ព័ត៌មានអន្ដរជាតិ

អាមេរិកថ្កោលទោសការអំពាវនាវរបស់អ៊ីរ៉ង់ឲ្យចាប់ខ្លួននិងប្រហារជីវិតប្រធាន IAEA

បានផុស

២៥ វិនាទី មុន

នៅ

ថ្ងៃចន្ទ ៣០ មិថុនា ២០២៥

ដោយ

Chheang

ក្រសួងការបរទេសសហរដ្ឋអាមេរិក បានថ្កោលទោសយ៉ាងខ្លាំងចំពោះការទាមទារជាសាធារណៈនាពេលថ្មីៗនេះរបស់អ៊ីរ៉ង់សម្រាប់ការចាប់ខ្លួន និងប្រហារជីវិតលោក Rafael Grossi ប្រធានទីភ្នាក់ងារថាមពលបរមាណូអន្តរជាតិរបស់អង្គការសហប្រជាជាតិ (IAEA)។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Anadolu កាលពីថ្ងៃទី២៩ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសអាមេរិកលោក Marco Rubio បានចាត់ទុកការអំពាវនាវទាំងនេះថា«មិនអាចទទួលយកបាន» ហើយបានជំរុញឲ្យអ៊ីរ៉ង់ធានាសុវត្ថិភាពរបស់បុគ្គលិក IAEA ដែលប្រតិបត្តិការនៅក្នុងប្រទេស។

នៅក្នុងសារដែលបង្ហោះលើបណ្ដាញសង្គម X លោក Rubio បាននិយាយថា «យើងគាំទ្រដល់កិច្ចខិតខំប្រឹងប្រែងត្រួតពិនិត្យ និងតាមដានយ៉ាងសំខាន់របស់ IAEA និងសូមសរសើរលោកអគ្គនាយក និង IAEA ចំពោះការយកចិត្តទុកដាក់ និងវិជ្ជាជីវៈរបស់ពួកគេ»។

សេចក្តីថ្លែងការណ៍នេះ ធ្វើឡើងបន្ទាប់ពីសភាអ៊ីរ៉ង់បានហាមប្រាមលោក Grossi មិនឲ្យចូលទៅក្នុងប្រទេសរបស់ខ្លួន និងបានបដិសេធរាល់ការឃ្លាំមើលរបស់ IAEA នៅឯរោងចក្រនុយក្លេអ៊ែរ។

រដ្ឋមន្ត្រីការបរទេសអ៊ីរ៉ង់លោក Abbas Araqchi បានទទូចថា ការត្រួតពិនិត្យនៅទីតាំងនុយក្លេអ៊ែរគឺ«គ្មានប្រយោជន៍» ហើយអាចមានចេតនាអាក្រក់។ លោកបានលើកឡើងថា «យើងនឹងមិនអនុញ្ញាតឲ្យទីភ្នាក់ងារថាមពលអាតូមិកអន្តរជាតិដំឡើងកាមេរ៉ានៅកន្លែងនុយក្លេអ៊ែររបស់យើងទេ ហើយប្រធានទីភ្នាក់ងារនេះនឹងត្រូវបានហាមឃាត់មិនឲ្យចូលប្រទេស»។

សូមជម្រាបថា លោក Grossi ធ្លាប់បានព្រមានកាលពីសប្ដាហ៍មុនថា អ៊ីរ៉ង់អាចបន្តការចម្រាញ់សារធាតុអ៊ុយរ៉ាញ៉ូមឡើងវិញដល់កម្រិតខ្ពស់ ក្នុងរយៈពេលតែប៉ុន្មានខែខាងមុខទៀតប៉ុណ្ណោះ បើទោះបីជាមានការខូចខាតថ្មីៗនេះធ្វើឡើងដោយការវាយប្រហារតាមអាកាសរបស់អាមេរិក និងអ៊ីស្រាអែលក៏ដោយ។

IAEA បានដើរតួនាទីដ៏សំខាន់ ក្នុងការត្រួតពិនិត្យកម្មវិធីនុយក្លេអ៊ែររបស់អ៊ីរ៉ង់ អស់ជាច្រើនទសវត្សរ៍មកហើយ។ ក្នុងនាមជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ IAEA មានភារកិច្ចផ្ទៀងផ្ទាត់ថា សកម្មភាពនុយក្លេអ៊ែររបស់អ៊ីរ៉ង់មានសន្តិភាព និងស្របតាមសន្ធិសញ្ញាមិនរីកសាយភាយនុយក្លេអ៊ែរ (NPT) ដែលអ៊ីរ៉ង់បានចុះហត្ថលេខានៅឆ្នាំ១៩៧០៕