វ៉ាក់សាំងកូវីដសម្រាប់ក្មេងតូចៗ ​អាចរួចរាល់នៅដើមឆ្នាំក្រោយ

វ៉ាក់សាំងការពារកូវីដសម្រាប់កុមារ​អាចនឹងរួចរាល់នៅដើមឆ្នាំ ២០២២ ព្រោះក្រុមហ៊ុនផលិតឱសថធំៗកំពុងចាប់ផ្តើមសាកល្បងថ្នាំបង្ការលើកុមារនិងក្មេងជំទង់ជាបណ្ដើរៗហើយ ប៉ុន្តែត្រូវរង់ចាំពេលវេលាបន្តិចដើម្បីធានាសុវត្ថិភាពសម្រាប់ក្មេងៗ។

បច្ចុប្បន្នក្រុមហ៊ុនឱសថមួយចំនួនកំពុងធ្វើការពិសោធន៍ព្យាបាលលើមនុស្សវ័យជំទង់ឬក្មេងតូច។ ជាក់ស្ដែង Pfizer បានធ្វើតេស្តវ៉ាក់សាំងរបស់ខ្លួនរួចទៅហើយចំពោះក្មេងវ័យពី ១២ ទៅ ១៥ ឆ្នាំ ហើយក្រុមហ៊ុនទើបតែបានប្រកាសលទ្ធផលថា វ៉ាក់សាំងរបស់ខ្លួនមានប្រសិទ្ធភាពខ្ពស់ក្នុងការការពារកូវីដ-១៩ នៅក្នុងក្រុមអាយុនេះ។ ក្រុមហ៊ុនក៏បានចាប់ផ្តើមសាកល្បងលើកុមារដែលមានអាយុពី ៦ ខែទៅ ១១ ឆ្នាំបន្តទៀត ក្រោយជោគជ័យចំពោះក្រុមខាងលើ។ រីឯក្រុមហ៊ុន Johnson & Johnson ថ្មីៗនេះក៏បានបង្ហាញផែនការសាកល្បងវ៉ាក់សាំងរបស់ខ្លួនចំពោះកុមារនិងមនុស្សវ័យជំទង់ផងដែរ។

ដោយសារកុមារភាគច្រើនប្រឈមនឹងហានិភ័យទាបពីវីរុសកូវីដ-១៩ ដូច្នេះតម្រូវការនៃការចាក់វ៉ាក់សាំងសម្រាប់កុមារ ហាក់ដូចជាមិនបន្ទាន់ទេ។ ប៉ុន្តែទោះជាបែបនេះក្ដី ក្រុមអ្នកវិទ្យាសាស្ត្រនិយាយថា ជំងឺរាតត្បាតអាចនឹងកាន់តែពិបាកគ្រប់គ្រង ប្រសិនបើក្មេងរងគ្រោះខ្លាំងដែរ។

ដោយឡែក លោក James H. Conway ជាគ្រូពេទ្យកុមារនិងជានាយករងផ្នែកវិទ្យាសាស្ត្រសុខភាពនៅ CDC និយាយថា “នៅពេលយើងចាក់វ៉ាក់សាំងដល់មនុស្សធំ នោះមានន័យថា មនុស្សធំជាក្រុមដែលងាយរងគ្រោះនិងអសកម្មភាពស៊ាំ​” ។​ មូលហេតុនេះ ទើបកុមារនៅពីក្រោយអទិភាពមនុស្សចាស់។

ត្បិតតែក្មេងៗប្រឈមហានិភ័យតិចតួចក្ដី ​ប៉ុន្តែការចាក់វ៉ាក់សាំងសម្រាប់កុមារដើម្បីទប់ស្កាត់ការរីករាលដាលនៃវីរុសនិងការពារមនុស្សវ័យក្មេងដែលមានហានិភ័យខ្ពស់ ជារឿងចាំបាច់ដែលត្រូវយកចិត្តទុកដាក់ខ្លាំងដូចគ្នានឹងមនុស្សពេញវ័យដែរ។

ក្រុមអ្នកស្រាវជ្រាវផលិតវ៉់ាក់សាំងបានឱ្យដឹងថា ពួកគេមិនទាន់ច្បាស់ពីលទ្ធផលវ៉ាក់សាំងកុមារបែបណានោះទេ ពីព្រោះការឆ្លើយតបនៃប្រព័ន្ធភាពស៊ាំរបស់កុមារដែលមាន MIS-C ខុសគ្នាពីប្រភេទនៃការឆ្លើយតបភាពស៊ាំរបស់មនុស្សពេញវ័យ ​ហើយពេលនេះវ៉ាក់សាំងសម្រាប់កុមារកំពុងស្ថិតក្នុងដំណើរការសិក្សានៅឡើយ។

ទោះយ៉ាងណា ក្រុមហ៊ុនផលិតថ្នាំបង្ការបានចាប់ផ្តើមសាកល្បងលើមនុស្សវ័យជំទង់ជាមុន ទើបងាកទៅរកក្រុមមនុស្សវ័យក្មេងនាពេលក្រោយ។ នេះក៏ដោយសារមនុស្សពេញវ័យងាយនឹងឆ្លងវីរុសជាងក្មេង ហើយងាយនឹងមានរោគសញ្ញាធ្ងន់ធ្ងរជាងផងដែរ។

ចំពោះបណ្ឌិតសភាផ្នែកកុមារអាមេរិកឯណោះវិញអះអាងថា ទោះបីគ្មានវ៉ាក់សាំងសម្រាប់កុមារនិងក្មេងជំទង់ក៏ដោយ វាអាចមានសុវត្ថិភាពក្នុងការបើកសាលារៀនឡើងវិញ ប្រសិនបើវិធានការសុវត្ថិភាពត្រូវបានអនុវត្ត ហើយប្រសិនបើការរាលដាលនៅតាមសហគមន៍មានកម្រិត។

ចំណែក ក្រុមអ្នកស្រាវជ្រាវ នៅតែមិនប្រាកដថាពេលណាថ្នាំវ៉ាក់សាំងសម្រាប់កុមារនឹងត្រូវបានផ្តល់ជូនជាសាធារណៈនោះទេ ព្រោះវាអាស្រ័យលើលទ្ធផលនៃការសាកល្បង ។ ប៉ុន្តែលោក Conway រំពឹងថា វ៉ាក់សាំងនឹងរួចរាល់សម្រាប់ក្មេងជំទង់ដែលមានអាយុពី ១២ ទៅ ១៦ ឆ្នាំនៅរដូវក្តៅនេះ និងសម្រាប់ក្មេងអាយុពី ៥ ទៅ ១១ ឆ្នាំនៅដើមឆ្នាំ ២០២២ ហើយសម្រាប់ទារកនិងក្មេងតូចៗនៅក្រោយឆ្នាំ ២០២២៕

ប្រែសម្រួល៖ សន្យា

ប្រភព៖ scientificamerican

ចុចអាន៖ កុំខំតែពាក់ម៉ាសនិងលាងដៃ ហើយភ្លេចរឿងសំខាន់ៗប៉ុន្មាននេះ

ចុចអាន៖ អ្នក​ជា​សះស្បើយ​ពី​កូវីដ​ អាច​ប្រឈម​បញ្ហា​តម្រងនោម​ធ្ងន់ធ្ងរ