ព័ត៌មានអន្ដរជាតិ

៩ប្រទេស ដែលបំពាក់ដោយអាវុធនុយក្លេអ៊ែរច្រើនជាងគេលើពិភពលោក

បានផុស

១១ វិនាទី មុន

នៅ

ថ្ងៃអង្គារ ១៧ មិថុនា ២០២៥

ដោយ

Chheang

ថ្វីបើមានសន្ធិសញ្ញាគ្រប់គ្រងអាវុធជាច្រើនទសវត្សរ៍ និងការខិតខំប្រឹងប្រែងមិនរីកសាយភាយក៏ដោយ ក៏ឃ្លាំងអាវុធនុយក្លេអ៊ែរជាសកលនៅតែប្រមូលផ្តុំនៅក្នុងដៃបណ្ដាប្រទេសមួយចំនួនដដែល។ យោងតាមការប៉ាន់ប្រមាណចុងក្រោយរបស់សហព័ន្ធអ្នកវិទ្យាសាស្ត្រអាមេរិក និងភ្នាក់ងារឃ្លាំមើលវិស័យការពារជាតិ ប្រជាជាតិចំនួន៩បានប្រមូលផ្តុំក្បាលគ្រាប់នុយក្លេអ៊ែរជាង ១២ ០០០គ្រាប់ ដោយក្នុងនោះរុស្ស៊ី និងសហរដ្ឋអាមេរិកកាន់កាប់ប្រហែល ៩០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសទាំង៩ ដែលមានឃ្លាំងអាវុធនុយក្លេអ៊ែរធំជាងគេក្នុងឆ្នាំ២០២៥ មានដូចជា៖

១.រុស្ស៊ី

រុស្សី គឺជាមហាអំណាចនុយក្លេអ៊ែរកំពូលរបស់ពិភពលោក និងមានប្រព័ន្ធអាតូមិកទំនើបបំផុត។ ប្រទេសនេះមានក្បាលគ្រាប់នុយក្លេអ៊ែរប្រមាណ ៥ ៤៤៩គ្រាប់ ដែលអាចបាញ់ចេញពីនាវាមុជទឹក យន្តហោះ ឬមីស៊ីល។

២.សហរដ្ឋអាមេរិក

សហរដ្ឋអាមេរិក ជាប្រទេសដែលមានឥទ្ធិពលបំផុតនៅលើពិភពលោកនៅពីក្រោយរុស្ស៊ី បើគិតពីលើចំនួនអាវុធនុយក្លេអ៊ែរ។ នៅក្នុងឃ្លាំងយោធារបស់ខ្លួន មហាអំណាចផុតលេខមួយនេះមានក្បាលគ្រាប់នុយក្លេអ៊ែរប្រមាណ ៥ ២៧៧គ្រាប់។

៣.ចិន

ចិនជាប្រទេសអាស៊ីតែមួយគត់ ដែលស្ថិតក្នុងចំណោមមហាអំណាចនុយក្លេអ៊ែរកំពូលទាំងបី។ ជាមួយនឹងក្បាលគ្រាប់នុយក្លេអ៊ែរប្រមាណ ៦០០គ្រាប់ ប្រទេសនេះបានធ្វើការសាកល្បងនុយក្លេអ៊ែរលើកដំបូងរបស់ខ្លួនក្នុងឆ្នាំ១៩៦៤ ហើយចាប់តាំងពីពេលនោះមក ខ្លួនបានអភិវឌ្ឍអាវុធនុយក្លេអ៊ែរជាច្រើនបន្តបន្ទាប់គ្នា។

៤.បារាំង

ប្រទេសបារាំង គឺជាឃ្លាំងអាវុធនុយក្លេអ៊ែរធំជាងគេទីបួនរបស់ពិភពលោក ដែលមានក្បាលគ្រាប់នុយក្លេអ៊ែរប្រហែល ២៩០គ្រាប់។ មិនតែប៉ុណ្ណោះ ប្រទេសនេះគឺជាមហាអំណាចនុយក្លេអ៊ែរតែមួយគត់របស់សហភាពអឺរ៉ុប បន្ទាប់ពីការចាកចេញរបស់ចក្រភពអង់គ្លេស។

៥.ចក្រភពអង់គ្លេស

ចក្រភពអង់គ្លេសរក្សាឃ្លាំងអាវុធនុយក្លេអ៊ែរចំនួន ២២៥គ្រាប់ ដែលក្នុងនោះប្រហែល ១២០គ្រាប់អាចបំពាក់លើនាវាមុជទឹកមីស៊ីលបាលិស្ទិក។

៦.ឥណ្ឌា

យោងតាមសហព័ន្ធអ្នកវិទ្យាសាស្ត្រអាមេរិក ឥណ្ឌាមានក្បាលគ្រាប់នុយក្លេអ៊ែរចំនួន ១៨០គ្រាប់ដែលត្រូវបានរក្សាទុក។

៧.ប៉ាគីស្ថាន

ប៉ាគីស្ថាន គឺជាប្រទេសមួយក្នុងចំណោមប្រទេសទាំងប្រាំបួននៅលើពិភពលោកដែលមានអាវុធនុយក្លេអ៊ែរ។ ប្រទេសនេះបានក្លាយជាមហាអំណាចនុយក្លេអ៊ែរនៅថ្ងៃទី២៨ខែឧសភាឆ្នាំ១៩៩៨ នៅពេលដែលខ្លួនបានធ្វើតេស្តនុយក្លេអ៊ែរដំបូងនៅខេត្ត Balochistan។ ប៉ាគីស្ថាន មានក្បាលគ្រាប់នុយក្លេអ៊ែរប្រមាណ ១៧០គ្រាប់។

៨.អ៊ីស្រាអែល

ថ្វីបើអ៊ីស្រាអែលមិនបានបញ្ជាក់ជាផ្លូវការអំពីឃ្លាំងអាវុធនុយក្លេអ៊ែររបស់ខ្លួនក៏ដោយ តែបើតាមរបាយការណ៍ប្រទេសនេះមានក្បាលគ្រាប់នុយក្លេអ៊ែរប្រហែល ៩០គ្រាប់។

៩.កូរ៉េខាងជើង

ទោះបីជាមានការដាក់ទណ្ឌកម្មជាច្រើនពីសហគមន៍អន្តរជាតិ កូរ៉េខាងជើងនៅតែអាចធ្វើការសាកល្បងនុយក្លេអ៊ែរជាច្រើនដង ហើយសព្វថ្ងៃគេជឿថា ប្រទេសមួយនេះមានក្បាលគ្រាប់នុយក្លេអ៊ែរប្រហែល ៥០គ្រាប់។

សូមជម្រាបថា នៅលើពិភពលោក អាវុធនុយក្លេអ៊ែរ ធ្លាប់ត្រូវបានប្រើប្រាស់ចំនួនតែ២ដងប៉ុណ្ណោះ ដោយសហរដ្ឋអាមេរិក កាលពីកំឡុងសង្គ្រាមលោកលើកទី២។ គ្រាប់បែកនុយក្លេអ៊ែរដំបូងគេបង្អស់ ដែលមានឈ្មោះថា «Little Boy» ត្រូវបានទម្លាក់កាលពីថ្ងៃទី៦ខែសីហាឆ្នាំ១៩៤៥ ក្នុងទីក្រុងហ៊ីរ៉ូស៊ីម៉ា ប្រទេសជប៉ុន បណ្ដាលឲ្យមនុស្សស្លាប់ប្រមាណ ១៤០ ០០០នាក់។ គ្រាប់បែកនុយក្លេអ៊ែរបន្ទាប់ ក៏ត្រូវអាមេរិកទម្លាក់នៅក្នុងប្រទេសជប៉ុនដូចគ្នា ស្ថិតនៅក្នុងទីក្រុងណាហ្គាសាគី កាលពីថ្ងៃទី៨ខែសីហាឆ្នាំ១៩៤៥។ គ្រាប់បែកនុយក្លេអ៊ែរនោះមានឈ្មោះថា «Fat Man» បណ្ដាលឲ្យមានមនុស្សបាត់បង់ជីវិតប្រមាណ ៧០ ០០០នាក់។

ចាប់ពីពេលនោះមក គ្មានអាវុធនុយក្លេអ៊ែរណាផ្សេងទៀតដែលត្រូវបានប្រើប្រាស់ក្នុងសង្គ្រាមនោះទេ។ ទោះបីជាយ៉ាងណា ការសាកល្បងនុយក្លេអ៊ែរនៅតែមាន ដោយក្បាលគ្រាប់នុយក្លេអ៊ែរជាង ២ ០០០គ្រាប់ ត្រូវបានធ្វើតេស្តនៅទូទាំងពិភពលោក ដោយបណ្ដាប្រទេសផ្សេងៗសម្រាប់ការបង្កើនសមត្ថភាពអភិវឌ្ឍ និងការរារាំង៕

ដោយ៖ ឈាង