ព័ត៌មានអន្ដរជាតិ

ប៉ូលិសម្នាក់ជួយការពារអ្នកតវ៉ាត្រូវកម្លាំងយោធាមីយ៉ាន់ម៉ាបាញ់ស្លាប់

បានផុស

៣ years មុន

នៅ

ថ្ងៃសៅរ៍ ៣ មេសា ២០២១

ដោយ

ប៉ូលិសម្នាក់ដែលនៅកន្លែងកូដកម្មបានជួយការពារអ្នកតវ៉ាពីការបង្ក្រាបរបស់របបយោធាមីយ៉ាន់ម៉ាត្រូវបានបាញ់ស្លាប់ក្នុងទីប្រជុំជន Tamu នៅតំបន់ Sagaing នៅថ្ងៃ សុក្រម្សិលមិញ។

កម្លាំងសន្តិសុខបានបើកការបាញ់រះទៅលើអ្នកស្រុកនៅជិតស្ថានីយ៍ពន្លត់អគ្គីភ័យនៅ Nan Phar Lone Ward ក្នុងទីប្រជុំជន Tamu វេលាម៉ោង២:៣០នាទីព្រឹកកាលពីថ្ងៃសុក្រ។ ពេលនោះ បុរសឈ្មោះ Kin Kin ជាប៉ូលិសជនជាតិភាគតិច Chin បាននៅកន្លែងតវ៉ាដែលប្រឆាំងនឹងរបបយោធា ក៏ត្រូវកម្លាំងសន្តិសុខបាញ់សម្លាប់នៅពេលគាត់បានជួយការពារអ្នកស្រុកពីការវាយប្រហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រុក Tamu ម្នាក់បាននិយាយថា ៖«យើងមិនទាន់អាចយកសពគាត់បាននៅឡើយទេ។ ទាហាបានដាក់ពង្រាយកម្លាំងនៅស្ថានីយ៍ពន្លត់អគ្គីភ័យ ហើយពួកគេមានចេតនាទុកសពរបស់គាត់នៅខាងក្រៅស្ថានីយ៍ពន្លត់អគ្គីភ័យ ដូច្នេះពួកគេអាចបាញ់នរណាម្នាក់ដែលទៅយកសព។ យើងបានឮថា ប៉ូលិស និងទាហានក៏បានរបួសក្នុងការប៉ះទង្គិចនោះដែរ តែយើងនៅតែមិនអាចបញ្ជាក់បាន»។

អ្នកស្រុកនិយាយថា មនុស្សពីរបានកំពុងបាត់ខ្លួនពីការបង្ក្រាបនោះ។

ប៉ូលិស Kin Kin ជាមនុស្សទី២ដែលត្រូវបានសម្លាប់នៅ Tamu ដោយរបបយោធា។ អ្នកស្រុក Tamu ម្នាក់បានស្លាប់កាលពីថ្ងៃទី២៦ ខែមីនា មួយថ្ងៃបន្ទាប់ពីគាត់ត្រូវបានកម្លាំងសន្តិសុខបាញ់ត្រូវ។

មនុស្ស៣នាក់ដែលបានរបួសក្នុងការបាញ់ប្រហារជាមួយគ្នានោះទទួលបានការព្យាបាលនៅ Imphal ក្នុងប្រទេសឥណ្ឌា និងលែងស្ថិតក្នុងស្ថានភាពធ្ងន់ធ្ងរហើយ។

បុរស Gurkha ម្នាក់ដែលធ្វើការជាសន្តិសុខយាមឯការដ្ឋានមួយកន្លែងនៅ Tamu ត្រូវបានចាប់ខ្លួនកាលពីថ្ងៃចន្ទ ប៉ុន្តែរហូតដល់ពេលនេះមិនដឹងថា គាត់ត្រូវគេទុកនៅកន្លែងណាទេ។

ទោះបីជាការប្រើប្រាស់កម្លាំងបង្ក្រាបដែលបណ្តាលឲ្យស្លាប់របស់កម្លាំងសន្តិសុខ និងការគំរាមចាប់ខ្លួន ក៏អ្នកស្រុក Tamu នៅតែចេញតវ៉ានៅតាមផ្លូវនៅថ្ងៃសុក្រម្សិលមិញ៕

ប្រែសម្រួល៖ វីរបុត្រ
ប្រភព៖ Irrawaddy