ណេតាន់យ៉ាហ៊ូ មិនខ្វល់​អនុវត្ត​​បទឈប់បាញ់ ដោយ​ត្រៀម​ប្រ​យុទ្ធ​ជានិច្ច​​

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយ​នៅ​ថ្ងៃពុធទី៨ខែមេសា ថា អ៊ីស្រាអែលនៅតែត្រៀមខ្លួនរួចស្រេច​ក្នុងការ​ប្រឈម​ជាមួយ​នឹងអ៊ីរ៉ង់ប្រសិនបើវាចាំបាច់ ទោះបីជាមានបទឈប់បាញ់រវាងសហរដ្ឋអាមេរិក និងអ៊ីរ៉ង់ក៏ដោយ។ នេះបើយោងតាមការចុះផ្សាយពីសារព័ត៌មាន CNN ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមទូរទស្សន៍ដោយ​​ធ្វើ​បច្ចុប្បន្នភាព​​​​ដល់​ប្រជាជាតិ​របស់លោក នាយរដ្ឋមន្ត្រី​អ៊ីស្រាអែល លោក ណេតាន់យ៉ាហ៊ូ បានបញ្ចាក់ថា «សូមឲ្យខ្ញុំបញ្ជាក់ឲ្យច្បាស់៖ យើងនៅតែមានគោលបំណងដែលត្រូវបំពេញ ហើយយើងនឹងសម្រេចបាននូវគោលបំណងទាំងនោះ ទាំងតាមរយៈការព្រមព្រៀង ឬតាមរយៈការប្រយុទ្ធគ្នាឡើងវិញ»។

មេដឹកនាំអ៊ីស្រាអែលដែលលែង​ស្តាប់ជំហរ​អន្តរជាតិរូបនេះ បាននិយាយទៀតថា «យើងត្រៀមខ្លួនរួចជាស្រេចដើម្បី​វិល​ត្រឡប់​ទៅសមរភូមិវិញនៅពេលណាដែលត្រូវការ។ ម្រាមដៃរបស់យើងនៅតែស្ថិតនៅលើគន្លឹះនៅ​ឡើយទេ​​។ នេះមិន​មែន​ជាចុងបញ្ចប់នៃ​ការ​ប្រយុទ្ធ​នោះទេ ប៉ុន្តែជាជំហានមួយឆ្ពោះទៅរកការសម្រេចបាននូវគោលបំណងទាំងអស់របស់យើង។ ជាក់ស្ដែង អ៊ីរ៉ង់ចូលទៅក្នុងបទឈប់បាញ់ក្នុងស្ថានភាពខ្សោយជាងពេលណាៗទាំងអស់»។

ការអត្ថាធិប្បាយទាំងនេះបានកើតឡើងបន្ទាប់ពីសហរដ្ឋអាមេរិក និងអ៊ីរ៉ង់បានប្រកាសពីកិច្ចព្រមព្រៀងបទឈប់បាញ់ក្នុងរយៈពេលពីរសប្តាហ៍។

នៅក្នុងនោះដែរ លោក ណេតាន់យ៉ាហ៊ូ ក៏បានវាយបកទៅលើមេដឹកនាំបក្ស​ប្រឆាំងដែលបានស្តីបន្ទោសរួប​លោក​ចំពោះការយល់ព្រមបទឈប់បាញ់មុនពេលអ៊ីស្រាអែលសម្រេចបាននូវគោលបំណងរបស់ខ្លួននៅក្នុងសង្គ្រាម។ លោក បាន​លើក​ឡើង​ផងដែរថា កិច្ចព្រមព្រៀងរវាងអាមេរិក និងអ៊ីរ៉ង់កំពុងមានប្រសិទ្ធភាព មានការសម្របសម្រួលពេញលេញជាមួយអ៊ីស្រាអែល មិនមែនយើងទើបតែត្រូវបានជូនដំណឹងនៅនាទីចុងក្រោយនោះទេ។

លោក Yair Lapid ឥស្សរជន​នៃបក្ស​ប្រឆាំងសំខាន់របស់អ៊ីស្រាអែល បានហៅបទឈប់បាញ់នេះថាជា «គ្រោះមហន្តរាយការទូត» សម្រាប់អ៊ីស្រាអែល ដោយនិយាយថា លោក ណេតាន់យ៉ាហ៊ូ បានបរាជ័យជាមួយនឹងគោលដៅដែលគាត់បានកំណត់។

ដោយឡែក អ៊ីរ៉ង់ឯណោះវិញក៏បានរិះគន់អ៊ីស្រាអែលចំពោះការរំលោភលើបទឈប់បាញ់ ដោយប្រកាសបិទច្រកសមុទ្រ Hormuz និងគំរាមកំហែងដកខ្លួនចេញពីកិច្ចព្រមព្រៀងជាមួយសហរដ្ឋអាមេរិក។ អនុប្រធានាធិបតីសហរដ្ឋអាមេរិក J.D. Vance បន្ទាប់មកបានព្រមានថា ទីក្រុងតេហេរ៉ង់នឹងទទួលរងផលវិបាកធ្ងន់ធ្ងរ ប្រសិនបើកិច្ចព្រមព្រៀងនេះត្រូវបានបរាជ័យ៕

អត្ថបទ៖ សាង ស្រីល័ក្ខ