ប្រធានសហភាពសហជីព៖ បណ្តារោងចក្រសហគ្រាសក្នុងស្រុកមានការងារជាច្រើនសម្រាប់ពលរដ្ឋខ្មែរ វិលពីប្រទេសថៃវិញ

បណ្តារោងចក្រសហគ្រាសក្នុងស្រុកមានការងារជាច្រើន រាប់ម៉ឺនសែនកន្លែង រងចាំពលរដ្ឋខ្មែរ ក៏ដូចជាពលករខ្មែរដែលចំណាកពីប្រទេសថៃ វិញ។ នេះបើតាមការលើកឡើងរបស់លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា។

លោក ហង្ស រ៉ាវី បានបញ្ជាក់ថា ស្ថិតក្រោមដំបូល នៃសុខសន្តិភាព បានធ្វើឱ្យកម្ពុជាមានការអភិវឌ្ឍន៍ឥតឈប់ឈរ ដែលធ្វើឱ្យបណ្តាអ្នកវិនិយោគទុន នៃបណ្តាប្រទេសធំៗលើសកលលោក បាននាំយកការវិនិយោគរកស៊ីនៅកម្ពុជា ពិសេសវិស័យឧស្សាហកម្មរោងចក្រ សហគ្រាស។

លោកថា បច្ចុប្បន្ននេះ នៅតាមរោងចក្រជាច្រើន បាននឹងកំពុងដំណើរការទៅដោយភាពល្អប្រសើរខ្ពស់ ក៏ប៉ុន្តែរោងចក្រក៏ត្រូវពង្រីកវិសាលភាពអាជីវកម្មរបស់ខ្លួនឱ្យកាន់តែធំទៅមុខបន្តទៀតដែរ ដែលនេះជាផ្នែកមួយ អាចឱ្យពលរដ្ឋ ឬពលករចំណាកពីប្រទេសថៃ អាចទៅរកការងារធ្វើបាន ព្រោះរោងចក្រក៏មានការងារច្រើនសម្រាប់បងប្អូន។ ពិសេសសូមប្រជាពលរដ្ឋ ជួយលើកស្ទួយវិស័យការងារគ្រប់ប្រភេទនៅក្នុងស្រុក ដើម្បីបម្រើចរន្តការងារក្នុងប្រទេស។

ជាមួយគ្នានេះដែរ កម្មការនីរោងចក្រកាត់ដេរសម្លៀកបំពាក់ JLK Cambodia បានបង្ហាញអារម្មណ៍រីករាយ នឹងពេញចិត្តចំពោះការធ្វើការងារនៅក្នុងស្រុក ដោយមិនចាំបាច់ចំណាកស្រុកទៅប្រទេសដទៃ ខណៈរាជរដ្ឋាភិបាល តែងតែគិតគូរ និងនៅគៀកជាមួយសុខទុក្ខកម្មកររងចក្រ។ ពួកគេបានសម្ដែងក្ដីរីករាយ និងថ្លែងអំណរអរគុណដល់រដ្ឋាភិបាលដែលតែងតែគិតគូពីសុខទុក្ខរបស់ប្រជាពលរដ្ឋ ជាពិសេស វិស័យសុខាភិបាល សុខភាព បានផ្ដល់នៅ ប័ណ្ណ ប ស ស ព្យាបាលជំងឺ និងសម្រាប់ស្រ្តីមានផ្ទៃពោះ ពិនិត្យសុខភាព ដោយឥតគិតថ្លៃ។

សូមបញ្ជាក់ជូនថា សម្ដេចធិបតី ហ៊ុន ម៉ាណែត មានប្រសាសន៍ថា «ពេលប្រទេសជាតិ និងប្រជាពលរដ្ឋខ្មែរយើងប្រឈមនឹងបញ្ហា ស្មារតីសាមគ្គីឯកភាពជាតិ និងការជួយគ្នាទៅវិញទៅមក គឺជាចំណុចខ្លាំងរបស់ប្រជាជាតិខ្មែរយើង»។

ចំណែក សម្តេចតេជោ ហ៊ុនសែន ប្រធានព្រឹទ្ធសភា នៃព្រះរាជណាចក្រកម្ពុជា បានលើកឡើងថា កម្ពុជាបានត្រៀមទទួលយក និងដោះស្រាយការងារជូនពលករដែលត្រឡប់មកពីប្រទេសថៃវិញ។ កម្ពុជាកំពុងខ្វះកម្លាំងពលកម្មទាំងក្នុងវិស័យឧស្សាហកម្ម ទាំងក្នុងវិស័យកសិកម្ម និងសំណង់រាប់សិបម៉ឺនកន្លែង។ ពលករអាចចាកចេញមកកម្ពុជាមុនថៃបណ្តេញចេញ ដែលពេលនេះកំពុងទទួលការមើលងាយ និងប្រមាថយ៉ាងធ្ងន់ធ្ងរនៅតំបន់មួយចំនួន៕

អត្ថបទ ៖សុភា