យោធាថៃឃាត់ខ្លួនពលករថៃ និងចិន ៥នាក់ ក្រោយព្យាយាម​​លួចឆ្លងដែនចូលកម្ពុជា

ជនជាតិថៃ និងចិនចំនួន ៥នាក់ រួមជាមួយនឹងមេខ្យល់ម្នាក់ ត្រូវបានយោធាថៃ ស្ទាក់ចាប់ក្បែរព្រំដែនកម្ពុជា ខណៈដែលពួកគេកំពុងលបលួចបម្រុងឆ្លងដែនចូលមកក្នុងទឹកដីកម្ពុជា ដើម្បីបម្រើការងារតាមកាស៊ីណូ ដោយគ្មានច្បាប់អនុញ្ញាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាប់ខ្លួនជនជាតិថៃ និងចិននេះ បានធ្វើឡើងកាលពីវេលាម៉ោង ៦និង៣០នាទី ព្រឹកថ្ងៃទី២២ ខែមិថុនា ឆ្នាំ២០២៥ នៅចំណុចមាត់អូរ ក្នុងស្រុកពោងណាំរ៉ន ខេត្តចាន់បូរី ដោយពួកគេបានធ្វើដំណើរតាមរថយន្តមួយគ្រឿង ឆ្ពោះមកកាន់ក្បែព្រំដែន។ ការឃាត់ខ្លួននេះរួមជាមួយនឹងអ្នកបើកបររថយន្តម្នាក់ មេខ្យល់ម្នាក់ ពលករថៃ៣នាក់ និងជនជាតិចិនចំនួនពីរនាក់។

តាមការសារភាពពីពលករថៃទាំងនោះបានបញ្ជាក់ថា ពួកគេឆ្លងដែនចូលមកដើម្បីកម្ពុជា គឺមានបំណងទៅធ្វើការងារក្នុងកាស៊ីណូ ព្រោះបច្ចុប្បន្នតម្លៃពលកម្មឡើងថ្លៃទ្វេគុណ ហើយត្រូវបង់លុយឱ្យមេខ្យល់ដែលនាំឆ្លងដែនក្នុងម្នាក់ៗចំនួន ៦០០បាត តែក៏ត្រូវយោធាថៃស្ទាក់ចាប់បាន។

បច្ចុប្បន្នបើទោះបីជារដ្ឋាភិបាលថៃ ចេញបម្រាមហាមឃាត់មិនអនុញ្ញាតឲ្យឆ្លងដែនចូលមកកម្ពុជាក៏ដោយ ក៏ជនជាតិថៃជាមួយចំនួននៅតែលបលួចឆ្លងដែនយ៉ាងងងើល ដើម្បីមករកការងារធ្វើនៅក្នុងប្រទេសកម្ពុជាដែរ៕

អត្ថបទ៖ សោ និយមរ័ត្ន