អ៊ីរ៉ង់ បាញ់មីស៊ីលដាក់មន្ទីរពេទ្យអ៊ីស្រាអែល ឯអ៊ីស្រាអែល វាយប្រហាររោងចក្រនុយក្លេអ៊ែរអ៊ីរ៉ង់ វិញ

សង្គ្រាមអ៊ីស្រាអែល-អ៊ីរ៉ង់ កាន់តែក្តៅទៅៗហើយ ដោយភាគីទាំងពីរបន្តបាញ់តដៃគ្នា ខណៈសេចក្តីរាយការណ៍ចុងក្រោយបំផុតបានឲ្យដឹងថា អ៊ីរ៉ង់បានបាញ់មីស៊ីលចំមន្ទីរពេទ្យមួយនៅភាគខាងលិចប្រទេសអ៊ីស្រាអែល រីឯអ៊ីស្រាអែលក៏វាយប្រហាររោងចក្រនុយក្លេអ៊ែរអ៊ីរ៉ង់ វិញផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីក្រសួងការបរទេសអ៊ីស្រាអែល នៅថ្ងៃព្រហស្បតិ៍ទី១៩ខែមិថុនាឆ្នាំ២០២៥, មន្ទីរពេទ្យ Soroka ក្នុងទីក្រុង Beersheba ត្រូវវាយប្រហារដោយមីស៊ីលអ៊ីរ៉ង់ បណ្តាលឲ្យមានមនុស្សរបួស៦៥នាក់ និងបង្កការខូចខាតធ្ងន់ធ្ងរ។

ទន្ទឹមនោះក្រសួងក៏អះអាងដែរថា កងទ័ពអ៊ីស្រាអែលបានវាយប្រហាររោងចក្រនុយក្លេអ៊ែរច្រើនទីតាំងនៅប្រទេសអ៊ីរ៉ង់ ក្នុងនោះរួមទាំងចង្ក្រានរ៉េអាក់ទ័រ Arak និងរោងចក្រចម្រាញ់អ៊ុយរ៉ាញ៉ូម Natanz ផងដែរ។

កងកម្លាំងការពារអ៊ីស្រាអែល (IDF) និយាយថា «ទីតាំងទាំងនេះមានធាតុផ្សំនិងឧបករណ៍ពិសេសៗដែលប្រើប្រាស់សម្រាប់អភិវឌ្ឍអាវុធនុយក្លេអ៊ែរ ហើយគម្រោងនានាកំពុងត្រូវបានបង្កើតឡើងនៅទីនោះ ដែលអាចឲ្យមានការបង្កើនល្បឿននៃកម្មវិធីអាវុធនុយក្លេអ៊ែរទៀតផង»។ 

តាំងពីដំបូងមកម្ល៉េះ អ៊ីស្រាអែល ចោទថា អ៊ីរ៉ង់ ជិតផលិតបានគ្រាប់បែកបរមាណូហើយ ដូច្នេះទើបខ្លួនសម្រេចបើកប្រតិបត្តិការ «Rising Lion» វាយអ៊ីរ៉ង់តែម្តងទៅ៕

អត្ថបទ៖ សុខ សុវណ្ណ

ចុចអាន៖ ត្រាំ អនុម័តផែនការវាយអ៊ីរ៉ង់រួចហើយ រង់ចាំតែការសម្រេចចុងក្រោយប៉ុណ្ណោះ