ព័ត៌មានអន្ដរជាតិ

ប៉ូលិសឥណ្ឌូណេស៊ីចាប់ខ្លួនមនុស្ស ១២ នាក់ ពីបទជួញដូរទារកទៅសិង្ហបុរី

បានផុស

១០ ខែ មុន

នៅ

ថ្ងៃពុធ ១៦ កក្កដា ២០២៥

ដោយ

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី ១៦ ខែ កក្កដានេះ ប៉ូលិសឥណ្ឌូណេស៊ីបានចាប់ខ្លួនមនុស្ស១២ នាក់ ដែលជាក្រុមជួញដូរទារកចំនួន១៤នាក់ទៅកាន់ប្រទេសសិង្ហបុរី និងជំរុញឲ្យមានការស៉ើបអង្គេតបន្ថែមទៀតស្វែងរកទារកដែលត្រូវបានជួញដូរពីមុនមក។

ករណីនេះត្រូវបានគេរកឃើញបន្ទាប់ពីឪពុកម្តាយនៅខេត្ត West Java បានរាយការណ៍ថាកូនរបស់ពួកគេត្រូវបានចាប់ពង្រត់។ ក្រោយការស៊ើបអង្កេតប៉ូលិសបានរកឃើញថា ឪពុកម្តាយទារកពិតជាបានធ្វើកិច្ចសន្យាប្រគល់កូនឱ្យក្រុមជួញដូរយកលុយមែន តែពេលមិនទទួលបានលុយពីក្រុមជួញដូរទើបរាយការណ៍ប្រាប់ប៉ូលិស។

លោក Surawan មន្ត្រីប៉ូលិសជាន់ខ្ពស់នៅខេត្ត West Java ប្រទេសឥណ្ឌូណេស៊ី បានឲ្យដឹងថាជនសង្ស័យគឺជាផ្នែកមួយនៃក្រុមដែលបានរៀបចំប្រតិបត្តិការជួញដូរតាំងពីឆ្នាំ ២០២៣ មកម្លេះ។ ពួកគេបានកំណត់គោលដៅទៅលើម្តាយ ឬគ្រួសារដែលមិនអាច ឬមិនចង់មើលថែទាំកូនរបស់ពួកគេ ដោយផ្តល់ប្រាក់ឱ្យពួកគេជាថ្នូរនឹងការយកទារកទាំងនោះ។ នៅក្នុងចំណោមទាំងអស់មានទារកខ្លះមានអាយុត្រឹមតែបីខែប៉ុណ្ណោះ ភាគច្រើនត្រូវបានគេយកមកពីខេត្ត West Java និងបានផ្លាស់ទៅទីក្រុង Pontianak នៅលើកោះ Borneo មុនពេលបញ្ជូនទៅប្រទេសសិង្ហបុរី។

ទារកទាំងនោះត្រូវបានគេលក់ក្នុងតម្លៃចន្លោះពី ១១ ទៅ ១៦ លានរូពីឥណ្ឌូណេស៊ី (ប្រហែល ៦៧៦ ដុល្លារដល់ ៩៨៣ ដុល្លារ)។ សមាជិកនីមួយៗនៃក្រុមជួញដូរមានតួនាទីជាក់លាក់រៀងៗខ្លួនដោយ អ្នកខ្លះស្វែងរកឪពុកម្តាយដែលចង់បោះបង់កូនរបស់ពួកគេ ខ្លះទៀតមើលថែទារក ហើយខ្លះទៀតទទួលខុសត្រូវក្នុងការបង្កើតឯកសារក្លែងក្លាយដូចជា សំបុត្រគ្រួសារ និងលិខិតឆ្លងដែនជាដើម។

នៅក្នុងប្រតិបត្តិការប៉ូលិសបានជួយសង្គ្រោះទារក ៥ នាក់នៅ Pontianak និងម្នាក់នៅ Tangerang ក្បែរទីក្រុងហ្សាកាតា។ ជនសង្ស័យទាំង១២នាក់ត្រូវបានចាប់ខ្លួននៅក្នុងទីក្រុងផ្សេងៗគ្នា រួមមានទីក្រុងហ្សាការតា ទីក្រុង Bandung និង Pontianak។

អាជ្ញាធរឥណ្ឌូណេស៊ី ឥឡូវនេះកំពុងធ្វើការជាមួយប៉ូលិសអន្តរជាតិដើម្បីស្វែងរក និងជួយសង្គ្រោះទារកដែលត្រូវបានជួញដូរពីមុនមកអាចស្ថិតនៅក្នុងប្រទេសសិង្ហបុរីរួចស្រាប់ហើយ៕