ព័ត៌មានអន្ដរជាតិ

អង់គ្លេស សន្យាផ្គត់ផ្គង់ដ្រូន១០ម៉ឺនគ្រឿងឲ្យអ៊ុយក្រែនត្រឹមខែមេសាឆ្នាំ២០២៦

បានផុស

១១ ខែ មុន

នៅ

ថ្ងៃពុធ ៤ មិថុនា ២០២៥

ដោយ

Chheang

ចក្រភពអង់គ្លេស បានប្រកាសថានឹងផ្គត់ផ្គង់ដ្រូន (យន្តហោះគ្មានមនុស្សបើក) ចំនួន ១០០ ០០០គ្រឿងដល់ប្រទេសអ៊ុយក្រែនត្រឹមខែមេសាឆ្នាំ២០២៦ ច្រើនជាងមុន១០ដងនៃចំនួនដែលខ្លួនធ្លាប់បានសន្យាពីមុន។ គំនិតផ្តួចផ្តើមនេះ គឺជាផ្នែកមួយនៃកញ្ចប់ជំនួយយោធាដ៏ធំតម្លៃជាង ៤,៥ពាន់លានផោន ក្នុងគោលបំណងពង្រឹងសមត្ថភាពការពាររបស់អ៊ុយក្រែន ចំពេលកំពុងមានការឈ្លានពានពីរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការពារជាតិ លោក John Healey បានប្រកាសផែនការនេះនៅថ្ងៃទី៤ខែមិថុនា មុនកិច្ចប្រជុំក្រុមទំនាក់ទំនងការពារជាតិអ៊ុយក្រែនដែលមានការចូលរួមពីប្រទេសចំនួន៥០ នៅទីក្រុងប្រ៊ុចសែល។ កញ្ចប់ជំនួយដ្រូនតម្លៃ ៣៥០លានផោនបញ្ជាក់ពីការប្តេជ្ញាចិត្តរបស់អង់គ្លេស ក្នុងការគាំទ្រដល់កិច្ចខិតខំប្រឹងប្រែងការពារជាតិរបស់អ៊ុយក្រែន។

បន្ថែមពីលើការចែកចាយដ្រូន អង់គ្លេសបានបញ្ចប់ការបញ្ជូនគ្រាប់កាំភ្លើងធំចំនួន ១៤០ ០០០គ្រាប់ទៅកាន់អ៊ុយក្រែន គិតចាប់តាំងពីខែមករា ហើយនឹងបែងចែកប្រាក់បន្ថែមចំនួន ២៤៧លានផោននៅឆ្នាំនេះ ដើម្បីបណ្តុះបណ្តាលកងកម្លាំងអ៊ុយក្រែន។ សង្គ្រាមរុស្ស៊ី-អ៊ុយក្រែននាពេលបច្ចុប្បន្ន បានបង្ហាញដល់ពិភពលោកទាំងមូលថា ដ្រូនកំពុងក្លាយជាអាវុធ និងជាយានជំនិះគ្មានមនុស្សបើកដ៏សំខាន់នៅលើសមរភូមិទំនើប។

សូមបញ្ជាក់ថា ចក្រភពអង់គ្លេស គឺជាអ្នកគាំទ្រលោកខាងលិចដ៏រឹងមាំបំផុតមួយរបស់អ៊ុយក្រែន ហើយក៏កំពុងរៀនពីការតស៊ូជាងបីឆ្នាំរបស់ទីក្រុងកៀវប្រឆាំងនឹងការឈ្លានពានរបស់រុស្ស៊ីផងដែរ៕

ដោយ៖ ឈាង