ទឹកជំនន់ភ្លាមៗនៅរដ្ឋតិចសាស់ សម្លាប់មនុស្ស១៣នាក់ និង​ក្មេង​ស្រី​ជាង២០​នាក់បាត់ខ្លួន

យ៉ាងហោចណាស់មនុស្ស ១៣​នាក់បានស្លាប់ និងក្មេងស្រីវ័យក្មេងជាង ២០​នាក់កំពុងបាត់ខ្លួន បន្ទាប់ពីទឹកជំនន់ភ្លាមៗបាន​កើត​ឡើង​នៅ​រដ្ឋតិចសាស់ នៃ​សហរដ្ឋ​អាមេរិក​ កាល​ពី​ថ្ងៃ​សុក្រ​ទី​៤​ខែ​កក្កដា។

ទឹកជំនន់នេះ បណ្តាលមកពីភ្លៀងធ្លាក់ខ្លាំងពេញមួយយប់ ដែលធ្វើ​ឲ្យ​ទន្លេ Guadalupe កើនឡើង​កម្ពស់​ជាង ៦​ម៉ែត្រ​ក្នុងរយៈពេល​មិន​ដល់​មួយម៉ោង​ផង។ កម្ពស់​ទឹក​កើន​ឡើង​​ឆាប់រហ័ស​បែប​នេះ បាន​បង្ក​ជា​គ្រោះថ្នាក់​ដល់​មនុស្ស​ជា​ច្រើន ជា​ពិសេស​អ្នកបោះជុំរុំ​នៅ Camp Mystic ដែលជាជុំរុំ​រដូវក្តៅសម្រាប់​ក្មេងស្រីគ្រីស្ទានដែលមានទីតាំងនៅតាមដងទន្លេ។

ក្រុមជួយសង្គ្រោះបាននិយាយថា យ៉ាងហោចណាស់មានក្មេងស្រី ២៣​នាក់មកពីជុំរុំ​នេះ នៅតែមិនទាន់​រក​ឃើញ។ ជំនន់ទឹកភ្លៀងបានបំផ្លាញអគារ កាត់ផ្តាច់ចរន្តអគ្គិសនី និងបណ្តាញទំនាក់ទំនង និងធ្វើ​ឲ្យ​ផ្លូវជាច្រើនខ្សែមិនអាចឆ្លងកាត់បាន។ អាជ្ញាធរបាន​ប្រាប់​ថា ឧទ្ធម្ភាគចក្រ ទូក និងយន្តហោះគ្មានមនុស្សបើក ត្រូវបានដាក់ពង្រាយក្នុងកិច្ចខិតខំប្រឹងប្រែងស្វែងរក និងជួយសង្គ្រោះ។

អភិបាលរដ្ឋ លោក Greg Abbott បានប្រកាសភាពអាសន្ន និងធានាថា ធនធានចាំបាច់ទាំងអស់ត្រូវបានប្រើប្រាស់ដើម្បីស្វែងរកអ្នកបាត់ខ្លួន និងជួយសហគមន៍ដែលរងផលប៉ះពាល់។

ក្រុមមន្ត្រី បានព្រមានថា​នឹងមានភ្លៀងធ្លាក់បន្ថែមទៀតនៅចុងសប្តាហ៍នេះ ហើយការជូនដំណឹងអំពីទឹកជំនន់ភ្លាមៗនៅតែចាំបាច់សម្រាប់ផ្នែកខ្លះនៃភូមិ​ភាគកណ្តាលនៃរដ្ឋតិចសាស់។ ប្រជាពលរដ្ឋ​ត្រូវ​បាន​ជំរុញ​​ឲ្យ​​នៅ​ក្នុងផ្ទះ និង​ចៀសវាង​តំបន់​លិច​ទឹក​៕

ដោយ៖ ឈាង