការពារជាតិលោក Phumtham Wechayachai ចេញបញ្ជាឲ្យរឹតបន្តឹងវិធានការសន្តិសុខ និងបានរំលឹកឡើងវិញនូវការប្តេជ្ញាចិត្តរបស់រាជរដ្ឋាភិបាលថៃ ក្នុងការបន្តកិច្ចសន្ទនាសន្តិភាពជាមួយក្រុមបះបោរក៏ដោយ។

បើគិតចាប់តាំងពីឆ្នាំ២០០៤មក ជម្លោះដ៏រ៉ាំរ៉ៃនៅភាគខាងត្បូងប្រទេសថៃ បានឆក់យកជីវិតមនុស្សជាង ៧ ០០០នាក់ និងបណ្តាលឲ្យរាប់ម៉ឺននាក់ទៀតរងរបួស។

មិនត្រឹមប៉ុណ្ណឹង ភាពចលាចលនៅទីនោះ ក៏តាមលងបន្លាចដល់ជីវិតរស់នៅប្រចាំថ្ងៃរបស់ប្រជាពលរដ្ឋផងដែរ៕

អត្ថបទ៖ សុខ សុវណ្ណ

ចុចអាន៖ ​ផ្ទុះ​ការ​បាញ់​ប្រហារ​នៅថៃសម្លាប់មនុស្ស​៣នាក់ និង​​​បង្ក​របួស និង​ការ​បិទសាលារៀន​