ព័ត៌មានអន្ដរជាតិ

រឿងអាស្រូវផ្លូវភេទនិងពុករលួយ កំពុងធ្វើឱ្យសហគមន៍ព្រះសង្ឃថៃរង្គោះរង្គើ

បានផុស

១២ ខែ មុន

នៅ

ថ្ងៃអង្គារ ១៥ កក្កដា ២០២៥

ដោយ

រឿងអាស្រូវផ្លូវភេទនិងអំពើពុករលួយក្នុងចំណោមព្រះសង្ឃថៃកំពុងបន្តរីករាលដាល និងវធ្វើឱ្យសហគមន៍ព្រះសង្ឃថៃរង្គោះរង្គើ ខណៈអតីតព្រះចៅអធិការវត្ត Chujit Dhammaram ក្នុងខេត្ត Ayutthaya បានសារភាពថា បានផ្ទេរប្រាក់ជិត ១៣ លានបាត (៣៥៧,០០០ ដុល្លារ) ទៅឱ្យស្ត្រីដែលគេស្គាល់ថាជា «Sika Golf»។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី១៥ ខែកក្កដា។

ព្រះចៅអធិការ Phra Thep Wachiratheeraporn ជាចៅអធិការវត្ត Phra Phutthachai ខេត្ត Saraburi និង រូបភាពរបស់ Sika Golf។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីនេះកំពុងស្ថិតក្រោមការស៊ើបអង្កេតដោយគណៈកម្មការប្រឆាំងអំពើពុករលួយវិស័យសាធារណៈ (PACC) និងនាយកដ្ឋានប្រឆាំងអំពើពុករលួយ (ACD)។ នៅថ្ងៃចន្ទ ក្រុមមន្ត្រីថៃបានទៅដល់វត្ត Chujit Dhammaram ដើម្បីពិនិត្យមើលការផ្ទេរលុយ និងសាកសួរព្រះចៅអធិការ Phra Theppatcharaporn ដែលតាំងពីពេលបែករឿងអាស្រួវនោះមកកំពុងសហការជាមួយអាជ្ញាធរថៃ។

អ្នកស៊ើបអង្កេតបានរកឃើញថាការបរិច្ចាគរបស់វត្ត Chujit Dhammaram ភាគច្រើនត្រូវបានគ្រប់គ្រងតាមរយៈគណនីធនាគារផ្ទាល់ខ្លួនរបស់ចៅអធិការវត្ត ជាជាងគណនីផ្លូវការរបស់វត្ត។ នៅចន្លោះខែមករាដល់ខែកក្កដាឆ្នាំមុន អតីតចៅអធិការបានផ្ទេរប្រាក់ចំនួន ១២.៨ លានបាតទៅឱ្យ Sika Golf ដោយប្រើកម្មវិធីធនាគារចល័ត និងសាច់ប្រាក់។ ការផ្ទេរមួយក្នុងចំណោមការផ្ទេរទាំងនោះមានចំនួនដល់ទៅ ១០ លានបាត។ លើសពីនោះ ប្រាក់ ៣៨ ម៉ឺនបាតផ្សេងទៀតត្រូវបានផ្ញើដោយផ្ទាល់ពីគណនីផ្លូវការរបស់វត្តទៅឲ្យនាង។ សកម្មភាពទាំងនេះអាចចាត់ទុកថាជាអំពើខុសឆ្គងក្រោមច្បាប់ថៃ ជាពិសេសមាត្រា ១៥៧ នៃក្រមព្រហ្មទណ្ឌ។

ព្រះចៅអធិការវត្ត Chujit Dhammaram លាចាកសិក្ខាបទ។ (រូបភាព៖ Khaosod English)

ប៉ូលិសបានឲ្យដឹងថា Sika Golf ធ្វើពុតជាស្ត្រីអ្នកមាន និងមានទំនាក់ទំនងល្អជាមួយអ្នកមានមុខមាត់ក្នុងសង្គម ដើម្បីទទួលបានការទុកចិត្តពីព្រះចៅអធិការវត្ត។ នាងបានប្រាប់ចៅអធិការវត្តថានាងត្រូវការប្រាក់សម្រាប់ធ្វើអាជីវកម្មសេរ៉ាមិច។ ដោយជឿនាង ព្រះចៅអធិការបានផ្តល់លុយឱ្យនាងដោយមិនបានចុះហត្ថលេខាលើកិច្ចព្រមព្រៀងប្រាក់កម្ចីណាមួយឡើយ។ ក្រោយមកនាងបានគេចពីការសងប្រាក់ទាំងនោះ។

អតីតព្រះចៅអធិការរូបនេះបានទទួលស្គាល់ថាខ្លួនជាមនុស្សឆោតល្ងង់ និងទទួលស្គាល់ថាទង្វើរបស់ខ្លួនជាកំហុសធ្ងន់ធ្ងរនិងបាននិយាយថាគាត់ទើបតែដឹងថាគាត់ត្រូវបានគេបោកប្រាស់បន្ទាប់ពីបានឮករណីស្រដៀងគ្នានេះទាក់ទងនឹងព្រះចៅអធិការវត្ត Tri Thotsathep ម្នាក់ទៀតដែលបានភៀសខ្លួនទៅប្រទេសឡាវដើម្បីគេចពីការចោទប្រកាន់ពីបទពុករលួយ។ លើសពីនេះ វត្ត Chujit Dhammaram ក៏ត្រូវបានរកឃើញថាខ្វះការត្រួតពិនិត្យរដ្ឋបាលត្រឹមត្រូវដោយមិនមានគណៈកម្មការវត្តឬអ្នកគ្រប់គ្រងនោះទេ។

ទាំងអតីតព្រះសង្ឃ និង Sika Golf បដិសេធថាមិនមានទំនាក់ទំនងស្នេហានោះទេ ប៉ុន្តែរឿងអាស្រូវនេះបានចោទជាសំណួរយ៉ាងធ្ងន់ធ្ងរអំពីតម្លាភាពហិរញ្ញវត្ថុ និងការត្រួតពិនិត្យនៅក្នុងស្ថាប័នព្រះសង្ឃរបស់ប្រទេសថៃ។ មកដល់ពេលនេះការស៊ើបអង្កេតកំពុងបន្ត ដោយមានព្រះសង្ឃជាច្រើនអង្គទៀតជាប់ពាក់ព័ន្ធជាមួយករណីនេះ៕