ហ្សេលេនស្គី ព្រមានថា​ ៥ឆ្នាំ​ទៀត​ ពូទីន ​អាចវាយរដ្ឋ​ជា​សមាជិក​ណាតូ

ថ្លែងក្នុងបទសម្ភាសជាមួយ Sky News កាលពីថ្ងៃចន្ទទី២៣ខែមិថុនាឆ្នាំ២០២៥ ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី និយាយថា មេដឹកនាំរុស្ស៊ី វ្ល៉ាឌីមៀរ ពូទីន អាចវាយប្រទេសជាសមាជិកអង្គការណាតូ នៅ៥ឆ្នាំទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយសំណួរពិធីករ Sky ដែលសួរថា អាចទេដែលរុស្ស៊ី អាចបើកការវាយប្រហារក្នុងរយៈពេលប៉ុន្មានខែទៀត? លោកហ្សលេនស្គី តបថា លោកមិនជឿថាពូទីនត្រៀមខ្លួនទាន់ឡើយ ប៉ុន្តែចាប់ពីឆ្នាំ២០៣០ទៅ ពូទីនអាចមានសមត្ថភាពខ្លាំងជាងនេះ។ សព្វថ្ងៃរុស្ស៊ីកំពុងជាប់ដៃជាមួយអ៊ុយក្រែន ដូច្នេះគាត់គ្មានគ្មានធ្វើសមយុទ្ធកងទ័ពទេ។

ម្យ៉ាងទៀត លោកហ្សេលេនស្គី ក៏បង្ហាញក្តីបារម្ភផងដែរថា ផែនការបង្កើនការចំណាយលើវិស័យការពារជាតិឲ្យដល់៥%នៃ GDP របស់សមាជិកណាតូត្រឹមឆ្នាំ២០៣៥ ក៏កំពុងដំណើរការយឺតយ៉ាវផងដែរ។

ការព្រមានរបស់លោកហ្សេលេនស្គី ធ្វើឲ្យគេនឹកឃើញដល់សម្តីមេទ័ពអាល្លឺម៉ង់ ដែលព្រមានកាលពីដើមខែនេះថា រុស្ស៊ី អាចវាយណាតូ នៅត្រឹម៤ឆ្នាំទៀតទៀតប៉ុណ្ណោះ។

ក្នុងបទសម្ភាសផ្តាច់មុខជាមួយ BBC ដែលចេញផ្សាយកាលពីថ្ងៃអាទិត្យទី១ខែមិថុនាឆ្នាំ២០២៥ មេទ័ពអាល្លឺម៉ង់ Carsten Breuer ព្រមានថា រុស្ស៊ី អាចវាយអង្គការណាតូ ក្នុងរយៈពេលត្រឹម៤ឆ្នាំទៀតប៉ុណ្ណោះ។

លោកអះអាងថា រុស្ស៊ីកំពុងខិតខំផលិតរថក្រោះខ្លាំងណាស់ ដោយមួយឆ្នាំៗផលិតបានរាប់ពាន់គ្រឿង ហើយអាចប្រើក្នុងការវាយប្រហារលើរដ្ឋណាតូនៅតំបន់បាល់ទិក ត្រឹមឆ្នាំ២០២៩ឬអាចមុននេះក៏ថាបាន។ ដូច្នេះសមាជិកនៃសម្ព័ន្ធភាពដឹកនាំដោយអាមេរិកនេះទាំងអស់ ត្រូវតែត្រៀមខ្លួនឲ្យមែនទែន សម្រាប់ការវាយប្រហារគ្រប់ទម្រង់។ រុស្ស៊ីក៏ផលិតបានគ្រាប់កាំភ្លើងធំ១៥២មិល្លីម៉ែត្រចំនួន៤លានគ្រាប់ក្នុងឆ្នាំ២០២៤ផងដែរ ហើយមិនមែនគ្រាប់ទាំងអស់ ត្រូវយកទៅប្រើនៅប្រទេសអ៊ុយក្រែននោះទេ។

ចំណែក រដ្ឋមន្ត្រីការបរទេសអេស្តូនី Margus Tsahkna ឯណោះក៏បង្ហាញក្តីបារម្ភដែរថា រុស្ស៊ីនឹងវាយប្រហាររដ្ឋបាក់ទិកដែលជាសមាជិកអង្គការណាតូមួយនេះ នៅប៉ុន្មានឆ្នាំខាងមុខ។

ទោះបីជាយ៉ាងណា ការចោទប្រកាន់ទាំងប៉ុន្មានខាងលើត្រូវទីក្រុងមូស្គូ បដិសេធជាបន្តបន្ទាប់ហើយ ស្តីបន្ទោសថា អឺរ៉ុកំពុងយកលេសនៃការគំរាមកំហែងរបស់រុស្ស៊ី ដើម្បីតែបង្កើនកញ្ចប់ចំណាយលើសព្វាវុធរបស់ពួកគេប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ព្រមានថា ក្រៅ​ពី​អ៊ុយក្រែន រុស្ស៊ីមានបំណង​កម្ចាត់​ម៉ុលដាវី និងរូម៉ានី