អង់គ្លេស និង​អ៊ុយក្រែន យល់ព្រម​លើគម្រោង​ផលិត​ដ្រូន​រយៈចម្ងាយឆ្ងាយរួម​គ្នា

នាយករដ្ឋមន្ត្រីអង់គ្លេស Keir Starmer និងប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានជួបប្រជុំគ្នានៅទីក្រុងឡុងដ៍​កាល​ពី​ថ្ងៃ​​ទី​២៣​ខែ​មិថុនា ដើម្បីចាប់ផ្តើមគំនិតផ្តួចផ្តើមផលិតយោធារួមគ្នា ដោយផ្តោតលើ​​យន្តហោះគ្មានមនុស្សបើករយៈចម្ងាយឆ្ងាយ ដែលត្រូវបានរចនាឡើង ដើម្បីពង្រឹងសមត្ថភាពការពាររបស់អ៊ុយក្រែន។

បន្ទាប់ពីកិច្ចពិភាក្សានៅ Downing Street និងសុន្ទរកថាបន្ថែមនៅ Chatham House លោក ហ្សេលេនស្គី បានប្រកាសពីការបង្កើតភាព​ជាដៃគូឧស្សាហកម្ម​ថ្មីរវាងចក្រភពអង់គ្លេស និងអ៊ុយក្រែន។ លោកបានសង្កត់ធ្ងន់ថា យន្តហោះគ្មានមនុស្សបើក ត្រូវបានគេរំពឹងថានឹងត្រូវបានដាក់ពង្រាយប្រឆាំងនឹងគោលដៅយោធាជាយុទ្ធសាស្ត្ររបស់រុស្ស៊ី ហើយ​នឹងត្រូវបាន​សាងសង់ និងថែរក្សារួមគ្នាពង្រឹងឧស្សាហកម្មការពារជាតិរបស់ប្រទេសទាំងពីរ។

មេដឹកនាំ​អ៊ុយក្រែន បាននិយាយថា «យើងនឹងធ្វើវាជាមួយគ្នា។ ខ្ញុំសប្បាយចិត្តចំពោះទំនាក់ទំនងដ៏រឹងមាំទាំងនេះរវាងប្រទេសរបស់យើងទាំងពីរ» ដោយបង្ហាញពីការដឹងគុណចំពោះ​លោក Starmer និងរដ្ឋបាលចក្រភពអង់គ្លេសពីមុនៗ។

ការប្រកាសនេះ ធ្វើឡើងបន្ទាប់ពីការវាយប្រហារដោយយន្តហោះគ្មានមនុស្សបើក និងមីស៊ីល​របស់រុស្ស៊ីយ៉ាងធ្ងន់ធ្ងរទៅលើទីក្រុង​កៀវ មុន​​នោះ​មួយ​ថ្ងៃ។ រុស្ស៊ី​ បាន​ប្រើ​យន្តហោះគ្មានមនុស្សបើកចំនួន ៣៥២គ្រឿង ក្នុង​នោះ​មាន​យន្តហោះ​គ្មាន​មនុស្ស​បើក​ Shahed រចនាដោយអ៊ីរ៉ង់ និងមីស៊ីល​បាលិស្ទិក​របស់កូរ៉េខាងជើង ដែលបណ្តាល​ឲ្យ​មានជនស៊ីវិលយ៉ាងហោចណាស់ ១៤​នាក់​ស្លាប់ និងការខូចខាតហេដ្ឋារចនាសម្ព័ន្ធសំខាន់ៗ។

លោក ហ្សេលេនស្គី បានពណ៌នាប្រទេសរុស្ស៊ី អ៊ីរ៉ង់ និងកូរ៉េខាងជើងថាជា«សម្ព័ន្ធនៃឃាតក»។

សូម​​រឭក​ថា លោក Starmer និង​លោក ហ្សេលេនស្គី បាន​ចុះ​កិច្ចព្រមព្រៀង​​​ភាព​ជាដៃគូសន្តិសុខរយៈពេល ១០០​ឆ្នាំ កាលពីខែមករា​ឆ្នាំ​២០២៥ ហើយ​​​ក៏​មាន​កិច្ចព្រមព្រៀង​ថ្មីៗ​នេះ​តម្លៃ ១,៦​ពាន់លានផោន ដើម្បីផ្តល់មីស៊ីលប្រឆាំងអាកាសដល់អ៊ុយក្រែន​ផង​ដែរ៕

ដោយ៖ ឈាង

ចុចអាន៖ ហ្សេលេនស្គី ព្រមានថា ៥ឆ្នាំទៀត ពូទីន អាចវាយរដ្ឋជាសមាជិកណាតូ