តើខែលការពារមីស៊ីល Patriot ដែលអ៊ុយក្រែន សុំអាមេរិក ថ្លៃកម្រិតណា?

តបទៅសំណើរបស់អ៊ុយក្រែនដែល​សុំខែលការពារមីស៊ីល Patriot, ប្រធានាធិបតីអាមេរិក ដូណាល់ ត្រាំ ឆ្លើយ ថា​ ប្រព័ន្ធនេះគឺថ្លៃណាស់ លោកសុំពិចារណាលើសំណើនេះសិន ខណៈបើយោងតាមគេហទំព័រ Military Watch Magazine, ​ខែលការពារ​ Patriot ត្រូវគេប៉ាន់ស្មានថា មានតម្លៃប្រហែល ៤០០លានដុល្លារអាមេរិក ហើយបើបូកបន្ថែមទាំងមីស៊ីលទៀត វាអាចមានតម្លៃរហូតដល់ទៅ១.១ពាន់លានដុល្លារអាមេរិកឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយសំណួរអ្នកសារព័ត៌មានកាលពីថ្ងៃពុធទី៩ខែកក្កដាឆ្នាំ២០២៥ អំពីការផ្តល់ Patriot ឲ្យប្រមុខរដ្ឋាភិបាលទីក្រុង​កៀវ វ៉ូឡូឌីមៀរ ហ្សេលេនស្គី, លោកត្រាំនិយាយថា «ខែលការពារនេះគឺកម្រនិងថ្លៃណាស់ ប៉ុន្តែយើងនឹងពិនិត្យមើលសំណើរបស់អ៊ុយក្រែន។ វា​ជា​រឿង​ដ៏​គួរ​ឲ្យ​ខ្មាសអៀនមួយដែរ ​ដែល​យើង​ត្រូវ​ចំណាយ​ប្រាក់​ច្រើនសន្ធឹកសន្ធាប់ ទៅ​លើ​ការ​គាំទ្រ​ទីក្រុងកៀវ»។

ប្រព័ន្ធចាប់មីស៊ីល Patriot (Phased Array Tracking Radar to Intercept on Target) គឺជាខែលការពារដែនអាកាសនិងមីស៊ីលដ៏ទំនើបបំផុតមួយរបស់កងទ័ពអាមេរិក។ វាត្រូវបានផលិតឡើងដើម្បីការពារពីការគំរាមកំហែងតាមផ្លូវអាកាស។

Patriot ត្រូវបានផលិតដោយក្រុមហ៊ុនធំៗពីររបស់សហរដ្ឋអាមេរិក ពោលគឺក្រុមហ៊ុន Raytheon ជាអ្នកផលិតប្រព័ន្ធនានារួមទាំងសមាសធាតុសំខាន់ៗជាច្រើន ចំណែកក្រុមហ៊ុន Lockheed Martin ជាអ្នកដើរតួនាទីយ៉ាងសំខាន់ក្នុងការផលិតមីស៊ីលស្ទាក់ចាប់ទំនើបៗសម្រាប់ប្រព័ន្ធនេះ៕

អត្ថបទ៖ សុខ សុវណ្ណ