ប្រជាប្រិយភាពរបស់​ ផែថងថាន កំពុងធ្លាក់ចុះ ចំពេលមានវិបត្តិនយោបាយ

នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រ (Paetongtarn Shinawatra) ដែល​ធ្លាប់​ត្រូវ​បាន​គេ​មើល​ឃើញ​ថា​ជា​តារា​រះ​ក្នុង​នយោបាយ​ថៃ​ឥឡូវ​នេះកំពុង​រង​សម្ពាធ ខណៈប្រជាប្រិយភាពរបស់លោកស្រីក៏កំពុងធ្លាក់ចុះ ហើយគណបក្សនយោបាយមួយចំនួននៅក្នុងសម្ព័ន្ធរបស់លោកស្រីកំពុងចាកចេញ ដែលធ្វើឱ្យរដ្ឋាភិបាលរបស់លោកស្រីចុះខ្សោយ នេះបើយោងតាមរបាយការណ៍ពី Reuters នាពេលថ្មីៗនេះ។

គួររម្លឹកថា លោកស្រី ផែថងថាន បានចូលកាន់តំណែងក្នុងឆ្នាំ ២០២៤ ដោយមានការគាំទ្រពីសាធារណៈជនខ្លាំង ដោយសារការជំរុញពីកិច្ចខិតខំប្រឹងប្រែងជំរុញសេដ្ឋកិច្ចយ៉ាងដិតដល់ ដូចជាគម្រោង Digital Wallet បាតដល់អ្នកមានចំណូលទាប។

យោងតាមការស្ទង់មតិរបស់ NIDA (ការស្ទង់មតិដែលធ្វើឡើងដោយវិទ្យាស្ថានជាតិគ្រប់គ្រងការអភិវឌ្ឍន៍ ក្នុងប្រទេសថៃ) នៅចុងឆ្នាំ ២០២៤ លោកស្រី ស្ថិតនៅលើកំពូលនៃការពេញចិត្តជាសាធារណៈសម្រាប់តួនាតីជានាយករដ្ឋមន្ត្រី ដោយមានជាង ៣១% នៃអ្នកឆ្លើយតបគាំទ្រលោកស្រី។ លោកស្រីក៏ត្រូវបានជ្រើសរើសជា «អ្នកនយោបាយប្រចាំឆ្នាំ ២០២៤» ដែលបង្ហាញថាលោកស្រីមានប្រជាប្រិយភាពខ្លាំង និងមានការគាំទ្រខ្លាំងនៅដើមសម័យលោកស្រីធ្វើជានាយករដ្ឋមន្ត្រី។

ទោះយ៉ាងណាក៏ដោយនៅពាក់កណ្តាលឆ្នាំ ២០២៥ ទំនុកចិត្តសាធារណៈបានធ្លាក់ចុះ។ របាយការណ៍របស់រ៉យទ័របានកត់សម្គាល់ថា៦៣% នៃប្រជាជនថៃឥឡូវនេះបង្ហាញទំនុកចិត្តតិចតួច ឬគ្មានលើការគ្រប់គ្រងរបស់លោកស្រី ដោយលើកឡើងពីការខកចិត្តចំពោះការស្ទុះងើបសេដ្ឋកិច្ចយឺត ការឡើងថ្លៃរស់នៅប្រចាំថ្ងៃ និងភាពតានតឹងផ្នែកនយោបាយដែលកំពុងកើនឡើង។ ការស្ទង់មតិរបស់ NIDA នៅខែមីនា ឆ្នាំ ២០២៥ បានបង្ហាញថា មានមនុស្សប្រហែល ៤៥% ប៉ុណ្ណោះដែលនៅតែគាំទ្រនាង ខណៈដែលអ្នកនយោបាយផ្សេងទៀតកាន់តែមានប្រជាប្រិយភាព។

នៅពេលនេះ លោកស្រី កំពុងប្រឈមមុខនឹងបញ្ហាកាន់តែច្រើន បន្ទាប់ពីគណបក្សសំខាន់មួយនៅក្នុងសម្ព័ន្ធរបស់លោកស្រីបានចាកចេញ ដែលធ្វើឱ្យរដ្ឋាភិបាលរបស់លោកស្រីចុះខ្សោយ និងមិនសូវមានស្ថិរភាព។ យោងតាមទីភ្នាក់ងារសារព័ត៌មាន Reuters គណបក្សប្រឆាំងបានប្រើឱកាសនេះ ដើម្បីដាក់ញត្តិមិនទុកចិត្ត ដោយនិយាយថា លោកស្រីមិនមែនជាមេដឹកនាំខ្លាំង និងមានឥទ្ធិពលខ្លាំងពីឪពុកលោកស្រី គឺអតីតនាយករដ្ឋមន្ត្រីថាក់ស៊ីន ស៊ីណាវ៉ាត្រទេ

សរុបមក លោកស្រី ផែថងថាន បានចាប់ផ្តើមជាមេដឹកនាំថ្មីដែលមានក្តីសង្ឃឹមនិងមានប្រជាប្រិយភាព ប៉ុន្តែឥឡូវនេះភាពជាអ្នកដឹកនាំរបស់លោកស្រីកំពុងប្រឈមការធ្លាក់ចុះនៃការគាំទ្រ និងបញ្ហានយោបាយដែលកំពុងដាក់សម្ពាធលោកស្រីថែមទៀត៕

អត្ថបទ៖ ប៊ុន សុភាព