អារ៉ាប់រួម ទាម​ទារ​ការដោះស្រាយ​ជាកញ្ចប់​ក្នុង​ជម្លោះ​រវាងអាមេរិក និងអ៊ីរ៉ង់ ធានាដល់សុវត្ថិភាព​ច្រក Hormuz

ទីប្រឹក្សាការទូតរបស់ប្រធានាធិបតីអារ៉ាប់រួម (UAE) លោក Anwar Gargash បាននិយាយថា ការដោះស្រាយសង្គ្រាមរវាងសហរដ្ឋអាមេរិក និងអ៊ីរ៉ង់ ត្រូវតែធានា​ដល់​ការ​ឆ្លង​កាត់​ច្រក Hormuz ហើយ​ដោះស្រាយ​​​​ការទប់ស្កាត់កម្មវិធីនុយក្លេអ៊ែររបស់អ៊ីរ៉ង់ និងមីស៊ីល និងយន្តហោះដ្រូន រួមទាំងការបើកផ្លូវសម្រាប់ «មជ្ឈិមបូព៌ាដ៏គ្រោះថ្នាក់ ហើយងាយនឹងបង្កជាហេតុ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន Reuters លោក Gargash បានប្រាប់សន្និសីទសារព័ត៌មានចុងសប្តាហ៍ថា ច្រក Hormuz ដែលជាផ្លូវ​ដឹក​​ប្រេងដ៏សំខាន់បំផុតរបស់ពិភពលោក មិនអាចប្រើប្រាស់​​ជា​​អាវុធនោះ​ទេ។ សន្តិសុខរបស់​ច្រក​នេះ​​មិនមែនជាល្បិចចរចាក្នុងតំបន់ទេ ប៉ុន្តែជាកាតព្វកិច្ចសេដ្ឋកិច្ចសកល។

លោក Gargash បានបញ្ចាក់ថា «ច្រកសមុទ្រ Hormuz មិនអាចត្រូវបានចាប់ជាចំណាប់ខ្មាំងដោយប្រទេសណាមួយឡើយ។ សេរីភាពនៃការធ្វើនាវាចរណ៍តាមផ្លូវទឹក ត្រូវតែជាផ្នែកមួយនៃការដោះស្រាយជម្លោះណាមួយដោយមានកិច្ចព្រមព្រៀងច្បាស់លាស់លើរឿងនោះ»។

លោកបានមានប្រសាសន៍ថា «UAE ចង់ឲ្យសង្គ្រាមបញ្ចប់ ប៉ុន្តែបានព្រមានប្រឆាំងនឹងបទឈប់បាញ់ដែលទុកមូលហេតុដើមនៃអស្ថិរភាពមិនទាន់ដោះស្រាយ។ ជាក់ស្ដែង យើងមិនចង់ឃើញការកើនឡើងកាន់តែខ្លាំងឡើងទេ។ ប៉ុន្តែយើងមិនចង់បានបទឈប់បាញ់ដែលបរាជ័យក្នុងការដោះស្រាយបញ្ហាសំខាន់ៗមួយចំនួនដែលនឹងបង្កើតបរិយាកាសដ៏គ្រោះថ្នាក់ជាងនេះនៅក្នុងតំបន់នោះទេ។ ជាពិសេសកម្មវិធីនុយក្លេអ៊ែររបស់អ៊ីរ៉ង់ មីស៊ីល និងយន្តហោះដ្រូន ដែលនៅតែធ្លាក់មកលើយើង និងលើប្រទេសដទៃទៀត»។

នាពេលកន្លងមក អារ៉ាប់រួមបានត្រៀមខ្លួនរួចជាស្រេចដើម្បីចូលរួមកិច្ចខិតខំប្រឹងប្រែងអន្តរជាតិណាមួយ ដែលដឹកនាំដោយសហរដ្ឋអាមេរិក ដើម្បីធានាការដឹកជញ្ជូនឆ្លងកាត់ច្រកសមុទ្រមួយនេះ៕

អត្ថបទ៖ សាង ស្រីល័ក្ខ