ព័ត៌មានអន្ដរជាតិ

ត្រាំ ផ្តាំទៅ ហ្សេលេនស្គី ថា៖ «កុំបាញ់ចូលមូស្គូឲ្យសោះ!»

បានផុស

១ ថ្ងៃ មុន

នៅ

ថ្ងៃពុធ ១៦ កក្កដា ២០២៥

ដោយ

ក្រោយមានការចុះផ្សាយព្រោងព្រាតថា ប្រធានាធិបតីអាមេរិក ដូណាល់ ត្រាំ អាចបើកដៃឲ្យទីក្រុងកៀវ បាញ់ចូលជ្រៅក្នុងដីរុស្ស៊ីនោះ ពេលនេះ ប្រមុខសេតវិមានបានផ្តាំទៅមេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី ថា «កុំវាយប្រហារទីក្រុងមូស្គូឲ្យសោះ!»។

ប្រធានាធិបតីអាមេរិក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអង្គារទី១៥ខែកក្កដាឆ្នាំ២០២៥ អ្នកសារព័ត៌មានបានសួរទៅលោកត្រាំជុំវិញរឿងលោកហ្សេលេនស្គី ចង់បាញ់រដ្ឋធានីរបស់ប្រទេសរុស្ស៊ី។ ជាការឆ្លើយតប ប្រធានាធិបតីអាមេរិកនិយាយថា «ទេ គាត់មិនត្រូវកំណត់គោលដៅទីក្រុងមូស្គូទេ»។

ស្របពេលជាមួយគ្នានោះ អ្នកនាំពាក្យសេតវិមានលោកស្រី Karoline Leavitt ក៏បានបញ្ជាក់ដែរថា លោកប្រធានាធិបតីមិនលើកទឹកចិត្តឲ្យមានការបាញ់សម្លាប់គ្នាតទៅទៀតទេ។ លោកធ្វើការដោយមិនខ្លាចនឿយហត់ដើម្បីបញ្ឈប់ការសម្លាប់និងពន្លត់ភ្លើងសង្គ្រាមនេះ។

មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី (រូបថត៖ Reuters)

សម្តីលោកត្រាំ កើតឡើងមិនយូរប៉ុន្មានបន្ទាប់ពីកាសែត Washington Post ចេញផ្សាយថា មេដឹកនាំអាមេរិក កំពុងពិចារណាផ្តល់សិទ្ធិប្រើប្រាស់មីស៊ីលរយៈចម្ងាយឆ្ងាយ ATACMS ដល់អ៊ុយក្រែន សម្រាប់បាញ់ចូលជ្រៅក្នុងដីរុស្ស៊ី ដោយកំណត់គោលដៅលើហេដ្ឋារចនាសម្ព័ន្ធយោធា។

ផែនការនេះ គឺជាផ្នែកមួយនៃយុទ្ធសាស្ត្រដ៏ទូលំទូលាយរបស់អាមេរិក ដើម្បីបង្កើនសម្ពាធយោធាលើទីក្រុងមូស្គូ និងបង្ខំឲ្យរុស្ស៊ីចូលតុចរចាបញ្ចប់សង្រ្គាមនៅអ៊ុយក្រែន។

មីស៊ីល ATACM ដែលអាចវាយប្រហារគោលដៅបានចម្ងាយ ៣០០គីឡូម៉ែត្រ អាចអនុញ្ញាតឲ្យអ៊ុយក្រែនវាយលុកមូលដ្ឋានទ័ព អាកាសយានដ្ឋាន និងឃ្លាំងផ្គត់ផ្គង់របស់រុស្ស៊ី ដោយរហូតមកដល់ពេលនេះ អាវុធអ៊ុយក្រែនដែលទទួលបានពីសម្ព័ន្ធមិត្តលោកខាងលិច មិនទាន់មានសមត្ថភាពវាយប្រហារដល់គោលដៅទាំងនោះនៅឡើយទេ។

Washington Post បានចុះផ្សាយទៀតថា មីស៊ីលគ្រូស ដែលមានសមត្ថភាពបាញ់ដល់ទីក្រុងមូស្គូ ក៏ត្រូវបានពិចារណាផងដែរ ប៉ុន្តែមិនទាន់រាប់បញ្ចូលនៅក្នុងផែនការលើកនេះទេ៕

អត្ថបទ៖ សុខ សុវណ្ណ

ចុចអាន៖ WP៖ ត្រាំ អាចបើកដៃឲ្យអ៊ុយក្រែនប្រើមីស៊ីល ATACMS បាញ់ចូលជ្រៅក្នុងទឹកដីរុស្ស៊ី